Vʉtengʉlɨlo
Ɨmhola ɨndongosi
Ɨkɨtabu ɨkɨ ɨkya Vʉtengʉlɨlo kɨlyapelilue ɨlɨtavua ɨlɨ, ʉlwakʉva kikwoleka ʉvʉtengʉlɨlo vwa fiinu fyoni. Kikwoleka vʉle ʉNgʉlʉve alyapelile ɨɨsi ni fiinu fyoni. Ʉmʉlembi ghwa kɨtabu ɨkɨ ghwe Moose.
Ɨkɨtabu ɨkɨ, kya kwanda mʉ vʉtavɨke vwa fitabu fyoni mʉ Bibilia. Kange, kɨtabu kya kwanda mʉ fitabu fihaano ifya Moose fino fili kʉvwasio mʉ Bibilia. Kɨvɨkilue kʉvʉtengʉlɨlo, ʉlwakʉva kikwoleka ʉvʉtengʉlɨlo vwa fiinu fyoni. Mʉ lwiho lwa Vayahudi ifitabu ifi fihaano vitambʉla viiti, ‘Indaghɨlo isa Ngʉlʉve.’ Kwekʉti, fitabu fya Ndaghɨlo sino ʉMoose alyapelilue nʉ Ngʉlʉve kʉkʉvavʉlanɨsia aVaisilaeli. Ifitabu ifio fye ifi: Vʉtengʉlɨlo, Kuhʉma, Mbombo sa Valeevi, Mbalɨlo ni Similisio sa Ndaghɨlo.
Ɨkɨtabu ɨkɨ kɨlyalembilue ʉnsiki aVaisilaeli ye valɨ mʉ lʉghendo kʉ lʉkʉve, ye vahʉmile kʉ vʉkami kʉ Misili vilʉta kʉ ɨɨsi ɨja lʉfingo, ɨja Kanaani.
ɄMoose alyafumbilue kʉkʉvavʉʉla aVaisilaeli imhola sa Ngʉlʉve nʉ vʉtengʉlɨlo vwa kɨsina kyave. AVaisilaeli avuo valikalile kʉ Misili kʉ nsiki ntali hwene vahesia, kange vilʉta kʉ ɨɨsi jɨno navajɨmanyile. ɄMoose ɨkʉvoleka kuuti, ʉNgʉlʉve jʉno vikʉmwɨmɨka, ghwe Ngʉlʉve ʉmpela fyoni. Nailonda avaanhu vano avapelile, kuuva vasiiti kukʉnda sino ɨkʉvalaghɨla kuvomba. Kange, ʉMoose ɨkʉvavʉʉla iiti, ɨɨsi jɨno vilʉta je jɨno ʉNgʉlʉve alyavalaghile avakʉʉlʉ vaave kuuti je jɨno vilikukala avanyeenya vaave. Isimilisia kuuti, ʉNgʉlʉve jʉno alyavalongwisie na kʉkʉvafuunya avakʉʉlʉ vaave, ghwe jʉjuo jʉno ɨkʉvalongosia aveene.
Ʉlʉbale ʉlʉnge vwɨmɨla ɨkɨtabu ɨkɨ, tukagʉla ʉvʉtengʉlɨlo vwa fiinu fyoni, ʉvʉtengʉlɨlo vwa vʉhosi ni mhumuko mʉ ɨɨsi, nʉ vʉpoki vʉno avaanhu vikwʉpɨla vwɨmɨla ʉlʉsʉngʉ lwa Ngʉlʉve.