Vʉtengʉlɨlo
ɄNgʉlʉve ipela ʉvʉlanga nɨ ɨɨsi
1
Kʉvʉtengʉlɨlo, ʉNgʉlʉve alyapelile ʉvʉlanga nɨ ɨɨsi. 2 Amasiki aghuo ɨɨsi najɨlyale kɨlʉnge, kange jɨlyale vʉvʉle, jɨsila kɨmonga. Amalenga ghalyale minga imbale sooni isa ɨɨsi, ɨngʼhiisi jɨlyagubiike pakyanya pa malenga. ɄMhepo ghwa Ngʉlʉve akava pakyanya pa malenga.Ɨkɨghono ɨkya kwanda
3 Pe ʉNgʉlʉve akati, “Lʉʉve lʉmuli,” kʉkava lʉmuli. 4 ɄNgʉlʉve akalola ʉlʉmuli, akavona lʉnofu. Pe akabaghʉlania ʉlʉmuli nɨ ngʼhiisi. 5 Ʉlʉmuli akalʉtambʉla, “Mwisi,” ɨngʼhiisi akajɨtambʉla, “Kɨlo.” Jɨkava vwilile, jɨkava lwakɨlo; kɨkava kɨsilile ɨkɨghono ɨkya kwanda.
Ɨkɨghono ɨkya vʉvɨlɨ
6 Kange, ʉNgʉlʉve akati, “Pwevʉʉve ʉvweleefu pakate pa malenga, vʉbaghʉlanie amalenga agha kʉkyanya na malenga agha paasi.” 7 Pe akapela ʉvweleefu, akabaghʉlania amalenga agha kʉkyanya na malenga agha pa ɨɨsi. Fye lʉkavombeka. 8 Ʉvweleefu akavʉtambʉla, “Vʉlanga.” Jɨkava vwilile, jɨkava lwakɨlo; kɨkava kɨsilile ɨkɨghono ɨkya vʉvɨlɨ.
Ɨkɨghono ɨkya vʉtatu
9 ɄNgʉlʉve akati, “Amalenga ghano ghalɨ pa ɨɨsi ghakongʼhaane pamo peene, neke pa vʉlaghafu pavoneke.” Fye lʉkavombeka. 10 Pa vʉlaghafu akapatambʉla, “Ɨɨsi.” Pa malenga ghano ghakongʼhanile akapatambʉla, “Nyanja.” ɄNgʉlʉve akalola fino apelile, akavona finofu.
11 ɄNgʉlʉve akati, “Ɨɨsi jɨmesie amamela: amamela ghano ghivisagha ni mbeju na mapiki ghano ghikomagha ifipeke, nʉghʉnge ifipeke fyake fino mʉnkate mwesivisagha imbeju.” Fye lʉkavombeka. 12 Amamela ghano ghalɨ papinga ghano ghikomagha ɨmbeju, na mapiki ghano ghikomagha ifipeke ghakamela mʉ ɨɨsi. ɄNgʉlʉve akalola fino apelile, akavona finofu. 13 Jɨkava vwilile, jɨkava lwakɨlo; kɨkava kɨsilile ɨkɨghono ɨkya vʉtatu.
Ɨkɨghono ɨkya vʉne
14 ɄNgʉlʉve akati, “Kwelɨɨve ɨlɨjʉva, nʉ mwesi, ni nhondue kʉ vʉlanga. Ifio fye fipelelaghe kuuva nɨ kɨlo nɨ mwisi na masiki ni fighono na maaka. 15 Kange, fivisaghe kʉ vʉlanga, fimulikaghe pa ɨɨsi.” Fye lʉkavombeka. 16 ɄNgʉlʉve alyapelile ɨlɨjʉva nʉ mwesi; ɨlɨjʉva lɨmulikaghe pamwisi, ʉmwesi ghʉmulikaghe pakɨlo. Akapela nasi nhondue. 17 ɄNgʉlʉve akavɨɨka fyoni ifio kʉ vʉlanga kuuti fimulikaghe pa ɨɨsi, 18 fitemaghe pamwisi na pakɨlo na kughavania ʉnsiki ʉghwa lʉmuli nʉ nsiki ʉghwa ngʼhiisi. ɄNgʉlʉve akalola fino apelile, akavona finofu. 19 Jɨkava vwilile, jɨkava lwakɨlo; kɨkava kɨsilile ɨkɨghono ɨkya vʉne.
