Avapaafi na vaana
6
Ʉmue mwe vaana,
mʉvisaghe vakʉndi kʉ vapaafi viinu ndavʉle lulondua mwa Mʉtwa ʉYesu,
ʉlwakʉva ʉluo lwe lʉno lulondua kuvombua.
2 “Ʉmwoghopaghe ʉvaaso nʉ mamaajo,”
ʉlʉlaghɨlo ʉlʉ lwe lwa kwanda lʉno nkate mʉ lwene,
ʉNgʉlʉve alaghile ʉlufuunyo lʉno lwiti,
3 “Ghwʉpɨle inyifuunyo na kukukala ifighono finga pa ɨɨsi apa.”a
4 Na jʉmue vakɨnhaata,
namʉngavakalasyaghe avaana viinu,
ʉlwene mʉvasʉngaghe vʉnofu mʉlwa kʉvavʉlanɨsia imbʉlanɨsio isa Mʉtwa ʉYesu.
Avatwa na vakami
5 Na jʉmue mwe vakami,
mʉvisaghe vakʉndi kʉ vatwab viinu ava pa ɨɨsi apa.
Mʉvisaghe vakʉndi mʉlwa kʉvoghopa nʉ mwojo ghwoni,
ndavʉle mʉkʉnkʉnda ʉKɨlɨsite.
6 Namʉngavombaghe isio pa pano vikʉvaagha neke mʉvahovosie,
looli mʉvombaghe nʉ mwojo ghwoni ndavʉle ikeela ʉNgʉlʉve,
ʉlwakʉva ʉmue mʉlɨ vavombi va Kɨlɨsite.
7 Mʉvombaghe nʉ mwojo ʉmʼbalafu,
hwene mʉkʉmʼbombela ʉNgʉlʉve,
namʉngavombaghe hwene mʉkʉmʼbombela muunhu.
8 Pano muvomba isio mʉkagʉlaghe kuuti,
ʉMʉtwa ʉYesu ɨkʉmpeela ʉlʉvonolo ʉmuunhu ghweni vwɨmɨla ɨmbombo jaake ɨnofu,
aave nkami nambe aave mwavʉke.
9 Na jʉmue mwe vatwa,
mʉvavombelaghe vʉnofu avakami viinu.
Namʉngavoghofyaghe,
mʉkʉmbʉkaghe kuuti ʉmue na vakami viinu mʉlɨ nʉ Ntwa jʉmo kʉkyanya,
ʉmwene ɨkʉvavombela vooni mʉ vwakyangʼhaani,
naisalʉla muunhu.
Ifilwɨlo ifya kʉmʉlefia ʉSetano
10 Lɨno,
mʉkangalaghe mwa Mʉtwa ʉYesu na mʉ ngʉfu saake.
11 Ndavʉle ʉnsikali vʉle ifwala ifilwɨlo,
mʉvisaghe ni filwɨlo fyoni fino ɨkʉvapeela ʉNgʉlʉve kuuti mʉmʉlefie ʉSetano nʉ vʉsʉfu vwake.
12 Mʉvombaghe enendɨɨkɨ,
ʉlwakʉva ʉsue natulua ɨlɨlʉgʉ na vaanhu,
looli tulua nʉ vʉtwa ʉvwa mapepo ni ngʉfu saake,
tulua na vavaha ni ngʉfu isa mipepo imilamafu mʉ ɨɨsi jɨno najivoneka na maaso.
13 Lɨno,
mʉkolaghe ifilwɨlo fyoni fino avapeliile ʉNgʉlʉve,
kuuti ɨkɨghono ɨkya vʉhosi kɨngafike,
mʉmʉlefie ʉmʉlʉgʉ ghwinu.
Neke kyande mulɨngʼhanisie lwoni na kulua ɨlɨlʉgʉ,
musindamala.
14 Mʉvisaghe mulɨngʼhanisie:
Ʉvwakyangʼhaani vʉvisaghe ndavʉle ʉlʉkova lʉno ipinya ʉnsikali mʉ nsana,
ʉvʉgholofu vʉvisaghe ndavʉle kɨno ʉnsikali ifwala kukusigha pa kɨfuva.
15 Kange,
ndavʉle ʉnsikali vʉle ifwala indatu kukulɨngʼhania kulua ɨlɨlʉgʉ,
enendɨɨkɨ fye mʉhʉvɨlaghe ɨMhola ɨNofu ɨja lʉtengaano kʉkʉvatanga kulua ɨlɨlʉgʉ nʉ Setano.
16 Palɨkɨmo nisio sooni,
ʉlwɨtɨko lʉvisaghe je ngʉla jiinu,
kuuti musighe imhalala sooni injodole isa Mhosi jʉla.
17 Mwʉpɨle ʉvʉpoki,
vʉvisaghe ndavʉle ɨkofili ɨja kyʉma jɨno ifwala ʉnsikali kukusigha kʉ mutu;
kange mwʉpɨle ɨlɨsio lya Ngʉlʉve kuhʉma kwa Mhepo ʉMwɨmɨke,
lɨvisaghe ndavʉle ɨbamba ɨja kʉlwɨla ɨlɨlʉgʉ.
18 Mʉnsʉmaghe ʉNgʉlʉve ʉnsiki ghwoni mʉlwa kʉlongosivua nʉ Mhepo ʉMwɨmɨke.
Mʉvisaghe maaso,
mʉsʉmaghe kɨsila kʉkatala na kʉkʉvasʉmɨla avɨmɨke vooni.
19 Kange,
mʉsʉmɨlaghe na jʉʉne kuuti pano nipʉlɨsia,
ʉNgʉlʉve amheele amasio agha kʉjova,
nɨpʉlɨsie ʉvʉsyefu ʉvwa Mhola ɨNofu ɨja Yesu Kɨlɨsite,
kɨsila vwoghofi.
20 Ʉne nɨlɨ nsungʼhua ghwa Ngʉlʉve vwɨmɨla kupʉlɨsia ɨMhola ɨjio.
Ɨmbombo ɨjio je jɨno jɨmheleliile kuuva mʉ ndinde,
mʉsʉmɨlaghe kuuti nɨpʉlɨsyaghe ndavʉle lulondua kɨsila vwoghofi.
Amasio agha kʉhwesia
21 Ʉnyalʉkolo ghwitu ʉmʉghanɨke ʉTikiko,
ʉmʼbombi ʉnnofu ghwa Mʉtwa,
kyaɨkʉvavʉʉla imhola sango sooni ni mbombo sino nighendelela kuvomba.
22 Nɨkʉnsuungʼha kʉlyʉmue,
kuuti iise avavʉʉle imhola siitu na kʉkʉvanyamasia amoojo ghiinu.