ƗMhola ɨNofu ɨja Yesu Kɨlɨsite
ndavʉle jalembilue nʉ
Mataayi
Ɨkɨkolo ɨkya Yesu Kɨlɨsite
1
Agha ghe matavua agha kɨkolo kya Yesu Kɨlɨsitea ʉmhʉma mʉ kɨsina kya ntwa ʉDavɨdi,
ɨkɨsina kya Abulahamu.
2 ɄAbulahamu akampaapa ʉIsaka,
ʉIsaka akampaapa ʉYakovo,
ʉYakovo akampaapa ʉYuuda na vanine.
3 ɄYuuda akampaapa ʉPelesi nʉ Sela mwa Tamali,
ʉPelesi akampaapa ʉHesiloni,
ʉHesiloni akampaapa ʉAlamu.
4 ɄAlamu akampaapa ʉAminadabu,
ʉAminadabu akampaapa ʉNasoni,
ʉNasoni akampaapa ʉSalimoni.
5 ɄSalimoni akampaapa ʉBohasi mwa Lahavu,
ʉBohasi akampaapa ʉObedi mwa Lʉti,
ʉObedi akampaapa ʉYese,
6 ghwope ʉYese akampaapa ʉntwa ʉDavɨdi.
ɄDavɨdi akampaapa ʉSolomoni mwa mʉkɨjʉʉva jʉno alyale nʼdala ghwa Ulia.b
7 ɄSolomoni akampaapa ʉLehoboamu,
ʉLehoboamu akampaapa ʉAbia,
ʉAbia akampaapa ʉAsa.
8 ɄAsa akampaapa ʉYehoshafati,
ʉYehoshafati akampaapa ʉYolamu,
ʉYolamu akampaapa ʉUsia.
9 ɄUsia akampaapa ʉYotamu,
ʉYotamu akampaapa ʉAhasi,
ʉAhasi akampaapa ʉHesekia.
10 ɄHesekia akampaapa ʉManase,
ʉManase akampaapa ʉAmoni,
ghwope ʉAmoni akampaapa ʉYosia.
11 ɄYosia akampaapa ʉYekonia na vanine ʉnsiki ghʉno aVaisilaeli ye vatwalilue kʉ vʉhesia,
kʉ Babeli.
12 Ye vatwalilue kʉ vʉhesia kʉ Babeli,
ʉYekonia akampaapa ʉSalatieli,
ʉSalatieli akampaapa ʉSelubabeli.
13 ɄSelubabeli akampaapa ʉAbihudi,
ʉAbihudi akampaapa ʉEliakimu,
ʉEliakimu akampaapa ʉAsoli.
14 ɄAsoli akampaapa ʉSadoki,
ʉSadoki akampaapa ʉAkimu,
ʉAkimu akampaapa ʉEliudi.
15 ɄEliudi akampaapa ʉElieseli,
ʉElieseli akampaapa ʉMatani,
ghwope ʉMatani akampaapa ʉYakovo.
16 ɄYakovo akampaapa ʉYosefu ʉmʉghoosi ghwa Maliya.
ɄMaliya ghwe jʉno akampapile ʉYesu jʉno ghwe Kɨlɨsite.
17 Lɨno,
kuhʉma kwa Abulahamu kufika kwa ntwa ʉDavɨdi kwefilyale ifisina kɨjigho na fine.
Kange,
kuhʉma pa Davɨdi kufika ʉnsiki ghʉno aVaisilaeli vitwalua kʉ vʉhesia kʉ Babeli,
kwefilyale ifisina ifingi kɨjigho na fine.
Kange,
kuhʉma ʉnsiki ghʉno vitwalua kʉ Babeli kuhanga kufika ʉnsiki ye iholua ʉKɨlɨsite,
kwefilyale ifisina ifingi kɨjigho na fine.
Kuholua kwa Yesu Kɨlɨsite
18 Kuholua kwa Yesu Kɨlɨsite kʉlyale ndɨɨkɨ:
Ʉngʼina jʉno ɨlɨtavua lyake ghwe Maliya,
alyalɨmilue nʉ Yosefu.
Neke ye akyale kutolua,
alyavoniike kuuti,
alɨ nʉ vʉkunue mʉ ngʉfu sa Mhepo ʉMwɨmɨke.
19 Ʉlwakʉva ʉYosefu jʉno alyamʉlɨmiile ʉMaliya alyale mʉgholofu pamaaso gha Ngʉlʉve,
naakalondagha kuuti ankosie isoni ʉMaliya.
Pe akalamʉla pikʉmʉleka kɨsyefu.c
20 Ye alamwile ʉluo,
ʉnyamhola ghwa Mʉtwa ʉNgʉlʉve akamʼbonekela mʉ njosi,
akamʼbʉʉla akati,
“Ghwe Yosefu,
ghwe mhʉma mʉ kɨsina ɨkya ntwa ʉDavɨdi,d
ʉleke pikwoghopa pikʉntoola ʉMaliya,
ʉlwakʉva ʉvʉkunue vʉno alɨ navwo,
apelilue mʉ ngʉfu sa Mhepo ʉMwɨmɨke.
21 Neke ipaapa ʉmwana ʉnʼdɨɨmi,
ʉkʉmpeela ɨlɨtavua ɨlɨ Yesu,e
ʉlwakʉva ilikʉvapokagha avaanhu vaake mʉ nyɨvi saave.”
22 Sooni isio silyavombiike enendɨɨkɨ kukwɨlanɨsia ɨlɨsio lɨno ʉMʉtwa alyajovile kukilila ʉmʼbɨli ghwake kuuti,
23 “Lolagha,
ʉmhɨnja jʉno naammanyile ʉmʉghoosi,
iiva nʉ vʉkunue,
ipaapa ʉmwana ʉnʼdɨɨmi!
Pe vikʉmpeela ʉmwana ʉjuo ɨlɨtavua ɨlɨ Manueli.”f
Ʉmʉlʉvo ghwa lɨtavua ɨlio kwekʉti,
“ɄNgʉlʉve alɨ palɨkɨmo nusue.”