Ɨkɨghono ɨkya vʉhaano
20 ɄNgʉlʉve akati, “Mʉ nyanja mwefiive ifipelua finga fino fili papinga. Kange, kwesiive ni njuni, sipululukaghe kʉkyanya.” 21 ɄNgʉlʉve akapela isamaki imbaha fiijo ni fipelua ifingi finga ifya mʉ malenga, fino fili papinga. Akapela ni njuni sino sili papinga. ɄNgʉlʉve akalola fino apelile, akavona finofu. 22 ɄNgʉlʉve akafifuunya ifipelua ifya mʉ nyanja akati, “Mwolokaghe, neke mʉʉve vinga mʉ nyanja.” Soope injuni akasifuunya akati, “Mwolokaghe mʉ ɨɨsi.” 23 Jɨkava vwilile, jɨkava lwakɨlo; kɨkava kɨsilile ɨkɨghono ɨkya vʉhaano.
Ɨkɨghono ɨkya ntanda
24 Kange, ʉNgʉlʉve akati, “Ɨɨsi jɨɨve ni fipelua finga fino fili papinga: ifidɨmua, ifipelua fino fighenda vwafula ni fikanu ifya mʉ lɨsoli fino fili papinga.” Fye lʉkavombeka. 25 ɄNgʉlʉve akapela ifikanu ni fidɨmua fino fili papinga ni fipelua fyoni fino fighenda vwafula. ɄNgʉlʉve akalola fino apelile, akavona finofu.
26 Pepano ʉNgʉlʉve akati, “Tʉvʉmbe ʉmuunhu mʉ kɨhwani kiitu, ahwanane nusue. Tʉmʼbʉmbe kuuti akateme isamaki mʉ nyanja ni njuni ni fidɨmua fyoni ni fikanu ifya mʉ lɨsoli ni fipelua fyoni fino fighenda vwafula.”
27 Pe ʉNgʉlʉve akampela ʉmuunhu mʉ kɨhwani kyake,
mʉ kɨhwani kyake ʉNgʉlʉve,
akapela ʉmʉkɨnhaata nʉ mʉkɨjʉʉva.
28 ɄNgʉlʉve akavafuunya, akavavʉʉla akati, “Mʉpapaghe, neke mwoloke mʉʉve vinga mʉ ɨɨsi, najɨ ɨɨsi jɨvisaghe mʉ mavoko ghiinu. Mʉtemaghe isamaki, injuni ni fipelua fyoni fino fighenda pa ɨɨsi.” 29 Pepano ʉNgʉlʉve akavavʉʉla akati, “Lolagha, nɨvapeliile amamela ghooni ghano ghivisagha ni mbeju na mapiki ghano ghikomagha ifipeke, nʉghʉnge ifipeke fyake fino mʉnkate mwesivisagha imbeju. Ifio fivisagha fyakʉlia fiinu. 30 Ifikanu fyoni, injuni ni fipelua fyoni fino fighenda pa ɨɨsi, kwekʉti ifipelua fyoni ifinya vwʉmi, nɨkʉfipeela amamela kuuva kyakʉlia kyave.” Fye lʉkavombeka. 31 ɄNgʉlʉve akalola fino apelile, akavona finofu fiijo. Jɨkava vwilile, jɨkava lwakɨlo; kɨkava kɨsilile ɨkɨghono ɨkya ntanda.