ɄPaulo na vasungʼhua avange
2
Amaaka kɨjigho na ghane ye ghakilile,
nɨkalʉta kange kʉ Yelusalemu.
Ʉkuo nɨkalʉta nʉ Balinaba,
palɨkɨmo nʉ Tiito.
2 Nɨlyalʉtile kʉ Yelusalemu,
ʉlwakʉva ʉNgʉlʉve alyahʉfisie kuuti nɨlʉte.
Ye nɨfikile,
nɨkikala na valongosi ava kɨpʉgha ɨkya vɨtɨki kʉ vʉsyefu,
nɨkavavʉʉla ɨMhola ɨNofu jɨno nipʉlɨsia kʉ vaanhu vano naVayahudi.
Nɨlyavombile ʉluo kuuti ɨmbombo jɨno nɨlyavombile na jɨno nivomba,
jɨleke pisova vʉvʉle.
3 Avalongosi avuo vakɨtɨngʼhana nuune,
nambe ʉTiito jʉno alyale palɨkɨmo nuune,
napano naalyale Mʉyahudi,
naalyʉmɨlɨsivue kuvɨngɨlɨla indaghɨlo isa Moose mʉlwa kʉdumulua ɨngola ɨja kɨdɨɨmi.a
4 Naalyʉmɨlɨsivue ʉluo napano kwevalyale avaanhu vano valivɨkile vɨtɨki vajiitu,
vano valondagha ʉTiito avombelue ɨkɨvʉngo mʉlwa kʉdumulua ɨngola ɨja kɨdɨɨmi.
Avaanhu avuo valijingisie kɨsyefu kuposelesia ʉvwavʉke vwitu vʉno tʉlɨ navwo mwa Yesu Kɨlɨsite,
kuuti vatʉvɨɨke kuuva vakami va ndaghɨlo sa Kɨyahudi.
5 Ʉsue natʉlyɨtɨngʼhiine na veene nambe padebe,
neke ʉmue mʉjighe mʉ vwakyangʼhaani vwa Mhola ɨNofu ɨja Yesu Kɨlɨsite.
6 Neke avalongosi avuo ava kɨpʉgha ɨkya vɨtɨki,
navalyongelisie nambe lɨsio mʉ mhola jɨno nɨlyale nipʉlɨsia.
Ʉvʉvaha vwave navʉlyandwile kɨmonga kʉlyʉne,
ʉlwakʉva ʉNgʉlʉve naihɨgha mʉlwa kʉlola ʉvʉvaha vwa muunhu.
7 Neke avalongosi avuo vakalʉtangʼhania kuuti,
ʉNgʉlʉve asungʼhile ʉne kupʉlɨsia ɨMhola ɨNofu kʉ vaanhu vano naVayahudi,
ndavʉle ansungʼhile ʉPeteli kʉ Vayahudi.
8 ɄNgʉlʉve jʉno ansalwile ʉPeteli kuuva nsungʼhua kʉ Vayahudi,
ghwe mwene asalwile ʉne kuuva nsungʼhua kʉ vano naVayahudi.
9 ɄYakovo,
ʉPeteli nʉ Yohani vano valyale valongosi vavaha,
vakakagʉla kuuti ʉNgʉlʉve asʉngʉkiile ʉne kuvomba ɨmbombo ɨjɨ.
Mʉ ʉluo vakatʉkola amavoko ʉne nʉ Balinaba,
kuvonia kuuti tʉlɨ vʉhangɨlanɨsi na veene mʉ mbombo ɨja kʉpʉlɨsia ɨMhola ɨNofu.
Pe tʉkɨtɨngʼhana kuuti,
ʉsue tʉpʉlɨsyaghe kʉ vano naVayahudi,
aveene kʉ Vayahudi.
10 Looli vakatʉsʉʉma kuuti tʉkʉmbʉkaghe kʉkʉvatanga avakotofu ava kʉ Yelusalemu,
ɨmbombo jɨno na jʉʉne nighimba kuvomba.
ɄPaulo ɨkʉnʼdalɨkɨla ʉPeteli kʉ Antiokia
11 Ʉnsiki ghʉmonga ʉPeteli alisile mʉ lɨkaaja ɨlya Antiokia.
Ye alɨ mʉ lɨkaaja ɨlio,
nɨlyanʼdalɨkiile pa vʉvalafu,
ʉlwakʉva alyavombile sino nasinoghiile.
