Vagalatia 3

Ʉlwɨtɨko ni ndaghɨlo

Ʉmue Vagalatia, mʉlɨ vajasu! Ghwe veeni, jʉno avahaviile? Ɨmhola ɨja Yesu Kɨlɨsite kukomelelua pa kɨkovekano, mʉlyavʉlilue vʉnono! 2 Lɨno, nilonda mʉmbʉʉle, mʉlyʉpiile ʉMhepo ghwa Ngʉlʉve vwɨmɨla kuvɨngɨlɨla indaghɨlo? Jeeje, mʉlyʉpiile vwɨmɨla kupʉlɨka na kukwɨtɨka ɨMhola ɨNofu. 3 Lɨno, kɨki mʉlɨ vajasu enendɨɨkɨ? Mʉlyatengwile mʉ ngʉfu sa Mhepo ghwa Ngʉlʉve, lɨno mulonda kumala mʉlwa kʉhʉvɨɨla ingʉfu siinu! 4 Imhumuko sooni sino mʉlyapumwike, mʉlyapumwike vʉvʉle? Kyangʼhaani, namʉlyapumwike vʉvʉle. 5 ɄNgʉlʉve naalyavapeliile ʉMhepo ghwake, na kuvomba ifidegho pakate palyʉmue vwɨmɨla kuvɨngɨlɨla indaghɨlo, looli vwɨmɨla kukwɨtɨka ɨMhola ɨNofu jɨno mʉlyajɨpʉliike. 6 Enendɨɨkɨ ʉAbulahamu, alyamwɨtiike ʉNgʉlʉve, akavalɨlua kuuva mʉgholofu.

7 Lɨno mʉkagʉlaghe kuuti, vano vikʉmwɨtɨka ʉNgʉlʉve ve vaana va Abulahamu. 8 AMalembe aMɨmɨke ghiiti, avaanhu vooni vilivalɨlua kuuva vagholofu vwɨmɨla ʉlwɨtɨko lwave, ʉlwakʉva ʉNgʉlʉve alyamʼbʉlile taasi ʉAbulahamu ɨMhola ɨNofu kuuti, “Kukilila ʉve avaanhu ava fisina fyoni vilifunyua.” 9 Mʉ ʉluo, ʉNgʉlʉve ɨkʉvafuunya vooni vano vikʉmwɨtɨka, ndavʉle alyamfunyile ʉAbulahamu vwɨmɨla ʉlwɨtɨko lwake.

Ʉmuunhu ivalɨlua ʉvʉgholofu vwɨmɨla ʉlwɨtɨko

10 Avaanhu vooni vano vihʉvɨɨla kuuva vagholofu vwɨmɨla kuvɨngɨlɨla indaghɨlo, vaghunilue. Nijova ʉluo, ʉlwakʉva aMalembe aMɨmɨke ghiiti, “Ʉmuunhu ghweni jʉno naivomba na kuvɨngɨlɨla sino silembilue mʉ kɨtabu ɨkya Ndaghɨlo, aghunilue.” 11 Lʉkagʉliike kuuti, nakwale ʉmuunhu jʉno ivalɨlua kuuva mʉgholofu pamaaso gha Ngʉlʉve vwɨmɨla kuvɨngɨlɨla indaghɨlo, ʉlwakʉva lɨlembilue kuuti, “Avaanhu vango avagholofu vikukalagha vwɨmɨla kʉkʉnyɨtɨka ʉne.” 12 Kange, indaghɨlo sa Moose nasivomba ɨmbombo mʉ lwɨtɨko, looli mʉ sino ʉmuunhu ivomba, ndavʉle aMalembe aMɨmɨke vʉle ghiiti, “Jʉno igadɨlɨla indaghɨlo, ikukalagha vwɨmɨla indaghɨlo isio.”

13 ɄKɨlɨsite alyatʉvangile kuhʉma mʉ kɨghune kɨno kɨletilue ni ndaghɨlo, alyʉpiile ɨkɨghune ɨkio vwɨmɨla ʉsue, ʉlwakʉva lɨlembilue kuuti, “Ʉmuunhu ghweni jʉno akomelilue pa kɨkovekano, aghunilue.” 14 Lʉlyavombiike ʉluo kuuti inyifuunyo sino alyapelilue ʉAbulahamu, voope avaanhu vano naVayahudi, vʉpɨle vwɨmɨla kʉkʉmwɨtɨka ʉYesu Kɨlɨsite. Mʉ ʉluo, ʉsue tweni tukwʉpɨla ʉMhepo ʉMwɨmɨke jʉno ʉNgʉlʉve alyatʉlaghile kʉkʉtʉpeela vwɨmɨla ʉlwɨtɨko.

