Ʉvwavʉke ʉvwa mwɨtɨki
5
ɄKɨlɨsite atʉvangile kuuti tʉʉve vavʉke.
Mʉ ʉluo mʉsindamalaghe mʉ lwɨtɨko,
namʉngɨtɨkaghe kange kuuva vakami va ndaghɨlo.
2 Pʉlɨkɨsia!
Ʉne ne Paulo nɨkʉvavʉʉla niiti,
nave mukwɨtɨka kuvombelua ɨkɨvʉngo mʉlwa kʉdumulua ɨngola ɨja kɨdɨɨmi,
neke mʉvalɨlue ʉvʉgholofu pamaaso gha Ngʉlʉve,
apuo muuva mʉgomwike kuuva vakami va ndaghɨlo.
Mʉ ʉluo ɨmbombo jɨno avombile ʉKɨlɨsite jiiva sila lʉvʉmbʉlɨlo kʉlyʉmue.
3 Nɨkʉvavʉʉla kange kuuti,
nave ʉmuunhu ikwɨtɨka kuvombelua ʉluo,
pe agadɨlɨlaghe indaghɨlo sooni isa Moose.
4 Nave muhʉvɨɨla kuvalɨlua kuuva vagholofu vwɨmɨla kuvɨngɨlɨla indaghɨlo,
muuva mubaghwile jʉmue kwa Kɨlɨsite na kuuva patali nʉ lʉsʉngʉ lwa Ngʉlʉve.
5 Neke ʉsue,
mʉ ngʉfu isa Mhepo ghwa Ngʉlʉve tuhʉvɨɨla kuvalɨlua ʉvʉgholofu vwɨmɨla kʉkʉmwɨtɨka ʉYesu.
6 Ʉlwakʉva nave tʉlɨ mwa Yesu Kɨlɨsite,
kuvombelua ɨkɨvʉngo mʉlwa kʉdumulua ɨngola ɨja kɨdɨɨmi,
nambe kuleka kuvombelua ɨkɨvʉngo ɨkio,
nakukwandʉla kɨmonga,
ɨkɨvaha kʉkʉmwɨtɨka ʉKɨlɨsite.
Ʉlwɨtɨko ʉluo luvoneka mʉlwa kʉmʉghana ʉNgʉlʉve na vaanhu vooni.
7 Ʉlʉtasi mʉlyale vavɨngɨlɨli vanofu va Kɨlɨsite!
Lɨno,
ghwe veeni jʉno avasyangile mʉleke kukʉnda ʉvwakyangʼhaani?
8 Ʉmuunhu jʉno avakovile kuvomba isio,
naasungʼhilue nʉ Ngʉlʉve jʉno avakemelile ʉmue.
9 Imbʉlanɨsio isa vʉdesi isio sisyanga vinga,
lʉlɨ ndavʉle ʉlʉjovo lʉno luuti,
“Ɨkɨlʉle ɨkɨdebe kilʉsia ɨlɨkandua lyoni.”
10 Nɨlɨ nsila nganighani vwɨmɨla ʉmue,
ʉMʉtwa ʉYesu amheliile ʉlʉhʉvɨɨlo kuuti namʉngʉpɨle imbʉlanɨsio isa vʉdesi.
Neke ʉmuunhu ghweni jʉno ɨkʉvasyanga ʉmue,
nambe aave ghwe veeni,
kyangʼhaani ilikwʉpɨla ʉlʉkwegho lwa Ngʉlʉve.
11 Vanyalʉkolo vango,
avaanhu vamonga viiti,
ʉne nipʉlɨsia kuuti avaanhu vavombelwaghe ɨkɨvʉngo mʉlwa kʉdumulua ɨngola ɨja kɨdɨɨmi.
Nave lweli nipʉlɨsia enendɨɨkɨ,
kɨki aVayahudi vikʉmhumusia?
Nale nɨjovaghe ʉluo,
kupʉlɨsia ɨmhola ɨja vʉpoki vwɨmɨla ɨkɨkovekano kya Yesu,
ngale nalʉkʉvakalasia aveene.
