Ɨkalata ɨja Paulo kʉ
Vaefeso
Ʉlʉhʉngɨlo
1
Ɨkalata ɨjɨ jɨhʉmile kʉlyʉne ne Paulo,
ne jʉno ʉNgʉlʉve angʼhemelile mʉ vughane vwake kuuva nsungʼhua ghwa Yesu Kɨlɨsite.
Nɨkʉvalembela ʉmue mwe vɨmɨke,
mwe vano mʉkʉmwɨtɨka vʉnofu ʉYesu Kɨlɨsite,
mwe vano mukukala mʉ lɨkaaja ɨlya Efeso.a
2 Ʉlʉsʉngʉ nʉ lʉtengaano kuhʉma kwa Ngʉlʉve ʉNhaata ghwitu na kwa Mʉtwa ʉYesu Kɨlɨsite,
fivisaghe numue.
Inyifuunyo isa Ngʉlʉve mwa Yesu Kɨlɨsite
3 Aghinwaghe ʉNgʉlʉve,
ʉNhaata ghwa Mʉtwa ghwitu ʉYesu Kɨlɨsite!
Nijova ʉluo,
ʉlwakʉva mwa Kɨlɨsite atʉfunyile mʉ moojo ghiitu ni nyifuunyo sooni kuhʉma kʉkyanya.
4 ɄNgʉlʉve ye akyale kupela ɨɨsi,
alyatʉsalwile kuuva vaanhu vaake vwɨmɨla ʉYesu Kɨlɨsite.
Alyavombile ʉluo kuuti tʉʉve vɨmɨke,
vasila nkole pamaaso ghaake.
Mʉ lʉghano lwake
5 alyalamwile kuhʉma mʼbʉkʉʉlʉ kʉkʉtʉvɨɨka kuuva vanaake vwɨmɨla ʉYesu Kɨlɨsite.
Alyavombile enendɨɨkɨ nʉ lʉkeelo mʉ vughane vwake.
6 Lɨno,
alʉmbwaghe ʉNgʉlʉve vwɨmɨla ʉlʉsʉngʉ lwake ʉlwa kʉdegha lʉno atʉpeliile vwɨmɨla ʉMwanaake ʉmʉghanɨke.
7 Ʉlwakʉva vwɨmɨla ɨdanda ɨja Kɨlɨsite jɨno jɨlyakungʼiike pa kɨkovekano,
ʉsue tʉvangilue,
kwekʉti tʉpyanilue inyɨvi siitu.
Ʉluo luvonia ʉvʉvaha ʉvwa lʉsʉngʉ lwake
8 lʉno atʉpeliile palɨkɨmo nʉ lʉhala nʉ vʉkagʉsi vwoni.
9 Atʉvʉlile ʉvʉtavɨke vwake vʉno vʉlyale kʉ vʉsyefu.
Ʉvʉtavɨke ʉvuo vwe vʉno alyafumbilue mʉ vughane vwake kuhʉma mʼbʉkʉʉlʉ,
kuuti ilivomba kukilila ʉKɨlɨsite.
10 Ʉvʉtavɨke vʉno vulivombeka ʉnsiki pano ghʉfikile vwe ʉvʉ:
Ilikongʼhania ifiinu fyoni ifya kʉkyanya ni fya pa ɨɨsi,
kuuva mʉ vʉtavʉlɨlua vwa Kɨlɨsite.
11 ɄNgʉlʉve atʉsalwile ʉsue kuhʉma mʼbʉkʉʉlʉ kuuva vaanhu vaake mʉlwa kuuva mwa Kɨlɨsite.
Ʉmwene ivomba sooni kulɨngʼhana nʉ vughane vwake.
12 Alyavombile ʉluo kuuti kukilila ʉsue twe Vayahudi,
twe vano tʉlɨ vatasi kʉkʉmhʉvɨɨla ʉKɨlɨsite,
tʉmʉlʉmbaghe ʉNgʉlʉve vwɨmɨla ʉvʉvaha vwake!
13 Na jʉmue mwe vano namʉlɨ Vayahudi,
ye mʉpʉliike ɨmhola ɨja kyangʼhaani,
kwekʉti ɨMhola ɨNofu ɨja vʉpoki,
mʉkamwɨtɨka ʉKɨlɨsite.
Ghwope ʉNgʉlʉve akavapeela ʉMhepo ʉMwɨmɨke.
ɄNgʉlʉve alyavalaghile kuuti,
ʉMhepo ʉjuo kye kɨvalɨlo ɨkya kʉvonia kuuti mʉlɨ vaanhu vaake.
14 ɄNgʉlʉve avɨkiile ʉMhepo ghwake hwene lʉhombo lʉlongosi kuhʉfia kuuti,
ilikʉvavanga avaanhu vaake lwoni.
Tʉmʉlʉmbaghe vwɨmɨla ʉvʉvaha vwake.
ɄPaulo ɨkʉvasʉmɨla aVaefeso
15 Mʉ isio sooni sino ʉNgʉlʉve avavombiile ʉmue,
palɨkɨmo ni mhola sino nɨpʉliike isa lwɨtɨko lwinu mwa Mʉtwa ʉYesu,
nʉ lʉghano lwinu kʉ vɨmɨke vooni,
16 nanivʉhɨɨla kʉkʉmhongesia ʉNgʉlʉve vwɨmɨla ʉmue pano nikufuunya kwa Ngʉlʉve.
17 Nɨkʉnsʉʉma ʉNgʉlʉve ghwa Mʉtwa ghwitu ʉYesu Kɨlɨsite,
ʉNhaata ʉnya vʉvaha,
avapelaghe ʉMhepo ghwake kuuti mʉʉve nʉ vʉkagʉsi na kʉkʉntangʼhania vʉnono ʉNgʉlʉve.
18 Kange,
nɨkʉnsʉʉma ʉNgʉlʉve kuuti avamulike mʉ moojo ghiinu,
neke mʉkagʉle vʉnofu ʉlʉhʉvɨɨlo lwinu mʉ sino avakemeliile,
mʉkagʉle ʉvʉmofu ʉvwa nyifuunyo sino avavɨkiile avaanhu vaake.
19 Kange,
mʉkagʉle ingʉfu saake imbaha fiijo vʉle sivomba ɨmbombo nkate mʉlyʉsue twe vɨtɨki.
Ingʉfu isio silɨngʼhiine ni ngʉfu saake imbaha fiijo
20 sino alyansyʉsɨkisie ʉKɨlɨsite kuhʉma kʉ vafue,
akamʼbɨɨka kuuva nʉ vʉtavʉlɨlua palɨkɨmo nʉ mwene kʉkyanya.
21 Mʉ ʉluo ʉKɨlɨsite mʼbaha kʉ fyoni:
kʉ vʉtwa vwoni,
kʉ vavaha vooni ni ngʉfu sooni.
Alɨ nʉ vʉtavʉlɨlua mʉ ɨɨsi ɨjɨ na kʉvʉsila kʉsila.
22 ɄNgʉlʉve ampeliile ʉKɨlɨsite ʉvʉtavʉlɨlua mʉ fiinu fyoni na kʉkʉmʼbɨɨka kuuva Mʼbaha ghwa kɨpʉgha ɨkya vɨtɨki.
23 Ɨkɨpʉgha ɨkya vɨtɨki ghwe mʼbɨlɨ ghwa Kɨlɨsite,
kikwɨlanɨsɨvua nʉ Kɨlɨsite jʉno ikwɨlanɨsia ifiinu fyoni,
imbale sooni.