Indaghɨlo nʉ lʉfingo

15 Vanyalʉkolo vango, nilonda pikʉvavʉʉla mʉ kɨhwanɨkɨsio ɨkya mhola sino mʉsikagwile. Avaanhu vavɨlɨ vangafingane na kukwɨtɨngʼhana mʉ lʉmonga, nakwale jʉno ndepoonu ideenya nambe kukwongelesia ɨlɨsio mʉ lʉfingo ʉluo. 16 Lɨno, ʉNgʉlʉve alyamʉlaghile ʉAbulahamu nʉ nyeenya ghwake. AMalembe aMɨmɨke naghiiti alyalaghile “kʉ vanyeenya vaake,” kwekʉti, “avaanhu vinga,” looli ghiiti, “Ʉmuunhu jʉmo,” ʉmuunhu ʉjuo ghwe Kɨlɨsite. 17 Kɨno nijova kye ɨkɨ: Mʼbʉkʉʉlʉ ʉNgʉlʉve alyavɨkile ʉlʉfingo nʉ Abulahamu. Pambele ye ghakilile amaaka ifilʉndo fine ni fijigho fitatu, ʉNgʉlʉve akampeela ʉMoose indaghɨlo. Lɨno, indaghɨlo isio sino silisile pambele nasaale sivʉsia ʉlʉfingo lwa Ngʉlʉve nambe kukwandʉla sino alyalaghile. 18 ɄNgʉlʉve ale atʉpelaghe inyifuunyo saake vwɨmɨla kuvɨngɨlɨla indaghɨlo, nakwale kuuva nʉ vʉfumbue ʉvwa kʉhʉvɨɨla sino alyatʉlaghile. Neke lɨno ʉNgʉlʉve alyampeliile inyifuunyo ʉAbulahamu, ʉlwakʉva alyamʉlaghile. 19 Lɨno, indaghɨlo pe silyavɨkilue sa kɨki? Indaghɨlo silyavɨkilue vwɨmɨla kʉkʉvahʉfia avaanhu ʉvʉhosi vwave, kuhanga iise ʉnyeenya ghwa Abulahamu jʉno ʉNgʉlʉve alyalaghile kuuti ikwisa. ɄNgʉlʉve alyampeliile ʉMoose indaghɨlo kukilila ʉnyamhola. ɄMoose akava isambania avaanhu nʉ Ngʉlʉve. 20 Lɨno, nave ɨmhola jɨlɨ vwɨmɨla ʉlʉbale lʉmo, ʉnya kʉsambania nailondua, kange ʉNgʉlʉve alɨ jʉmo.

Ɨmbombo ɨja ndaghɨlo

21 Asi, kwekʉti indaghɨlo nasikwɨtɨngʼhana na sino ʉNgʉlʉve alyalaghile? Jeeje, indaghɨlo sale sivɨkue kʉkʉvapeela avaanhu ʉvwʉmi, avaanhu ngale vivalɨlua kuuva vagholofu vwɨmɨla kuvɨngɨlɨla indaghɨlo. 22 Neke nafye lʉlɨvuo. AMalembe aMɨmɨke ghiiti, avaanhu vooni valɨ mʉ vʉkamɨngʼhanɨlua ʉvwa kʉvomba inyɨvi. Mʉ ʉluo sino alyalaghile ʉNgʉlʉve vipelua avɨtɨki vwɨmɨla kʉkʉmwɨtɨka ʉYesu Kɨlɨsite.

23 Ʉnsiki ʉghwa lwɨtɨko mwa Yesu Kɨlɨsite ye ghʉkyale pifika, tʉlyale mʉ vʉkamɨngʼhanɨlua vwa ndaghɨlo, tughuula kukwisa ʉlwɨtɨko ʉluo. 24 Indaghɨlo isio silyale sikʉtʉlongosia kuhanga ifika ʉKɨlɨsite, kuuti vwɨmɨla kʉkʉmwɨtɨka ʉmwene, tʉvalɨlue kuuva vagholofu. 25 Lɨno, ʉlwakʉva ʉlwɨtɨko mwa Yesu Kɨlɨsite lwisile, natʉlɨ mʉ vʉkamɨngʼhanɨlua ʉvwa ndaghɨlo sino satʉlongosyagha.

26 Ʉmue mweni mʉlɨ vaana va Ngʉlʉve vwɨmɨla ʉlwɨtɨko, ʉlwakʉva mʉkʉmwɨtɨka ʉYesu Kɨlɨsite. 27 Ʉmue mwe vano mwofughue mʉ lɨtavua lya Kɨlɨsite, muuva mwa Kɨlɨsite, muuva hwene mʉmfwalile ʉKɨlɨsite. 28 Mʉ ʉluo mweni mʉlɨngʼhiine, aave Mʉyahudi nambe naMʉyahudi, aave nkami nambe mwavʉke, aave mʉkɨnhaata nambe mʉkɨjʉʉva, ʉlwakʉva mweni mʉlɨ vevamo mwa Yesu Kɨlɨsite. 29 Lɨno, ʉlwakʉva mʉkʉmwɨtɨka ʉKɨlɨsite, mʉlɨ vanyeenya va Abulahamu, mulikwʉpɨla sino ʉNgʉlʉve alyalaghile.