Amaghendele ghano ghanoghiile kʉ vɨtɨki
5
Lɨno,
mwɨghaghe kwa Ngʉlʉve,
ʉlwakʉva ʉmue mʉlɨ vaana vaake vaghanɨke.
2 Mʉvisaghe nʉ lʉghano,
ndavʉle ʉKɨlɨsite vʉle alyatʉghanile kuhanga akafua vwɨmɨla ʉsue.
Alyahʉmisie ʉvwʉmi vwake kuuva lɨtekelo ɨlɨnya lʉnuusi ʉlʉnono lʉno lʉkʉmhovosia ʉNgʉlʉve.
3 Namʉngajovwaghe vwɨmɨla ʉvʉvwafu nambe ʉvʉghendamwalu,
nambe ʉvʉhojofu vwa kyʉma,
ʉlwakʉva isio sooni nasinoghiile kuvombua na vɨmɨke.
4 Kange,
namʉngajovaghe inya soni nambe amasio agha kɨjasu nambe indendʉlo,
ʉlwakʉva isio sooni sila lʉvʉmbʉlɨlo,
ʉlwene mʉmhongesyaghe ʉNgʉlʉve.
5 Mʉkagʉlaghe kuuti ʉmuunhu ghweni ʉmʉghendamwalu,
ʉmʼbwafu,
nʉ mhojofu ghwa kyʉma,
naalingila mʉ Vʉtwa vwa Kɨlɨsite nʉ Ngʉlʉve.
Ʉvʉhojofu vwa kyʉma kwe kwɨmɨka ifihwani.
6 Vwɨmɨla isio,
ʉmuunhu naangavasyangaghe na masio agha kɨjasu,
ʉlwakʉva ɨngʼhalaasi ja Ngʉlʉve jɨkʉvisila avaanhu vano navikʉnkʉnda.
7 Lɨno,
mʉlekaghe kuuva vʉhangɨlanɨsi na vaanhu avuo.
Kukukala mʉ lʉmuli
8 Ʉlʉtasi ʉmue mʉlyale ngʼhiisi,
neke kuhʉma mʉkʉmwɨtɨka ʉMʉtwa ʉYesu,
mʉlɨ lʉmuli.
Lɨno,
mukalaghe ndavʉle lʉnoghiile kʉ vaanhu va lʉmuli.
9 Nɨjovile enendɨɨkɨ,
ʉlwakʉva avaanhu vano lʉmuli vivomba inofu,
isa vʉgholofu ni sa kyangʼhaani.
10 Mʉghimbaghe kukagʉla sino ikeela ʉMʉtwa.
11 Namʉngavisaghe nʉ vʉhangɨlanɨsi ʉvwa kʉvomba imbombo isa mʉ ngʼhiisi,
isio sila lʉvʉmbʉlɨlo,
ʉlwene mʉjovaghe pa vʉvalafu kuuti ʉvuo vʉhosi.
12 Sino vivomba avaanhu avuo kʉ vʉsyefu,
kɨnyasoni nambe kujova.
13 Neke sooni pano sivɨkua pa lʉmuli,
ʉvwakyangʼhaani vuvoneka.
14 Ʉlʉmuli lwe lʉno lupelela ifiinu fivonekaghe.
Fye nambe avaanhu viiti,
“Sisimuka ʉve ghwe jʉno ʉghoneliile!
Ʉsyʉke kuhʉma kʉ vafue.
Ghwope ʉKɨlɨsite ɨkʉkʉmulika.”
15 Lɨno,
mulolelelaghe amaghendele ghiinu.
Mʉlekaghe piiva vajasu,
mʉvisaghe vanya lʉhala.
16 Mʉvombaghe inofu ʉnsiki ghwoni ghʉno mʉlɨ naghwo,
ʉlwakʉva ifighono ifi avaanhu vivomba kyongo ʉvʉhosi.
17 Mʉ ʉluo mʉlekaghe piiva vajasu,
ʉlwene mʉkagʉlaghe sino ʉMʉtwa ilonda mʉvombaghe.
18 Namʉngaghalaghe,
ʉlwakʉva kughaala kupelela kuvomba inya soni,
ʉlwene mʉlongosivwaghe nʉ Mhepo ʉMwɨmɨke.