12 Avaanhu vano vikʉvahasɨngʼhania vwɨmɨla kuvombelua ɨkɨvʉngo mʉlwa kʉdumulua ɨngola ɨja kɨdɨɨmi,
hɨmbe ngale vidumula lwoni amavɨlɨ ghaave agha kɨdɨɨmi.
13 Vanyalʉkolo vango,
ʉNgʉlʉve avakemelile kuuti mʉʉve vavʉke.
Neke namʉngavombaghe isa vʉnoghelua vwa mʼbɨlɨ mʉ kɨteghe ɨkya kuuti mʉlɨ vavʉke,
ʉlwene nʉjʉnge amʼbombelaghe ʉnʼjaake mʉ lʉghano.
14 Ʉlwakʉva indaghɨlo sooni isa Moose sikwɨlanɨsɨvua mʉ lʉlaghɨlo lʉmo lʉno luuti,
“Ʉmʉghanaghe ʉnnino ndavʉle ghukughana jʉʉve.”a
15 Neke nave namukulolelela,
kulua na kulemasania,
ndepoonu kʉkʉvapelela kumalana jʉmue.
Kulongosivua nʉ Mhepo ʉMwɨmɨke
16 Lɨno nɨkʉvavʉʉla niiti,
mʉlongosivwaghe nʉ Mhepo ʉMwɨmɨke,
pe namuvombagha isa vʉnoghelua vwa mʼbɨlɨ.
17 Ʉlwakʉva ʉvʉnoghelua vwa mʼbɨlɨ navukwɨtɨngʼhana na sino ilonda ʉMhepo ʉMwɨmɨke,
sino ilonda ʉMhepo ʉMwɨmɨke nasikwɨtɨngʼhana nʉ vʉnoghelua vwa mʼbɨlɨ.
Ʉmʼbɨlɨ nʉ Mhepo ʉMwɨmɨke nafikwɨtɨngʼhana lwoni.
Mʉ ʉluo namʉngavombe sino mulonda kuvomba.
18 Neke nave mulongosivua nʉ Mhepo ʉMwɨmɨke,
namʉlɨ vakami va ndaghɨlo.
19 Imbombo sa muunhu jʉno ilongosivua nʉ vʉnoghelua vwa mʼbɨlɨ,
sikagʉlɨka.
Imbombo isio se isi:
ʉvʉvwafu,
ʉvʉghendamwalu,
ʉvʉnoghelua vwa kʉvwafuka,
20 kukwɨmɨka amangʉlʉve,
ʉvʉhavi,
ʉvʉlʉgʉ,
amabaatu,
ɨkɨvini,
ɨngʼhalaasi,
kukwilana,
kukanɨngʼhana,
kubaghʉlana,
21 ɨgiila,
ʉvʉghaasi,
ifikulukulu ifya kʉlia na kunyua kyongo,
ni singi sooni sino silɨngʼhiine nisio.
Ndavʉle nɨlyatalile kʉkʉvavʉʉla,
nɨkʉvavʉʉla kange niiti,
avaanhu vano vivomba isio,
navalingila mʉ Vʉtwa vwa Ngʉlʉve.
22 Neke nave tulongosivua nʉ Mhepo ʉMwɨmɨke,
ʉmwene ɨkʉtʉpelela kuuva:
nʉ lʉghano,
nʉ lʉkeelo,
nʉ lʉtengaano,
nʉ lugudo,
nʉ vʉkoola,
nʉ vʉpeesi,
kuvomba mʉ vwakyangʼhaani,
23 kuuva nʉ vʉhʉʉgʉ na kukulolelela.
Nakwelʉle ʉlʉlaghɨlo nambe lʉmo lʉno lukaana isio.
24 Avaanhu vano valɨ mwa Yesu Kɨlɨsite,
vakomeliile pa kɨkovekano amavɨlɨ ghaave na masaaghe ghaake nʉ vʉnoghelua vwake ʉvʉviivi.
25 Lɨno,
ʉlwakʉva tʉlɨ nʉ Mhepo ʉMwɨmɨke,
tʉkʉndaghe kulongosivua nʉ mwene.
26 Tʉlekaghe kuuva nʉ lughinio,
kuuva vahovesi nambe kuuva nɨ kɨvini.