12 AVayahudi vamonga vano valyahʉmile kwa Yakovo,
ye vakyale pifika mʉ lɨkaaja ɨlio,
ʉPeteli alyale ihanga ɨkyakʉlia na vɨtɨki vano naVayahudi.
Neke avaanhu avuo ye vafikile,
akavʉhɨɨla kuhanga na vaanhu vano naVayahudi.
Alyavombile ʉluo,
ʉlwakʉva alyale ɨkʉvoghopa aVayahudi avɨtɨki vano visimilisia kuuti,
nava vɨtɨki vano naVayahudi vavombelwaghe ɨkɨvʉngo mʉlwa kʉdumulua ɨngola ɨja kɨdɨɨmi.
13 AVayahudi avɨtɨki voope vakatengʉla kuvʉhɨɨla kuhanga ɨkyakʉlia na vano naVayahudi.
Najʉ Balinaba akingila mʉ vʉkedʉsi ʉvuo.
14 Neke ye nɨvwene vivomba sino najilʉngɨka ɨMhola ɨNofu,
nɨkamʼbʉʉla ʉPeteli pamaaso gha vaanhu vooni kuuti,
“Nave ʉve ghwe Mʉyahudi ghuvɨngɨlɨla inyiiho isa vaanhu vano naVayahudi,
kɨki ghusimilisia avaanhu vano naVayahudi kuvɨngɨlɨla inyiiho isa Vayahudi?”
Avaanhu vooni vipokua vwɨmɨla ʉlwɨtɨko
15 Ʉsue tʉlɨ Vayahudi vʉholua,
natʉlɨ ndavʉle vano naVayahudi,
vano twiti vahosi.
16 Tʉkagwile kuuti,
ʉmuunhu naivalɨlua kuuva mʉgholofu vwɨmɨla kuvɨngɨlɨla indaghɨlo isa Moose,
looli vwɨmɨla kʉkʉmwɨtɨka ʉYesu Kɨlɨsite.
Na jʉsue tʉlyamwɨtiike ʉYesu Kɨlɨsite kuuti tʉvalɨlue kuuva vagholofu,
nakwekʉti vwɨmɨla kuvɨngɨlɨla indaghɨlo,
looli vwɨmɨla kʉkʉmwɨtɨka ʉYesu.
Ʉlwakʉva nakwale ʉmuunhu jʉno ivalɨlua ʉvʉgholofu vwɨmɨla kuvɨngɨlɨla indaghɨlo.b
17 Lɨno,
pano tulonda kuvalɨlua kuuva vagholofu vwɨmɨla kʉkʉmwɨtɨka ʉKɨlɨsite,
luvoneka kuuti ʉsue tʉlɨ vahosi.
Asi,
kwekʉti ʉKɨlɨsite ɨkʉtʉvɨɨka kuuva vahosi?
Jeeje!
Nafye lʉlɨvuo nambe padebe!
18 Neke nave nigomokela kange kuvomba sino nɨlyasilekile,
apuo nihʉfia kuuti nɨlɨ mhosi.
19 Ʉlwakʉva mʉlwa kuvɨngɨlɨla indaghɨlo isa Moose,
nɨlɨ mfue kuuti nikalaghe ndavʉle ikeela ʉNgʉlʉve.
20 Ʉlʉveelo lwango ʉlʉkʉʉlʉ lʉfwile palɨkɨmo nʉ Kɨlɨsite pa kɨkovekano.
Lɨno nɨlɨ mwʉmi,
ʉKɨlɨsite ghwe jʉno ikukala nkate mʉlyʉne.
Ʉvwʉmi vʉno nɨlɨ navwo mʉ mʼbɨlɨ ʉghʉ,
nɨlɨ navwo vwɨmɨla kʉkʉmwɨtɨka ʉMwana ghwa Ngʉlʉve,
jʉno alyanganile kuhanga kufua pa kɨkovekano kuuti amhoke.
21 Ʉne naniiti ʉlʉsʉngʉ lwa Ngʉlʉve lʉsila mbombo.
Nave ʉmuunhu ivalɨlua ʉvʉgholofu vwɨmɨla kuvɨngɨlɨla indaghɨlo,
kwekʉti ʉKɨlɨsite iiva alyafwile vʉvʉle.