Kutangana
6
Vanyalʉkolo vango,
nave mʉmwaghile ʉmuunhu ivomba ʉvʉhosi,
ʉmue mwe vano mulongosivua nʉ Mhepo ʉMwɨmɨke,
mʉntangaghe mʉ vʉkoola,
kuuti alaate inyɨvi saake.
Looli mʉvisaghe maaso,
kuuti na jʉmue mʉleke pikwingila mʉ ngelo.
2 Nave ʉmuunhu alɨ mʉ lʉtalamu lʉmonga,
mʉntangaghe.
Mʉ ʉluo,
muuva muvɨngɨlɨla ʉlʉlaghɨlo lwa Kɨlɨsite.
3 Ʉmuunhu jʉno ikuvona kuuti muunhu kukila avange,
hɨmbe nafye alɨvuo,
ʉjuo ikusyanga jʉjuo.
4 Ʉmuunhu ghweni aghelaghe imbombo saake jʉjuo,
neke nave avombile inofu,
ighiniaghe vwɨmɨla imbombo saake isio,
kɨsila kukulɨngʼhania nʉ jʉnge.
5 Nijova ʉluo,
ʉlwakʉva nʉjʉnge anoghiile kupɨnda ʉnsigho ghwake jʉjuo.
6 Ʉmuunhu ghweni jʉno ivʉlanɨsɨvua ɨlɨsio lya Ngʉlʉve,
amʉghavɨlaghe ʉmʼbʉlanɨsi ghwake mʉ fino akavile.
7 Namʉngisyangaghe,
ʉNgʉlʉve naibenapʉlua.
Ɨkɨɨnu kɨno ʉmuunhu avyalile,
kye kɨno ilipeta.
8 Ʉmuunhu jʉno ivɨngɨlɨla ʉvʉnoghelua vwa mʼbɨlɨ,
ilipeta ʉvʉfue.
Looli jʉno ɨkʉmʼbɨngɨlɨla ʉMhepo ʉMwɨmɨke,
ilipeta ʉvwʉmi ʉvwa kʉvʉsila kʉsila.
9 Lɨno,
natʉngakatalaghe kuvomba inofu,
ʉlwakʉva nave tukuguda,
ʉnsiki ghʉngafike tulikwʉpɨla inofu.
10 Lɨno,
ʉnsiki ghwoni ghʉno tʉlɨ naghwo tʉvavombelaghe inofu avaanhu vooni,
kyongo avɨtɨki avajiitu.
Ʉlʉpavɨlo ʉlwa vʉsililo
11 Mʉlolaghe vʉle nɨkʉvalembela ʉvʉlembe ʉvʉkome ʉvʉ,
lɨno nilemba nʉ lʉvoko lwango jʉʉne.
12 Vano vikʉvʉmɨlɨsia ʉmue kuvombelua ɨkɨvʉngo mʉlwa kʉdumula ɨngola ɨja kɨdɨɨmi,
vivomba ʉluo ʉlwakʉva vilonda kʉkʉvahovosia aVayahudi,
mʉ mbombo isa mʼbɨlɨ.
Vivomba enendɨɨkɨ kuuti valeke kupumusivua mʉlwa kʉpʉlɨsia ʉvwakyangʼhaani,
vwɨmɨla ʉKɨlɨsite kukomelelua pa kɨkovekano.
13 Nijova ʉluo,
ʉlwakʉva nambe vavuo vano vavombilue ɨkɨvʉngo mʉlwa kʉdumulua ɨngola ɨja kɨdɨɨmi,
navigadɨlɨla indaghɨlo sooni.
Vilonda mʉvombelue ɨkɨvʉngo,
neke vighinie vwɨmɨla ʉmue kuvombelua ɨkɨvʉngo.
14 Neke ʉne nanilonda kukughinia vwɨmɨla lʉmonga,
looli vwɨmɨla ɨkɨkovekano ɨkya Mʉtwa ghwitu ʉYesu Kɨlɨsite.
Vwɨmɨla ɨkɨkovekano ɨkio,
imbombo sooni isa mʉ ɨɨsi,
sila lʉvʉmbʉlɨlo kʉlyʉne.
Kange,
sino ʉne nivona nya lʉvʉmbʉlɨlo,
ɨɨsi jivona sila lʉvʉmbʉlɨlo.
15 Ʉlwakʉva kuvombelua ɨkɨvʉngo mʉlwa kʉdumulua ɨngola ɨja kɨdɨɨmi,
nambe kuleka kuvombelua ɨkɨvʉngo ɨkio,
nakuvʉmbʉlɨla kɨmonga;
ɨkɨvaha kuvʉmbɨka vʉpia,
kwekʉti kuuva nʉ lʉveelo ʉlʉpia.
16 Avaanhu vooni vano vivɨngɨlɨla ʉluo,
vaanhu va Ngʉlʉve kyangʼhaani.
ɄNgʉlʉve avapelaghe ʉlʉtengaano na kʉkʉvasʉngʉkɨla.