Ʉmwoloko ʉghwa Adamu
5
Isi se mhola sa mwoloko ghwa Adamu.ɄNgʉlʉve ye ipela avaanhu, alyavapelile mʉ kɨhwani kyake. 2 Alyampelile ʉmʉkɨnhaata nʉ mʉkɨjʉʉva, pe akavafuunya, akavapeela ɨlɨtavua, “Vaanhu.”
3 ɄAdamu ye alɨ na maaka kɨlʉndo kɨmo ni fijigho fitatu, akapaapa ʉmwana jʉno ahwaniine nʉ mwene, akampeela ɨlɨtavua ɨlɨ Seti. 4 Kuhʉma ɨkʉmpaapa ʉSeti, akikala amaaka filʉndo lekelakwoni. Mʉ maaka aghuo, akapaapa avaana avange, avadɨɨmi na vahɨnja. 5 ɄAdamu ye alɨ na maaka filʉndo budikalʉbale ni fijigho fitatu, akafua.
6 ɄSeti ye alɨ na maaka kɨlʉndo kɨmo na ghahaano, akampaapa ʉEnosi. 7 Kuhʉma ɨkʉmpaapa ʉEnosi, akikala amaaka filʉndo lekelakwoni na lekelalʉbale. Mʉ maaka aghuo, akapaapa avaana avange avadɨɨmi na vahɨnja. 8 ɄSeti ye alɨ na maaka filʉndo budikalʉbale nɨ kɨjigho kɨmo na ghavɨlɨ, akafua.
9 ɄEnosi ye alɨ na maaka fijigho budikalʉbale, akampaapa ʉKenani. 10 Kuhʉma ɨkʉmpaapa ʉKenani, akikala amaaka filʉndo lekelakwoni nɨ kɨjigho kɨmo na ghahaano. Mʉ maaka aghuo akapaapa avaana avange avadɨɨmi na vahɨnja. 11 ɄEnosi ye alɨ na maaka filʉndo budikalʉbale na ghahaano, akafua.
12 ɄKenani ye alɨ na maaka fijigho lekelalʉbale, akampaapa ʉMahalaleli. 13 Kuhʉma ɨkʉmpaapa ʉMahalaleli, akikala amaaka filʉndo lekelakwoni ni fijigho fine. Mʉ maaka aghuo akapaapa avaana avange avadɨɨmi na vahɨnja. 14 ɄKenani ye alɨ na maaka filʉndo budikalʉbale nɨ kɨjigho kɨmo, akafua.
15 ɄMahalaleli ye alɨ na maaka fijigho ntanda na ghahaano, akampaapa ʉYaledi. 16 Kuhʉma ɨkʉmpaapa ʉYaledi, akikala amaaka filʉndo lekelakwoni ni fijigho fitatu. Mʉ maaka aghuo akapaapa avaana avange avadɨɨmi na vahɨnja. 17 ɄMahalaleli ye alɨ na maaka filʉndo lekelakwoni ni fijigho budikalʉbale na ghahaano, akafua.
18 ɄYaledi ye alɨ na maaka kɨlʉndo kɨmo ni fijigho ntanda na ghavɨlɨ, akampaapa ʉEnoki. 19 Kuhʉma ɨkʉmpaapa ʉEnoki, akikala amaaka filʉndo lekelakwoni. Mʉ maaka aghuo akapaapa avaana avange avadɨɨmi na vahɨnja. 20 ɄYaledi ye alɨ na maaka filʉndo budikalʉbale ni fijigho ntanda na ghavɨlɨ, akafua.
21 ɄEnoki ye alɨ na maaka fijigho ntanda na ghahaano, akampaapa ʉMetusela. 22 Ye ikalile amaaka filʉndo fitatu kuhʉma ɨkʉmpaapa ʉMetusela, akava nʉ vʉhangɨlanɨsi vʉnofu nʉ Ngʉlʉve, kange mʉ maaka aghuo akapaapa avaana avange avadɨɨmi na vahɨnja. 23 Alikalile amaaka filʉndo fitatu ni fijigho ntanda na ghahaano. 24 ɄEnoki akavombagha sino ikeela ʉNgʉlʉve. Ɨkɨghono kɨmonga, akatolua nʉ Ngʉlʉve.
25 ɄMetusela ye afikisie amaaka kɨlʉndo kɨmo ni fijigho lekelakwoni na lekelalʉbale, akampaapa ʉLameki. 26 Kuhʉma ɨkʉmpaapa ʉLameki, akikala amaaka filʉndo lekelalʉbale ni fijigho lekelakwoni na ghavɨlɨ. Mʉ maaka aghuo, akapaapa avaana avange avadɨɨmi na vahɨnja. 27 ɄMetusela ye alɨ na maaka filʉndo budikalʉbale ni fijigho ntanda na budikalʉbale, akafua.
28 ɄLameki ye alɨ na maaka kɨlʉndo kɨmo ni fijigho lekelakwoni na ghavɨlɨ, akapaapa ʉmwana ʉnʼdɨɨmi, 29 akampeela ɨlɨtavua ɨlɨ Nwaka.a Akati, “Ʉmwana ʉjʉ, ghwe jʉno ɨkʉtʉnyamasyagha mʉ mbombo jiitu ɨnhalamu jɨno tuvomba mʉ ɨɨsi jɨno jɨghunilue nʉ Mʉtwa ʉNgʉlʉve.” 30 Kuhʉma ɨkʉmpaapa ʉNwaka, akikala amaaka filʉndo fihaano ni fijigho budikalʉbale na ghahaano. Mʉ maaka aghuo, akapaapa avaana avange avadɨɨmi na vahɨnja. 31 ɄLameki ʉjuo ye afikisie amaaka filʉndo lekelalʉbale ni fijigho lekelalʉbale na lekelalʉbale, akafua.
32 ɄNwaka ye alɨ na maaka filʉndo fihaano, akampaapa ʉShemu, nʉ Hamu nʉ Yafeti.