19 Nʉjʉnge amwɨmbɨlaghe ʉnʼjaake ɨSabuli,
inyɨmbo isa kʉmpaala ʉNgʉlʉve ni nyɨmbo isa mʉ moojo.
Mʉmwɨmbɨlaghe na kʉkʉmpaala ʉMʉtwa ʉYesu nʉ mwojo ghwinu ghwoni.
20 Mʉmhongesyaghe ʉNgʉlʉve ʉNhaata ifighono fyoni mʉ sooni,
mʉ lɨtavua lya Mʉtwa ghwitu ʉYesu Kɨlɨsite.
Ʉnʼdala nʉ mʉghoosi
21 Vanyalʉkolo vango,
mʉpʉlɨngʼhanaghe mʉlwa kʉmwoghopa ʉKɨlɨsite.
22 Ʉmue mwe vadala mʉvisaghe vakʉndi kʉ vaghoosi viinu,
ndavʉle kʉkʉnkʉnda ʉMʉtwa ghwitu ʉYesu.
23 Nɨjovile enendɨɨkɨ,
ʉlwakʉva ʉmʉghoosi alɨ nʉ vʉtavʉlɨlua kwa nʼdala ghwake,
ndavʉle ʉKɨlɨsite vʉle alɨ nʉ vʉtavʉlɨlua kʉ kɨpʉgha ɨkya vɨtɨki,
kange ghwe Mpoki ghwa kɨpʉgha ɨkio kɨno ghwe mʼbɨlɨ ghwake.
24 Lɨno,
mwe vadala mulondua kuuva vakʉndi kʉ vaghoosi viinu mʉ sooni,
ndavʉle ɨkɨpʉgha ɨkya vɨtɨki vʉle kɨkʉnkʉnda ʉKɨlɨsite.
25 Na jʉmue mwe vaghoosi mʉvaghanaghe avadala viinu,
ndavʉle ʉKɨlɨsite vʉle akɨghanile ɨkɨpʉgha ɨkya vɨtɨki,
kuhanga akafua vwɨmɨla ɨkɨpʉgha ɨkio.
26 Alyavombile ʉluo,
neke akɨvɨɨke kuuva kyɨmɨke na kʉkʉkɨvalasia na malenga agha lɨsio lya Ngʉlʉve.
27 Kange,
alyafwile kuuti aave nɨ kɨpʉgha kya vɨtɨki ɨkyɨmɨke ɨkɨnya vʉvaha,
ɨkɨsila nkole nambe ʉvʉviivi vʉmonga ndavʉle ʉvuo.
28 Enendɨɨkɨ ghwope ʉmʉghoosi ilondua kʉkʉmʉghana ʉnʼdala ghwake,
ndavʉle ɨkʉghʉghana ʉmʼbɨlɨ ghwake.
Jʉno ɨkʉmʉghana ʉnʼdala ghwake ikughana jʉjuo.
29 Nakwale jʉno ɨkʉghʉkalalɨla ʉmʼbɨlɨ ghwake,
looli ɨkʉghʉlɨsia na kʉkʉghʉlolelela,
ndavʉle ʉKɨlɨsite vʉle ɨkʉkɨvombela ɨkɨpʉgha ɨkya vɨtɨki,
30 ʉlwakʉva ʉsue tʉlɨ filʉngo fya mʼbɨlɨ ghwake.
31 Ndavʉle aMalembe aMɨmɨke vʉle ghiiti,
“Mʉ ʉluo,
ʉmuunhu ɨkʉmʉleka ʉviise nʉ ngʼina,
neke ivisagha nʉ nʼdala ghwake,
vavɨlɨ ava viiva mʼbɨlɨ ghʉmo.”a
32 Amasio agha ʉmʉlʉvo ghwake nakɨhʉʉgʉ kʉkʉghʉtangʼhania,
neke ʉne nijova vwɨmɨla ʉKɨlɨsite nɨ kɨpʉgha kya vɨtɨki.
33 Lɨno,
ʉmʉghoosi ghweni amʉghanaghe ʉnʼdala ghwake ndavʉle ikughana jʉjuo,
ghwope ʉnʼdala amwoghopaghe ʉmʉghoosi ghwake.