ɄAdamu nʉ Efa vihoka pamaaso gha Ngʉlʉve
3
Mʉ fikanu fyoni fino ʉMʉtwa ʉNgʉlʉve alyapelile, ɨnjoka jɨlyale sʉfu kukila ifingi fyoni. Ɨkɨghono kɨmonga, ɨnjoka jɨkamposia ʉmʉkɨjʉʉva jɨkati, “Asi, ʉNgʉlʉve akatiile namʉngalisaghe ifipeke mʉ mapiki ghooni mʉ mʉghʉnda?”2 Ʉmʉkɨjʉʉva akamʉla akati, “Ndali, ifipeke ifya mapiki mʉ mʉghʉnda, twɨtɨkɨsivue kulia. 3 Looli ʉNgʉlʉve akatiile, ‘Ifipeke ifya mpiki ghʉno ghʉlɨ pakate pa mʉghʉnda, namʉngaghelaghe kulia nambe kʉkʉfyabasia. Mʉngavombe ʉluo, mufua!’ ”
4 Pe ɨnjoka jɨkamʼbʉʉla ʉmʉkɨjʉʉva jɨkati, “Kyangʼhaani namʉngafue! 5 ɄNgʉlʉve akajovile ʉluo, ʉlwakʉva akagwile kuuti, mʉngalie ifipeke ifya mpiki ʉghuo, muuva ndavʉle ʉmwene, mukagʉlagha inofu ni mbiivi.”
6 Ʉmʉkɨjʉʉva ʉjuo, ye avwene ifipeke ifya mpiki ʉghuo finofu kulɨvua, fihovosia, kange fikʉmpelela kuuva nʉ vʉkagʉsi, akadonola, akalia. Pe akampeela najʉ mʉghoosi ghwake, ghwope akalia. 7 Ʉnsiki ghʉghuo vakava nʉ vʉkagʉsi ʉvwa kʉkagʉla inofu ni mbiivi, vakivona kuuti valɨ vʉfuula. Pe vakahona amatʉndʉ agha mpiki ʉntini, vakafwala.
8 Ye jɨfikile ɨvwilile, ɨlɨfuke lɨkepwike, ʉAdamu nʉ nʼdala ghwake vakapʉlɨka ʉmʉghindi ʉghwa Mʉtwa ʉNgʉlʉve ighenda mʉ mʉghʉnda. Pe vakalʉta kufisama pakate pa mapiki mʉ mʉghʉnda ʉghuo kuuti aleke pikʉvaagha. 9 Neke ʉMʉtwa ʉNgʉlʉve akankemeela ʉAdamu akati, “Ʉlɨ kʉʉghi?”
10 ɄAdamu akamʉla akati, “Nɨpʉliike ʉmʉghindi ghwako mʉ mʉghʉnda, noghwipe, nifisile, ʉlwakʉva nɨlɨ vʉfuula.” 11 ɄNgʉlʉve akamposia akati, “Ghwe veeni jʉno akʉvʉlile kuuti ʉlɨ vʉfuula? Asi, ʉliile ifipeke ifya mpiki ghʉno nɨkakʉvʉlile kuuti nʉngalisaghe?” 12 ɄAdamu akamʉla akati, “Ʉmʉkɨjʉʉva jʉno ʉkamheliile kuuti ikalaghe palɨkɨmo nuune, ghwe jʉno amheliile ifipeke ifya mpiki ʉghuo, nɨliile.”
13 Pe ʉMʉtwa ʉNgʉlʉve akamposia ʉmʉkɨjʉʉva jʉla akati, “Kɨki ʉvombile ʉlʉ?” Ʉmʉkɨjʉʉva akamʉla akati, “Ɨnjoka jasyanga, nɨliile.”
Ɨkɨghune kya Ngʉlʉve vwɨmɨla ʉvʉhosi
14 Pe ʉMʉtwa ʉNgʉlʉve akajɨvʉʉla ɨnjoka akati,
“Ʉlwakʉva ʉvombile ʉlʉ,
ʉghunilue kukila ifidɨmua fyoni ni fikanu fyoni.
Ghughendagha vwafula,
kange mʉ vwʉmi vwako vwoni ghulisagha ɨlɨhanga.
15 Nɨkʉkʉpelela kuuva kɨlʉgʉ nʉ mʉkɨjʉʉva ʉjuo,
kange kuuva kɨlʉgʉ,
ʉmwoloko ghwako nʉ mwoloko ʉghwa mʉkɨjʉʉva.
Ʉmwoloko ʉghwa mʉkɨjʉʉva ghʉkʉkʉtovagha kʉ mutu,
na jʉʉve ghungʼenyagha ifisukuluuni fyave.”
16 Pe akamʼbʉʉla ʉmʉkɨjʉʉva jʉla akati,
“Nɨkʉkwongelesia ʉvʉvafi ʉvwa kʉpaapa.
Ghupapagha avaana nʉ vʉvafi ʉvʉkome.
Ghusyʉkwagha ʉmʉghoosi ghwako,
neke ʉmwene ɨkʉkʉtemagha.”a
17 Pe akamʼbʉʉla ʉAdamu akati,
“Ʉlwakʉva ʉmpʉliike ʉnʼdala ghwako,
ʉliile ifipeke ifya mpiki ghʉno nɨkakʉkanile,
ɨɨsi jɨghunilue vwɨmɨla ʉve.
Ghukavagha ifyakʉlia mʉlwa kʉvomba ɨmbombo ɨnhalamu
mʉ vwʉmi vwako vwoni.
18 Ɨɨsi jimesyagha amifua nɨ lɨdilu vwɨmɨla ʉve,
ghulisagha ɨnyafu ɨja mʉ mʉghʉnda.
19 Ghukavagha ifyakʉlia fyako mʉlwa kʉvomba fiijo ɨmbombo,
kuhanga ʉnsiki ghʉno ghuligomoka mʉ lɨhanga,
muno ʉlyahʉmile.
Ʉve ʉlɨ lʉngʼhʉnde,
ghugomoka kuuva lʉngʼhʉnde.”
20 Pe ʉAdamu akampeela ʉnʼdala ghwake ɨlɨtavua ɨlɨ Efa,b ʉlwakʉva ʉEfa ghwe mama ghwa vaanhu vooni. 21 ɄMʉtwa ʉNgʉlʉve akantendela ʉAdamu nʉ nʼdala ghwake ɨngʉvʉ, akavafwasia.
ɄAdamu nʉ Efa vidagua mʉ mʉghʉnda
22 Pe ʉMʉtwa ʉNgʉlʉve akati, “Lɨno, ʉmuunhu ʉjʉ ahwene nʼjiitu, akagwile inofu ni mbiivi. Lɨno, asighue kulia ifipeke ifya mpiki ʉghwa kʉvapeela avaanhu ʉvwʉmi, ʉlwakʉva angalie, ivisagha mwʉmi amasiki ghooni.” 23 Mʉ ʉluo, ʉMʉtwa ʉNgʉlʉve akavadaga mʉ mʉghʉnda ʉghwa Edeni, kuuti ʉAdamu alʉtaghe kulɨma ɨɨsi muno alyahʉmile. 24 Ye avadagile mʉ mʉghʉnda, akavɨɨka ʉnyamhola ʉlʉbale ʉlwa kʉvʉdibulo ʉlwa mʉghʉnda ʉghwa Edeni. Akavɨɨka nɨ bamba ɨja mwoto jɨno jɨkava jisyetʉka kʉno na kʉno, kulolelela ɨsɨla ɨja kʉlʉta kʉ mpiki ʉghwa kʉvapeela avaanhu ʉvwʉmi.