4
Nɨjove mʉ kɨhwanɨkɨsio nɨɨti,
ʉnsiki ghwoni ʉmwana ʉnya kʉhaala ɨkyʉma pano ajiighe mwana,
iiva hwene nkami,
napano ɨkyʉma kyoni kya mwene.
2 Ʉnsiki ghwoni ghʉno ajiighe mwana,
alɨ mʉ mavoko gha vano vikʉnsʉnga na vɨmɨlɨli va kyʉma kuhanga ghʉfike ʉnsiki ghʉno ʉviise alyataviike.
3 Fye lʉlyale na jʉsue,
ʉKɨlɨsite ye akyale kukwisa kʉkʉtʉvanga,
tʉlyale hwene vaana,
tʉlyale vakami va mhepo imbiivi sino sitema ɨɨsi.
4 Neke ʉnsiki ghʉno ʉNgʉlʉve alyataviike ye ghʉfikile,
akansuungʼha ʉMwanaake.
ɄMwanaake ʉjuo alyaholilue ndavʉle ʉsue,
akava hwene nkami ghwa ndaghɨlo.
5 Alyasungʼhilue kuuti atʉvange ʉsue twe vano tʉlyale mʉ vʉkami vwa ndaghɨlo.
Alyavombile ʉluo,
kuuti ʉsue tweni tʉʉve vaana va Ngʉlʉve.
6 Lɨno,
ʉlwakʉva ʉsue tʉlɨ vaana va Ngʉlʉve,
ʉmwene ansungʼhile ʉMhepo ghwa Mwanaake mʉ moojo ghiitu.
ɄMhepo ʉjuo ɨkʉtʉpelela kʉkʉntambʉla ʉNgʉlʉve,
“Aba,”
kwekʉti,
Nhaata.
7 Lɨno,
ʉsue natʉlɨ vakami kange,
looli tʉlɨ vaana va Ngʉlʉve.
Ʉlwakʉva tʉlɨ vaana va Ngʉlʉve,
ɨkʉtʉpeela sino alyalaghile.
ɄPaulo ɨkʉvavʉnga aVagalatia
8 Mʼbʉkʉʉlʉ ʉmue ye mʉkyale kʉkʉnkagʉla ʉNgʉlʉve,
mʉlyale vakami va mangʉlʉve.
9 Neke lɨno,
mʉnkagwile ʉNgʉlʉve,
pamo nɨjove nɨɨti,
mʉkagʉliike nʉ mwene.
Lɨno,
lwandaani mugomoka kʉ mhepo imbiivi sino sitema ɨɨsi isila lʉtango nambe lʉvʉmbʉlɨlo?
Asi,
mulonda kuuva vakami kange va mhepo isio?
10 Kɨki mʉjiighe mʉgadɨliile ifighono fimonga mʉ mʉlʉngʉ,
mʉ mwesi na mʉ mwaka kuuva fikulukulu fya kʉmwɨmɨka ʉNgʉlʉve?
11 Nisaagha kuuti,
pamo ɨmbombo jooni jɨno nɨlyavombile vwɨmɨla ʉmue,
nɨlyakatiile vʉvʉle!
12 Vanyalʉkolo vango,
nɨkʉvasʉʉma mʉvisaghe ndavʉle ʉne,
ʉlwakʉva nanɨlɨ nkami kange ghwa ndaghɨlo.
Ʉne nɨlɨ ndavʉle ʉmue vʉle mʉlyale ʉlʉtasi,
namʉlyale vakami va ndaghɨlo.
Ye nɨlɨ palɨkɨmo numue,
namʉlyambombiile ʉvʉviivi vʉmonga.
13 Ʉmue mʉkagwile kuuti ɨnhamu jɨno nɨlyale najo,
je jɨno jɨlyamheleliile kuuva nʉ nsiki ʉghwa kʉpʉlɨsia ɨMhola ɨNofu ʉlwa kwanda kʉlyʉmue.
14 Napano nɨlyale mʼbotevote ʉmʼbɨlɨ,
ʉvʉvotevote vwango navʉlyavapeleliile ʉmue kʉkʉmbenapʉla nambe kʉkʉngʼhaana,
napano silyale ngelo kʉlyʉmue.
Ʉlwene mʉlyanyʉpiile hwene mʉkʉmwʉpɨla ʉnyamhola ghwa Ngʉlʉve,
kange hwene mʉkʉmwʉpɨla ʉYesu Kɨlɨsite jʉjuo.
15 Amasiki ghala mʉlyale nʉ lʉkeelo ʉlʉkome.
Asi,
lɨno kɨvaghile kɨki?
Nijova isa kyangʼhaani kuuti,
ʉnsiki ghʉla ndepoonu mwale mungʼomotola amaaso ghiinu,
mʉmheele ʉne.
16 Asi,
lɨno nɨlɨ mʉlʉgʉ ghwinu ʉlwakʉva nɨvavʉlile ʉvwakyangʼhaani?
17 Avavʉlanɨsi va vʉdesi avuo vilonda fiijo kʉkʉvakoova ʉmue,
neke navalɨ nʉ vʉfumbue ʉvʉnofu numue.
