ɄKaini nʉ Abeli
4
ɄAdamu akaghona nʉ nʼdala ghwake ʉEfa, akava nkunue, akapaapa ʉmwana, akantambʉla Kaini. ɄEfa akati, “ɄMʉtwa ʉNgʉlʉve anhangile, nɨpapile ʉmwana ʉnʼdɨɨmi.” 2 Pambele ʉEfa akava nkunue kange, akampaapa ʉAbeli ʉnnuuna ghwa Kaini. ɄAbeli alyale nʼdɨɨmi ghwa ngʼholo, ʉKaini akalɨmagha.3 Ɨkɨghono kɨmonga, ʉKaini akantavʉlɨla ʉMʉtwa ʉNgʉlʉve ɨlɨtekelo,a mʉ fiinu ifya mʉ mʉghʉnda ghwake. 4 ɄAbeli ghwope akantavʉlɨla ʉMʉtwa ʉNgʉlʉve ɨlɨtekelo ɨlya ngʼholo isa kwanda kuholua, alyatavwile ɨnyama ɨnono jɨno jɨnonile. ɄMʉtwa ʉNgʉlʉve akankeela ʉAbeli palɨkɨmo nɨ lɨtekelo lyake. 5 Neke naakankeela ʉKaini nɨ lɨtekelo lyake. Apuo ʉKaini akakalala fiijo, akasighuka kʉ maaso.
6 ɄMʉtwa ʉNgʉlʉve akamposia ʉKaini akati, “Kɨki ʉkaliile enendɨɨkɨ? Kɨki ʉsighwike kʉ maaso? 7 Asi, ʉngavombe vʉnofu naghukwʉpɨlua? Ʉngaleke kuvomba vʉnofu, ʉvʉhosi vʉlɨ piipi nuuve, vʉlonda kukwingila mʉlyʉve, neke ghulondua kʉkʉvʉlema.”
8 Pambele ʉKaini akamʼbʉʉla ʉnnuuna ʉAbeli akati, “Tʉvʉʉke kʉ mʉghʉnda.”b Ye valɨ kʉ mʉghʉnda, ʉKaini akamwalʉkɨla ʉnnuuna, akamʼbuda.
9 Pe ʉMʉtwa ʉNgʉlʉve akamposia ʉKaini akati, “Ʉnnunaavo ʉAbeli alɨ kʉʉghi?” ɄKaini akamʉla akati, “Nwisi! Ʉne nanɨlɨ mʉloleleli ghwa nnunavango.” 10 ɄMʉtwa ʉNgʉlʉve akati, “Ʉvombile kɨki? Ɨdanda ɨja nnunaavo, jɨkʉndɨlɨla mʉ lɨhanga. 11 Lɨno, ʉve ʉghunilue, nʉngalɨme kange ɨlɨhanga lɨno lɨnywile ɨdanda ja nnunaavo, jʉno ʉmʼbudile! 12 Ʉngalɨme, nʉngapete kɨmonga mʉ lɨhanga ɨlio. Ʉve ghuvisagha muunhu ghwa kʉlʉʉla, naghuvisagha nʉ vukalo mʉ ɨɨsi.”
13 ɄKaini akamʼbʉʉla ʉMʉtwa ʉNgʉlʉve akati, “Ʉlʉpumuko lʉno ʉmheliile lʉkome kyongo, nanɨngigude! 14 Lolagha, ʉmʉsyʉghʉ ʉndagile pa lɨhanga ɨlya ndɨmo, na kuuva patali nuuve. Lɨno, nivisagha muunhu ghwa kʉlʉʉla, nanivisagha nʉ vukalo pa ɨɨsi. Kange, ʉmuunhu ghweni anganyaaghe, ɨkʉmbuda.”
15 ɄMʉtwa ʉNgʉlʉve akamʼbʉʉla akati, “Ndali, nafye lʉlɨvuo, ʉmuunhu ghweni angakʉbude, nivangɨla kwa mwene mala lekelalʉbale.” Pe ʉMʉtwa ʉNgʉlʉve akamʼbɨɨka ʉKaini ɨkɨvalɨlo, kuuti jʉno angamwaghe, naangamʼbudaghe.
16 Pepano ʉKaini akavʉʉka pamaaso gha Mʉtwa ʉNgʉlʉve, akalʉta kukukala mʉ ɨɨsi ɨja Nodi,c ʉlʉbale ʉlwa kʉvʉdibulo ʉlwa Edeni.
Ʉmwoloko ʉghwa Kaini
17 ɄKaini akaghona nʉ nʼdala ghwake, akava nkunue, akampaapa ʉEnoki. Pe ʉKaini akajenga ɨlɨkaaja, akalɨpeela ɨlɨtavua ɨlya mwanaake, ɨlɨ Enoki.
18 ɄEnoki akampaapa ʉIladi, ʉIladi akampaapa ʉMehuyaeli.
ɄMehuyaeli akampaapa ʉMetushaeli, ʉMetushaeli akampaapa ʉLameki.
19 ɄLameki akatoola avadala vavɨlɨ, jʉmonga akatambʉlwagha Ada, ʉjʉnge akatambʉlwagha Sila. 20 ɄAda akampaapa ʉYabali jʉno alyale viise ghwa vano vakadɨmagha ifidɨmua, valyale vikukala mʉ lɨheema. 21 Ʉnnuuna akatambʉlwagha Yubali. Ʉjuo alyale viise ghwa vakʉva lɨgombo ni filongilongi. 22 ɄSila ghwope akampaapa ʉTubali-Kaini jʉno alyale mponda fyʉma nɨ shaba. ɄTubali-Kaini alyale nʉ lʉmbʉ akatambʉlwagha Naama.
23 ɄLameki akavavʉʉla avadala vaake akati,
“Ada nuuve Sila mʉmhʉlɨkɨsie!
Pʉlɨkɨsia sino nijova mwe vadala va Lameki.
Ʉne nɨkamʼbudile ʉmuunhu,
ʉlwakʉva akamheleliile kuuva nɨ ngʼhoongʼo,
kyangʼhaani, nɨkamʼbudile ʉnsoleka, ʉlwakʉva akandemisie.
24 Nave ʉNgʉlʉve ivangɨla mala lekelalʉbale
kwa jʉno ɨkʉmʼbuda ʉKaini,
kyangʼhaani, kwa jʉno ɨkʉmʼbuda ʉLameki,
ʉNgʉlʉve ivangɨla mala fijigho lekelalʉbale na lekelalʉbale!”
ɄSeti nʉ Enosi
25 ɄAdamu akaghona kange nʉ nʼdala ghwake ʉEfa, akapaapa kange ʉmwana ʉnʼdɨɨmi, akampeela ɨlɨtavua ɨlɨ Seti.d Akati, “ɄNgʉlʉve asʉngʉkiile amheliile ʉmwana ʉjʉnge kupyanɨsia pa Abeli jʉno akabudilue nʉ Kaini.” 26 ɄSeti akapaapa ʉmwana ʉnʼdɨɨmi, akampeela ɨlɨtavua ɨlɨ Enosi.
Kutengʉlɨla apuo, pepano avaanhu valyatengwile kʉkʉmwɨmɨka ʉNgʉlʉve mʉ lɨtavua lyake.