Ʉvʉmo mʉ kɨpʉgha ɨkya vɨtɨki
4
Lɨno,
ʉne ne jʉno nɨdindilue mʉ ndinde vwɨmɨla ʉMʉtwa ʉYesu,
nɨkʉvasʉʉma fiijo kuuti,
mukalaghe ndavʉle lʉnoghiile,
ʉlwakʉva mʉkemelilue nʉ Ngʉlʉve.
2 Mʉvisaghe nʉ lujisio,
mʉvisaghe vahʉʉgʉ,
mʉvisaghe nʉ lugudo na kusaghɨlanɨla mʉ lʉghano.
3 Mʉlolelelaghe fiijo ʉvʉmo vʉno mʉpelilue nʉ Mhepo ʉMwɨmɨke.
Ʉvʉmo ʉvuo mʉlolelelaghe mʉlwa kukala nʉ lʉtengaano.
4 Kweghʉle ʉmʼbɨlɨ ghʉmo,
ʉMhepo jʉmo ndavʉle vʉle tʉkemelilue kuuva mʉ lʉhʉvɨɨlo lʉmo.
5 Kange,
kwale ʉMʉtwa jʉmo,
ʉlwɨtɨko lʉmo,
ʉlwofugho lʉmo.
6 Kwale ʉNgʉlʉve jʉmo,
jʉno ghwe Nhaata ghwa vooni,
mʼbaha ghwa fyoni,
ivomba ɨmbombo mʉ vooni,
ikukala mʉ vaanhu vaake vooni.
“Ye atoghile kʉkyanya,
akaghomile avalʉgʉ vinga.
Akavapeela avaanhu vaake ʉlʉvonolo.”a
9 Lɨno,
ɨlɨsio lɨno liiti,
“Alyatoghile kʉkyanya,”
kwekʉti kɨki?
Kwekʉti,
alikile taasi paasi pa ɨɨsi.b
10 Lɨno,
jʉno alikile ghwe jʉno alyatoghile kʉkyanya fiijo kukila ʉvʉlanga vwoni kuuti aave kwoni.
11 ɄYesu ʉjuo ghwe jʉno alyavapeliile vamonga kuuva vasungʼhua,
avange kuuva vavɨli,
avange vadalɨki,
avange kuuva vadɨɨmi va fipʉgha fya vɨtɨki na vavʉlanɨsi.
12 Alyavapeliile ifipelua ifio kuuti vavalɨngʼhaniaghe avɨtɨki kuvomba ɨmbombo jaake,
neke ɨkɨpʉgha ɨkya vɨtɨki kɨno ghwe mʼbɨlɨ ghwa Kɨlɨsite kɨkangalaghe.
13 Ʉluo lufivombekagha kuhanga ʉsue tweni tʉʉve vʉmo mʉ lwɨtɨko na kʉkʉnkagʉla ʉMwana ghwa Ngʉlʉve,
neke tʉkangale mʉ moojo ghiitu na kuuva vakwɨlanɨfu ndavʉle ʉKɨlɨsite.
14 Pepano natupʉsanɨkagha ni mbʉlanɨsio isa vʉdesi hwene vaana mʉlwa kusyangua na vaanhu avasʉfu vano vikʉvasofia avange.
15 Looli tuvɨngɨlɨlagha ʉvwakyangʼhaani na kughanana,
neke tʉkʉle mʉ sooni,
tʉʉve ndavʉle ʉKɨlɨsite jʉno ghwe mʼbaha ghwa kɨpʉgha kya vɨtɨki.
16 Mwa mwene ʉmʼbɨlɨ ghʉlʉngiine na kukolana vwɨmɨla ifilʉngo.
Ifilʉngo ifio nɨkɨngɨ pano kivomba ɨmbombo kulɨngʼhana ni ngʉfu saake,
ʉmʼbɨlɨ ghukʉla,
ghusindamala mʉ lʉghano.