Ʉlwene vilonda kʉkʉvavɨɨka patali nuune,
kuuti mʉvisaghe na veene.
18 Nave ʉmuunhu ilonda kʉkʉvakoova ʉmue mʉ vʉfumbue ʉvʉnofu,
anoghiile kuvomba isio jaatu,
nakwekʉti pa pano nɨlɨ palɨkɨmo numue.
19 Vanango,
nɨlɨ nʉ vʉvafi vwɨmɨla ʉmue kuhanga pano nivona mʉlɨ nʉ lʉveelo ʉlwa Kɨlɨsite mʉ vwʉmi vwinu.
20 Ninoghua nɨɨve palɨkɨmo numue ʉnsiki ʉghʉ,
neke nɨjove ɨnjovele jɨno mʉkʉnhangʼhania vʉnono!
Nijova enendɨɨkɨ,
ʉlwakʉva pano nɨlɨ patali numue,
sino nijova namʉngasitangʼhanie vʉnofu!
Ɨkɨhwanɨkɨsio kya Hajili nʉ Sala
21 Lɨno,
mʉmbʉʉle ʉmue mwe vano mulonda kuuva mʉ vʉkami vwa ndaghɨlo sa Moose!
Asi,
namʉkagwile indaghɨlo vʉle silʉngɨka?
22 Lɨlembilue mʉ Malembe aMɨmɨke kuuti,
ʉAbulahamu alyale na vaana vavɨlɨ,
jʉmonga mwa mhɨnja ʉnkami jʉno akatambʉlwagha Hajili,
ʉjʉnge mwa nʼdala ʉmwavʉke jʉno akatambʉlwagha Sala.
23 Ʉmwana ʉghwa mhɨnja ʉnkami,
alyaholilue mʉ vughane vwa vaanhu.
Neke ʉmwana ghwa nʼdala ʉmwavʉke alyaholilue ndavʉle alyalaghile ʉNgʉlʉve.
24 Imhola isa vakɨjʉʉva vavɨlɨ avuo,
kɨhwanɨkɨsio kya mhola sa fingoa ivɨlɨ.
Lʉmonga lwe lʉno lʉlyavombiike kʉ kɨdunda ɨkya Sinai,
ʉluo lʉlɨngʼhiine nʉ Hajili,
avaana vaake viholua vakami.
25 ɄHajili alɨngʼhiine nɨ kɨdunda ɨkya Sinai ɨkya mʉ ɨɨsi ɨja Vʉalabu.
Kange,
alɨngʼhiine nɨ lɨkaaja ɨlya Yelusalemu vʉle lɨlɨvuo lɨno,
ʉlwakʉva avaana ava lɨkaaja ɨlio valɨ mʉ vʉkami vwa ndaghɨlo sino valyapelilue kʉ kɨdunda ɨkya Sinai.
26 Neke ʉlʉnge lwe lwa mʉkɨjʉʉva ʉSala,
jʉno alɨngʼhiine nɨ lɨkaaja ɨlya Yelusalemu ɨja kʉkyanya.
ɄSala ʉjuo ghwe mʉkɨjʉʉva ʉmwavʉke,
ghwe mama ghwitu.
27 Ʉlwakʉva lɨlembilue mʉ Malembe aMɨmɨke kuuti,
“Ʉhovokaghe,
ʉve ghwe jʉno ʉlɨ mʉghʉmba,
ghwe jʉno nʉghelile kupaapa.
Jeghelagha nʉ lʉkeelo
ʉve ghwe jʉno nʉghelile piiva nʉ vʉvafi ʉvwa kʉpaapa,
ʉlwakʉva ʉmʉkɨjʉʉva jʉno ʉmʉghoosi amʉlekile,
iiva na vaana vinga,
kukila avaana va jʉno alɨ nʉ mʉghoosi.”b
28 Lɨno,
vanyalʉkolo vango,
ʉmue mʉlɨ vaana va Ngʉlʉve,
mʉholilue vwɨmɨla ʉlʉlaghɨlo lwake,
ndavʉle lʉlyale kwa Isaka.
29 Neke ndavʉle lʉlyale ifighono fila,
ʉmwana jʉno alyaholilue mʉ vughane vwa vaanhu alyampumwisie ʉmwana jʉno alyaholilue mʉ ngʉfu sa Mhepo ʉMwɨmɨke.
Fye lʉlɨvuo nafi fighono ifi,
avaanhu vano vilongosivua ni ndaghɨlo vikʉvapumusia avavʉke.
30 Neke aMalembe aMɨmɨke ghiiti kɨki?
Ghiiti,
“Ʉnʼdage ʉmʉkɨjʉʉva ʉnkami palɨkɨmo nʉ mwanaake,
ʉlwakʉva ʉmwana ghwa nkami,
naalɨ nʉ vʉhaasi palɨkɨmo nʉ mwana ghwa mʉkɨjʉʉva ʉmwavʉke.”c
31 Enendɨɨkɨ vanyalʉkolo vango,
ʉsue natʉlɨ vaana va mhɨnja ʉnkami,
looli tʉlɨ vaana va mama ʉmwavʉke.