Ɨmbombo ɨja Paulo kʉ vano naVayahudi
3
Mʉ ʉluo,
ʉne ne Paulo nɨdindilue mʉ ndinde vwɨmɨla kupʉlɨsia imhola isa Yesu Kɨlɨsite kʉlyʉmue mwe vano namʉlɨ Vayahudi.
2 Nɨkagwile mʉpʉliike kuuti ʉNgʉlʉve mʉ lʉsʉngʉ lwake,
alyamheliile ɨmbombo ɨja kʉpʉlɨsia ɨMhola ɨNofu kʉlyʉmue.
3 ɄNgʉlʉve alyahʉfisie ʉne ʉvʉtavɨke vwake ʉvwa kʉ vʉsyefu,
ndavʉle nɨtalile pikʉvalembela mʉ masio amadebe ɨmhola ɨjio.a
4 Mʉngɨmbe amasio aghuo,
kyamukagʉla kuuti ʉvʉsyefu vwɨmɨla ʉKɨlɨsite,
nɨvʉtangʼhinie vʉnono.
5 Kuhʉma mʼbʉkʉʉlʉ ʉNgʉlʉve naalyavavʉlile avaanhu ʉvʉsyefu ʉvuo,
neke pambele kukilila ʉMhepo ʉMwɨmɨke akavavʉʉla avasungʼhua vaake avɨmɨke na vavɨli.
6 Ʉvʉsyefu ʉvuo vwe ʉvʉ:
Avaanhu vano naVayahudi viiva vaana va Ngʉlʉve palɨkɨmo na Vayahudi vwɨmɨla kukwɨtɨka ɨMhola ɨNofu,
viiva filʉngo fya mʼbɨlɨ ghʉmo.
Kange,
mwa Yesu Kɨlɨsite,
vano naVayahudi voope vikwʉpɨla sino ʉNgʉlʉve alyavalaghile kʉkʉvapeela aVayahudi.
7-8 ɄNgʉlʉve alyamheliile ɨmbombo ɨja kʉpʉlɨsia ɨMhola ɨNofu kʉ vaanhu vano naVayahudi.
ƗMhola ɨjio jɨlɨ nʉ vʉmofu mwa Yesu Kɨlɨsite,
ʉvʉmofu ʉvwa kʉdegha ʉvʉsila kɨghelelo.
Alyamheliile ʉne nambe nanɨnoghiile mʉ vɨmɨke vooni,
ʉmwene alyavombile ʉluo mʉ lʉsʉngʉ ni ngʉfu saake.
9 Alyamheliile ɨmbombo ɨja kʉvavʉʉla avaanhu vooni ʉvʉtavɨke vwake ʉvwa kʉ vʉsyefu vʉle vuvombeka.
ɄNgʉlʉve ʉjuo ʉmpela fyoni,
alyavɨkile ʉvʉtavɨke ʉvuo kuhʉma mʼbʉkʉʉlʉ.
10 Alyavombile ʉluo kuuti,
kukilila ɨkɨpʉgha ɨkya vɨtɨki,
avahʉfie avanya vʉtavʉlɨlua na vanya ngʉfu kʉkyanya vʉle ʉmwene alɨ nʉ vʉkagʉsi vʉno vʉlɨ papinga.
11 Ʉvuo vwale vwe vʉfumbue vwake kuhʉma mʼbʉkʉʉlʉ vʉno alyakwɨlanisie mwa Mʉtwa ghwitu ʉYesu Kɨlɨsite.
12 Ʉlwakʉva tʉlɨ mwa Yesu Kɨlɨsite,
kange tʉkʉmwɨtɨka ʉmwene,
ʉluo lʉkʉtʉpelela kuuva nʉ lʉhʉvɨɨlo na kuveela pamaaso gha Ngʉlʉve kɨsila vwoghofi.
13 Lɨno,
nisʉʉma namʉngadendevʉkaghe vwɨmɨla imhumuko sino nikwʉpɨla vwɨmɨla ʉmue.
Mughiniaghe,
ʉlwakʉva imhumuko isio lʉvʉmbʉlɨlo lwinu.
ɄPaulo ɨkʉvasʉmɨla avɨtɨki ava kʉ Efeso
14 Mʉ isio sooni,
nifughama pamaaso gha Nhaata kʉkʉvasʉmɨla ʉmue.
15 ɄNgʉlʉve ghwe Mpeli ghwa fyoni,
ifya kʉkyanya na pa ɨɨsi.b
16 Nɨkʉnsʉʉma kuuti,
mʉ vʉmofu vwa vʉvaha vwake,
avapeele ingʉfu kukilila ʉMhepo ghwake,
mʉsindamale amoojo ghiinu.
17 Nɨkʉnsʉʉma kuuti vwɨmɨla ʉlwɨtɨko lwinu,
ʉKɨlɨsite ikalaghe mʉ moojo ghiinu.
Nɨkʉvasʉmɨla mʉʉve ni ngʉfu isa kwɨma vʉnofu mʉ lʉghano.
18 ɄNgʉlʉve avapelaghe ʉmue palɨkɨmo na vɨmɨke vooni ingʉfu isa kʉkagʉla vʉle ʉKɨlɨsite atʉghanile mʉ lʉghano ʉlʉsila kɨghelelo.
19 Kange,
nisʉʉma mʉkagʉle kuuti,
ʉlʉghano lwa Kɨlɨsite lʉvaha kukila ʉvʉkagʉsi ʉvwa vaanhu vooni,
mʉʉve vakwɨlanɨfu ndavʉle ʉNgʉlʉve.