ɄNaomi ɨkʉmpeela ʉLʉti amasaaghe
3
Ɨkɨghono kɨmonga ʉNaomi akamʼbʉʉla ʉLʉti akati, “Mwalɨvango, vʉli, nalʉnoghiile nɨkʉlondele ʉmuunhu kuuti ʉvisaghe nʉ lʉtengaano? 2 ɄBohasi kʉno ʉve ghwavisagha palɨkɨmo na vavombi vaake, nyalʉkolo ghwitu ghwa nkate! Ɨvwilile ɨjɨ iiva alɨ kʉ lʉvʉgha lwake kukwelʉsia ɨngongilue. 3 Lɨno ʉve ghwoghe, ʉpakale amafuta, ʉfwale amenda amanofu neke ʉlʉte kʉla kʉla, looli ʉlekaghe pivoneka kwa mwene. Ʉghulilaghe kuhanga pano iiva aliile na kunyua. 4 Kange ʉtendelaghe pano ilʉta pighona, kyaaghonile ʉlʉtaghe ghunyatʉka, ʉfwɨkʉlaghe kʉ maghʉlʉ ghaake na kughona baaho. Neke ʉmwene kyaɨkʉkʉvʉʉla ɨkya kuvomba.” 5 ɄLʉti akamwɨtɨkɨla ʉnkamwana akati, “Kyanivomba ndavʉle ʉmbʉlile.”ɄLʉti ivɨngɨlɨla amasaaghe gha nkamwana ʉNaomi
6 ɄLʉti akalʉta kʉ lʉvʉgha lwa Bohasi, akavomba ndavʉle aveele amʼbʉlile ʉnkamwana. 7 ɄBohasi ye aliile na kunyua, ʉmʼbɨlɨ ghʉkasangalala. Akalʉta pighona palʉbale pa kɨlʉndo ɨkya ngongilue. Ye aghoneliile ʉLʉti akanyatʉka, akafwɨkʉla kʉ maghʉlʉ gha Bohasi, akaghona baaho.
8 Kufika mʉkɨlo nkate, ʉBohasi akakenyemʉka, akamʼbona ʉmʉkɨjʉʉva aghonile kʉ maghʉlʉ. 9 Akamposia akati, “Veeve veeni?” Ʉmwene akati, “Nene Lʉti ne mʼbanda ghwako, ʉngʼupike nʉ mwenda ghwakoa ʉlwakʉva ʉve veeve nyalʉkolo ghwa nkate mʉ kɨsina kya nyakʉsila ʉmʉghoosi ghwango.”
10 ɄBohasi akati, “ɄMʉtwa ʉNgʉlʉve akʉfunyaghe, lʉno ghuvomba lɨno ghuhʉfia ʉlʉghano mʉ kɨkolo kiitu kukila sino ʉkamʼbombiile ʉnkamwanavo, ʉlwakʉva ʉvalekile avadɨɨmi avakotofu nambe avamofu kuuti vakʉtoole.b 11 Mwalɨvango, ʉleke pisaagha, ʉne nɨkʉkʉvombela sooni sino ʉsʉmile, ʉlwakʉva avaanhu vooni mʉ lɨkaaja ɨlɨ vakagwile ʉvʉkoola vwako. 12 Se seene sino ʉjovile, ʉne nɨnoghiile pikʉkʉhaala, lɨno kwale ʉmwene jʉno ghwa nkate kukila ʉne mʉ kɨkolo kiitu. 13 Ʉve ʉghuule ɨkɨlo ɨjɨ, kʉngakie nɨlʉte nɨmposie, nave ikwɨtɨka kʉkʉkʉhaala luuva lʉnofu. Nave isiita, nivɨɨka ʉlʉfingo mʉ lɨtavua lya Mʉtwa ʉNgʉlʉve, nɨkʉkʉhaala jʉʉne. Lɨno ʉghone kuhanga pano kukia.”
14 ɄLʉti akaghona kʉ maghʉlʉ gha Bohasi kufika pano kuhenga. ɄBohasi akamʼbʉʉla ʉLʉti kuuti, avʉʉke lʉ lwakɨlo pano kʉjiighe ngʼhiisi, aleke kuvoneka kʉ vaanhuc kuuti aveele aghonile kʉ lʉvʉgha. 15 Kange ʉBohasi akamʼbʉʉla kuuti, aale ʉmwenda ghwake paasi, ye alile, akampeela ɨngongilue ifighelelo ntanda.d Akavʉʉka ivuja kʉ kaaja kwa nkamwana.
16 ɄLʉti ye afikile kʉ kaaja, ʉnkamwana akamposia akati, “Mwalɨvango, lʉveele ndaani.” Pe ʉLʉti akampangɨla sooni sino ʉBohasi amʼbombiile. 17 Kange akati, “ɄBohasi amheliile ɨngongilue ɨjɨ atiile nalʉnoghiile ʉne kuvuja mavoko gheene kʉlyʉve.” 18 Apuo ʉNaomi akati, “Mwalɨvango, ʉghuule neke ʉlole ʉBohasi sino kyaivomba, ʉlwakʉva ghwope nangatengaane nave naimala ɨmhola ɨjɨ ʉmʉsyʉghʉ.”