Amaghendele amapia mwa Yesu Kɨlɨsite
17 Lɨno,
nɨkʉvavʉʉla na kʉkʉvasimilisia mʉ ngʉfu sa Mʉtwa ʉYesu kuuti,
kuhʉma lɨno namʉngikalaghe ndavʉle avaanhu vano navikʉmwɨtɨka ʉNgʉlʉve.
Avaanhu avuo,
amasaaghe ghaave maviivi,
18 kange valɨ mʉ ngʼhiisi,
navakagwile ʉvwakyangʼhaani vwa Ngʉlʉve.
Avaanhu avuo vavɨkilue patali nʉ vwʉmi vʉno ʉNgʉlʉve ɨkʉvapeela avaanhu vaake,
ʉlwakʉva vasiiti kukwɨtɨka.
19 Navivona soni,
aveene vivwafuka na kuvomba imbombo inyali sino sili papinga.
Vilonda fiijo kuvomba isio.
20 Neke ʉmue namʉlyamanyiile enendɨɨkɨ mʉ mhola isa Kɨlɨsite.
21 Ʉmwene ghwe kɨvʉmbʉko ɨkya vwakyangʼhaani.
Nɨkagwile kuuti mʉlyapʉliike na kuvʉlanɨsɨvua imhola saake.
22 Mʉlyamanyiile kʉkʉghaleka amaghendele ghiinu ghano mʉlyale nagho ʉlʉtasi,
kwekʉti ʉlʉveelo lwinu ʉlʉkʉʉlʉ lʉno lwavasofyagha vwɨmɨla kuvɨngɨlɨla ʉvʉnoghelua ʉvʉviivi ʉvʉnya kʉvasyanga.
23 ɄMhepo ghwa Ngʉlʉve avandʉlaghe amasaaghe ghiinu ghavisaghe mapia.
24 Mʉvisaghe nʉ lʉveelo ʉlʉpia lʉno ʉNgʉlʉve alyapelile mʉ kɨhwani kyake,
ʉlʉveelo ʉluo lukuhʉfia mʉ vʉgholofu,
na mʉ vwɨmɨke ʉvwa kyangʼhaani.
25 Lɨno,
mʉvʉlekaghe ʉvʉdesi,
nʉjʉnge amʼbʉlaghe ʉnʼjaake ʉvwakyangʼhaani,
ʉlwakʉva ʉsue tweni tʉlɨ filʉngo mʉ mʼbɨlɨ ghʉmo.c
26 Nave mʉkaliile,
mʉlekaghe kuuti ɨngʼhalaasi jiinu jɨvapelele kuvomba inyɨvi.d
Mʉlekaghe pijigha nɨ ngʼhalaasi ʉnsiki ghwoni.
27 Namʉnganʼdindulilaghe ʉmʉlyango ʉSetano.
28 Ʉmʉlyasi,
naangahɨjaghe kange,
looli aghimbaghe jʉjuo kuvomba ɨmbombo ɨnofu,
neke aave ni fiinu ifya kʉntanga ʉmwene na jʉno aghilue.
29 Namʉngajovaghe amasio amaviivi,
looli mʉjovaghe amasio amanofu agha kʉvatanga avange kuuti pano vipʉlɨka,
vavʉmbʉlɨlaghe.
30 Namʉngavombaghe sino sikʉmpelela ʉMhepo ʉMwɨmɨke ʉghwa Ngʉlʉve asukunale,
ʉlwakʉva ʉMhepo ʉjuo,
kye kɨvalɨlo kya Ngʉlʉve kʉlyʉmue,
kuuti mʉlɨ vaanhu vaake kuhanga ɨkɨghono kɨno ʉNgʉlʉve ilikʉvavanga.
31 Lɨno,
mʉlekaghe ɨlyojo,
ɨngʼhalaasi,
ɨlyovo,
amaligho nʉ vʉviivi vwoni vʉno vʉlɨ papinga.
32 Looli nʉjʉnge amʼbombelaghe ʉnʼjaake inofu,
mʉvonelanɨlaghe ɨkɨsa na kusaghɨlana ndavʉle ʉNgʉlʉve vʉle alyavasaghiile ʉmue vwɨmɨla ʉKɨlɨsite.