2
Fye enendɨɨkɨ ʉNgʉlʉve alyapelile ʉvʉlanga nɨ ɨɨsi, palɨkɨmo ni fiinu fyoni fino mwefili mʉ ɨɨsi. 2 Ye amalile ɨmbombo jaake ɨja kʉpela, ɨkɨghono ɨkya lekelalʉbale akapʉʉma kuvomba ɨmbombo. 3 ɄNgʉlʉve akakɨfuunya ɨkɨghono ɨkio ɨkya lekelalʉbale na kʉkʉkɨvɨɨka kuuva kyɨmɨke, ʉlwakʉva ɨkɨghono ɨkio alyapʉmile, ye amalile ɨmbombo jaake ɨja kʉpela ifiinu fyoni.Ʉmʉghʉnda ʉghwa Edeni
4 Imhola isa kʉpelua ʉvʉlanga nɨ ɨɨsi silyale ndɨɨkɨ: ɄMʉtwa ʉNgʉlʉvea ye apelile ʉvʉlanga nɨ ɨɨsi, 5 napweghʉlyale nambe ʉmmela ghʉmo mʉ ɨɨsi, ʉlwakʉva ʉMʉtwa ʉNgʉlʉve alyakyale kuleeta ɨfula, kange nakwealyale ʉmuunhu ʉghwa kʉlɨma ɨɨsi. 6 Neke amalenga ghakahʉma paasi pa ɨɨsi, ghakavɨɨka ɨɨsi jooni kuuva nyinyifu. 7 Pe ʉMʉtwa ʉNgʉlʉve akamʼbʉmba ʉmuunhu nɨ lɨhanga,b akampulila ʉmwʉja ʉmʉnya vwʉmi mʉ mhula, ʉmuunhu ʉjuo akava muunhu mwʉmi.
8 Pe ʉMʉtwa ʉNgʉlʉve akavyala amapiki gha fipeke mʉ mʉghʉndac ʉlʉbale ʉlwa kʉvʉdibulo kʉ Edeni. Mʉ mʉghʉnda ʉmuo, akamʼbɨɨka ʉmuunhu jʉno ampelile. 9 ɄMʉtwa ʉNgʉlʉve akamesia amapiki ghooni ghano ghalɨ papinga amanofu, ghano ghikoma ifipeke fino finoghiile kulɨvua. Pakate pa mʉghʉnda ʉghuo, pweghʉkava ʉmpiki ʉghwa kʉvapeela avaanhu ʉvwʉmi nʉ mpiki ʉghwa kʉkagʉla inofu ni mbiivi.
10 Kʉ Edeni ʉkuo, pwekɨlyale ɨkɨkogha kɨno amalenga ghaake ghakavɨkagha ʉvʉnyinyifu mʉ mʉghʉnda. Kuhʉma apuo ɨkɨkogha ɨkio kɨkaghavɨngʼhiine kuuva fikogha fine. 11 Ɨkɨkogha ɨkya kwanda kitambʉlua Pishoni. Ɨkɨkogha ɨkio kye kɨno kɨsyʉngʉtiile ɨɨsi jooni ɨja Havila, ɨɨsi ɨjio jɨlɨ ni sahabu. 12 Isahabu isa mʉ ɨɨsi ɨjio nofu fiijo. Kange, ʉkuo kweghale amafuta ghano ghinukila ghano ghitambʉlua bedola, na mavue agha ndalama nyinga ghano ghitambʉlua shohamu. 13 Ɨkɨkogha ɨkya vʉvɨlɨ kitambʉlua Gihoni. Ɨkɨkogha ɨkio kye kɨno kɨsyʉngʉtiile ɨɨsi jooni ɨja Kushi. 14 Ɨkɨkogha ɨkya vʉtatu kitambʉlua Tigilisi. Ɨkɨkogha ɨkio kɨlɨ ʉlʉbale ʉlwa kʉvʉdibulo ʉlwa ɨɨsi ɨja Ashulu. Ɨkɨkogha ɨkya vʉne kitambʉlua Eufulati.
15 Pe ʉMʉtwa ʉNgʉlʉve akantoola ʉmuunhu ʉjuo, akamʼbɨɨka mʉ mʉghʉnda ʉghwa Edeni kuuti, alɨmaghe na kʉkʉghʉlolelela. 16 Akansimilisia ʉmuunhu ʉjuo akati, “Ghukwɨtɨkɨsɨvua kulia ifipeke mʉ mapiki ghooni mʉ mʉghʉnda muno, 17 neke ifipeke ifya mpiki ʉghwa kʉkagʉla inofu ni mbiivi nʉngalisaghe, ʉlwakʉva ʉngalie ifipeke ifya mpiki ʉghuo, kyangʼhaani ghufua.”
18 Pe ʉMʉtwa ʉNgʉlʉve akati, “Nalʉnofu ʉmuunhu ʉjʉ ikalaghe mwene. Nɨkʉmpela ʉmuunhu ʉghwa kʉntanga jʉno anoghiile kuuva nʉ mwene.” 19 Pe ʉMʉtwa ʉNgʉlʉve akavʉmba nɨ lɨhanga ifikanu fyoni ifya mʉ lɨsoli ni njuni sooni. Akafileeta kwa Adamud kuuti alole vʉle kyaɨkʉfitambʉla ifipelua ifio. Ye ɨkʉfitambʉla nɨkɨngɨ paajo, ghakava ghe matavua gha fyene. 20 ɄAdamu akafipeela amatavua ifidɨmua fyoni, ifikanu fyoni ifya mʉ lɨsoli ni njuni sooni. Neke napwekɨlyale ɨkɨpelua ɨkya kʉntanga kɨno kɨnoghiile kuuva nʉ mwene.
21 Pepano ʉMʉtwa ʉNgʉlʉve akampelela ʉAdamu kughonelela fiijo. Pe akavʉsia ʉlʉvafu lʉmo mwa Adamu, pano avʉsisie pala akadinda nɨ nyama. 22 Ʉlʉvafu ʉluo, akampela ʉmʉkɨjʉʉva, pe akamʉleeta ʉmʉkɨjʉʉva ʉjuo kwa Adamu. 23 ɄAdamu akati,
“Lɨno ʉjʉ, mfupa kuhʉma mʉ mafupa ghango,
kange nyama kuhʉma mʉ nyama jango!
Itambʉlwagha, ‘Mʉkɨjʉʉva,’
ʉlwakʉva ahʉmile mwa mʉkɨnhaata.”e
24 Mʉ ʉluo, ʉmuunhu ɨkʉmʉleka ʉviise nʉ ngʼina, neke ivisagha nʉ nʼdala ghwake. Vavɨlɨ ava, viiva mʼbɨlɨ ghʉmo.
25 ɄAdamu nʉ nʼdala ghwake valyale vʉfuula, neke navalyale vivona soni.