Ɨkalata ɨja Paulo kʉ
Vagalatia
Ʉlʉhʉngɨlo
1
Ɨkalata ɨjɨ jɨhʉmile kʉlyʉne ne Paulo.
Ʉne nɨlɨ nsungʼhua,
nanɨsungʼhilue na vaanhu nambe kusalʉlua nʉ muunhu ghweni,
looli nɨlyasungʼhilue nʉ Yesu Kɨlɨsite jʉjuo nʉ Ngʉlʉve ʉNhaata,
jʉno alyansyʉsisie ʉYesu kuhʉma kʉ vafue.
2 Ʉne na vɨtɨki avajango vano tʉlɨ lʉmo kʉno,
tʉkʉvahʉngɨla ʉmue mwe vaanhu va fipʉgha fya vɨtɨki ifya mʉ kɨghavo ɨkya Galatia.
3 Ʉlʉsʉngʉ nʉ lʉtengaano kuhʉma kwa Ngʉlʉve ʉNhaata ghwitu na kwa Mʉtwa ʉYesu Kɨlɨsite fivisaghe numue.
4 ɄKɨlɨsite alitavwile kufua pa kɨkovekano vwɨmɨla inyɨvi siitu,
kuuti atʉpoke mʉ vʉhosi vwa ɨɨsi ɨjɨ.
Alyavombile ʉluo mʉ vughane vwa Ngʉlʉve ʉNhaata ghwitu.
5 ɄNgʉlʉve aghinwaghe ifighono fyoni.
Ameni.
ƗMhola ɨNofu ɨja Ngʉlʉve
6 Nidegha fiijo pano mʉkʉmʉleka ngʼhaningʼhaani ʉNgʉlʉve jʉno alyavakemelile kukukala mʉ lʉsʉngʉ lwa Kɨlɨsite,
neke muvɨngɨlɨla indaghɨlo isingi sino mwiti je Mhola ɨNofu.
7 Nɨkʉvavʉʉla,
kyangʼhaani nakwejɨlɨ ɨMhola ɨNofu ɨjɨngɨ.
Nijova ʉluo,
ʉlwakʉva kwevale avaanhu vano vikʉvagasia na kulonda kukwandʉla ɨMhola ɨNofu ɨja Kɨlɨsite.
8 Neke,
tʉʉve twesue nambe aave ghwe nyamhola ʉghwa kʉkyanya,
angapʉlɨsie ɨMhola ɨNofu jɨno najɨlɨngʼhiine na jɨno tʉlyapʉlisie ʉsue,
aghunwaghe.
9 Ndavʉle tʉvavʉlile,
lɨno nɨkʉvavʉʉla kange,
ʉmuunhu ghweni angapʉlɨsie ɨMhola ɨNofu jɨno najɨlɨngʼhiine na jɨno mʉkʉpiile,
aghunwaghe.
10 Asi,
musaagha kuuti nɨkʉvavʉʉla isio neke nɨvahovosie avaanhu?
Jeeje!
Nilonda kʉkʉmhovosia ʉNgʉlʉve.
Ʉlwakʉva nale nɨlondaghe kʉkʉvahovosia avaanhu,
nanaale niiva mʼbombi ghwa Kɨlɨsite.
ɄPaulo asungʼhilue nʉ Ngʉlʉve kupʉlɨsia ɨMhola ɨNofu
11 Vanyalʉkolo vango,
mʉkagʉlaghe kuuti,
ɨMhola ɨNofu jɨno nɨlyapʉlisie namasaaghe gha vaanhu.
12 Nanɨlyʉpiile ɨMhola ɨjio kuhʉma kwa muunhu,
nambe kuvʉlanɨsɨvua nʉ muunhu,
looli ʉYesu Kɨlɨsite jʉjuo ghwe jʉno alyahʉfisie ʉne ɨMhola ɨjio.
13 Mʉpʉliike vʉle nɨlyale ye nivɨngɨlɨla ʉlwɨtɨko lwa Kɨyahudi.
Nɨlyale nɨkʉkɨpumusia kyongo ɨkɨpʉgha kya Ngʉlʉve,
na kulonda kʉkʉkɨnangania lwoni.
14 Ʉne nɨlyale mʼbɨngɨlɨli nnofu ghwa lwɨtɨko lwa Kɨyahudi kukila aVayahudi avajango vooni ava lʉkʉlɨlo lwango.
Nɨlyale nighimba fiijo kugadɨlɨla inyiiho isa vakʉʉlʉ viitu.
15 Neke ʉNgʉlʉve alyasalwile mʉ lʉsʉngʉ lwake kuhʉma ye nɨkyale kuholua,
akangʼhemeela kuuti nɨɨve mʼbombi ghwake.
16 ɄNgʉlʉve alyavwene lʉnoghiile kʉkʉmhʉfia ʉMwanaakea kʉlyʉne,
kuuti nɨpʉlɨsie ɨMhola ɨNofu ɨja Mwanaake ʉjuo kʉ vano naVayahudi.
Ʉnsiki ghʉla ghʉla nanɨkamposia nambe muunhu kɨno nɨnoghiile kuvomba,
17 kange nanɨlyalʉtile kʉ Yelusalemu kʉ vano valyale vasungʼhua vatasi kʉlyʉne,
looli nɨlyalʉtile kʉ ɨɨsi ɨja Vʉalabu,
pambele nɨkagomoka mʉ lɨkaaja ɨlya Damesiki.
18 Amaaka ghatatu ye ghakilile,
nɨkalʉta kʉ Yelusalemu kuuti nɨtangʼhane nʉ nsungʼhua ʉPeteli,b
nɨkikala nʉ mwene ifighono kɨjigho na fihaano.
19 Ʉkuo nanɨlyatangʼhiine nʉ nsungʼhua ʉjʉnge,
looli jʉ Yakovo,
ʉnnuuna ghwa Mʉtwa ʉYesu.
20 Nijɨɨgha pamaaso gha Ngʉlʉve,
isi sino nɨkʉvalembela,
sa kyangʼhaani,
nasa vʉdesi.
21 Pambele nɨkalʉta imbale isa kɨghavo ɨkya Silia nɨ kya Kilikia.
22 Avaanhu va fipʉgha ifya vɨtɨki mwa Kɨlɨsite ifya kʉ kɨghavo ɨkya Yudea,
navalyatangʼhiine nuune.
23 Looli valyapʉliike kuuti,
“Ʉmuunhu jʉno alyale ɨkʉtʉpumusia ʉlʉtasi,
lɨno ipʉlɨsia imhola isa lwɨtɨko lʉno alyale ikaana avaanhu kuuti navangavɨngɨlɨlaghe.”
24 Pe vakamʉghinia ʉNgʉlʉve kʉ sino sivombiike vwɨmɨla ʉne.