ɄNgʉlʉve ɨkʉtʉpoka mʉ lʉsʉngʉ lwake
2
Ʉlʉtasi ʉmue mʉlyale vafue vwɨmɨla ʉvʉhosi ni nyɨvi siinu.
2 Ʉnsiki ʉghuo mʉlyale muvɨngɨlɨla amaghendele agha mʉ ɨɨsi ɨjɨ,
na kʉkʉmʼbɨngɨlɨla ʉSetano ʉmʼbaha ghwa mapepo jʉno ifighono ifi itema avaanhu vano navikʉnkʉnda ʉNgʉlʉve.
3 Na jʉsue tweni ʉlʉtasi tʉlyale ndavʉle aveene,
tʉkavɨngɨlɨlagha ʉvʉnoghelua ʉvwa mʼbɨlɨ,
tʉkavombagha sino sihovosia amavɨlɨ na moojo ghiitu.
Mʉ ʉluo natwale tukuluka ʉlʉkwegho lwa Ngʉlʉve ndavʉle avange vooni.
4 Neke ʉNgʉlʉve nya lʉsʉngʉ,
alyatʉghanile fiijo.
5 Nambe tʉlyale vafue vwɨmɨla ʉvʉhosi vwitu,
akatʉsyʉsia kuuva vʉʉmi palɨkɨmo nʉ Kɨlɨsite,
kwekʉti ʉNgʉlʉve atʉpokile mʉ lʉsʉngʉ lwake.
6 Alyatʉsyʉsisie palɨkɨmo nʉ Yesu Kɨlɨsite,
na kʉkʉtʉvɨɨka kuuva palɨkɨmo nʉ Kɨlɨsite ʉjuo mʉ Vʉtwa vwake kʉkyanya.
7 Alyavombile ʉluo kuuti,
ahʉfie kʉ fisina fyoni fino fikwisa pambele ʉlʉsʉngʉ lwake ʉlʉvaha fiijo lʉno alyatʉpeliile mʉ vʉkoola vwake mwa Yesu Kɨlɨsite.
8 ɄNgʉlʉve avapokile mʉ lʉsʉngʉ lwake vwɨmɨla ʉlwɨtɨko.
Ʉlwɨtɨko ʉluo lʉvonolo kuhʉma kwa Ngʉlʉve,
naluhʉma mʉ ngʉfu siinu.
9 Namʉpelilue ʉvʉpoki vwɨmɨla amaghendele ghiinu amanofu,
ʉmuunhu ghweni naangighiniaghe.
10 Ʉsue tʉpelilue nʉ Ngʉlʉve.
Ʉmwene atʉpelile vʉpia mwa Yesu Kɨlɨsite kuuti tʉvisaghe na maghendele amanofu ghano alyatʉlɨngʼhanɨkisie kuhʉma mʼbʉkʉʉlʉ,
kuuti amaghendele aghuo ghe tʉvɨngɨlɨlaghe.
Avɨtɨki vooni valɨngʼhiine mwa Kɨlɨsite
11 Lɨno,
ʉmue mwe vano namʉlɨ Vayahudi,
mʉkʉmbʉkaghe vʉle ʉlʉtasi mʉlyale mutambʉlua na Vayahudi kuuti,
“Namʉvombilue ɨkɨvʉngo ɨkya kʉdumula ɨngola ɨja kɨdɨɨmi,”a
neke aveene vakighiniagha kuuti,
“Vavombilue ɨkɨvʉngo,”
kwekʉti vavombilue ɨkɨvʉngo mʉ mavɨlɨ ghaave.
12 Ʉnsiki ʉghuo namʉlyankagwile ʉKɨlɨsite,
mʉlyale vapooma kʉ Vaisilaeli.
Ʉmue namʉlyale mʉ fingob sa Ngʉlʉve sino alyavalaghile avaanhu vaake,
aVaisilaeli.
Mʉlyale mukukala kɨsila lʉhʉvɨɨlo nambe kʉkʉnkagʉla ʉNgʉlʉve.
13 Neke lɨno mʉlwa kuuva mwa Yesu Kɨlɨsite,
ʉmue mwe vano mʉlyale patali nʉ Ngʉlʉve,
mʉlɨ piipi nʉ Ngʉlʉve vwɨmɨla ɨdanda ja Kɨlɨsite jɨno jɨlyakungʼiike pa kɨkovekano.
14 ɄKɨlɨsite jʉjuo ghwe jʉno aletile ʉlʉtengaano,
avakongʼhanisie aVayahudi na vano naVayahudi kuuva kɨɨnu kɨmo.
Vwɨmɨla kufua kwa mwene pa kɨkovekano,
alyavʉsisie kɨno kɨlyavaghavinie na kʉkʉvapelela kuuva valʉgʉ.
15 Alyavʉsisie indaghɨlo isa Kɨyahudi palɨkɨmo ni fivʉngo fyake,
kuuti avaanhu ava fisina fivɨlɨ,
kwekʉti aVayahudi na vano naVayahudi kuuva kɨsina kɨmo ɨkɨpia mwa Kɨlɨsite.
Mʉ ʉluo akaleeta ʉlʉtengaano.
16 Vwɨmɨla kufua kwa mwene pa kɨkovekano,
alyavʉsisie lwoni ʉvʉlʉgʉ vwave,
akavavɨɨka avaanhu ava fisina fivɨlɨ kuuva kɨsina kɨmo,
akavasambania nʉ Ngʉlʉve.
17 Alisile kupʉlɨsia ɨMhola ɨNofu ɨja lʉtengaano kʉlyʉmue mwe vano namʉlɨ Vayahudi,
kwekʉti mwe vano mʉlyale patali nʉ Ngʉlʉve;
na kʉ Vayahudi,
kwekʉti vano valyale piipi nʉ Ngʉlʉve.
18 Ʉlwakʉva vwɨmɨla ʉKɨlɨsite,
ʉsue tweni tʉpelilue ɨsɨla ɨja kʉveela pamaaso gha Nhaata mʉ lʉtango ʉlwa Mhepo jʉla jʉla jʉmo.
19 Lɨno,
ʉmue mwe vano namʉlɨ Vayahudi,
namʉlɨ vahesia nambe vakilasɨla.
Looli mʉlɨ vanya kaaja,
mʉlɨ vamo na vɨmɨke,
mʉlɨ vaanhu va Ngʉlʉve.
20 Ʉmue mʉlɨ nyumba jɨno jɨjengilue pa lwalo lʉno ve vasungʼhua na vavɨli,
ʉYesu Kɨlɨsite ghwe lɨvue ɨlɨvaha ɨlya pa nguto.c
21 Mwa Yesu ɨnyumba jooni jɨlʉnganɨsivue vʉnofu na kuuva mbaha,
kuuti jɨɨve nyumba nyɨmɨke ɨja kufunyila,
jɨno jɨmikue kwa Mʉtwa ʉYesu.
22 Lɨno,
na jʉmue mwe vano namʉlɨ Vayahudi,
mʉjengilue palɨkɨmo na Vayahudi kuuva nyumba ja kukala ʉNgʉlʉve.
ɄNgʉlʉve ikukala mʉlyʉmue kukilila ʉMhepo ghwake.