Ʉvʉhosi ʉvwa vaanhu
6
Avaanhu vakatengʉla kukwongelela mʉ ɨɨsi na kupaapa avaana avahɨnja. 2 Avaana avadɨɨmi ava Ngʉlʉvea vakavavona avahɨnja avuo kuuti vanono, vakavatoola nʉjʉnge jʉno amʉghanile kuuva nʼdala ghwake. 3 Pe ʉMʉtwa ʉNgʉlʉve akati, “Ʉvwʉmi vwango navungajighe mwa muunhu ifighono fyoni,b ʉlwakʉva ʉmwene ghwa kʉfua. Amaaka ghaave agha kukala pa ɨɨsi apa naghikilagha amaaka kɨlʉndo kɨmo ni fijigho fivɨlɨ.”4 Amasiki aghuo na masiki agha pambele, kweghilyale imimuunhuc mʉ ɨɨsi, ghino ghilyapapilue na vaana avadɨɨmi ava Ngʉlʉve na vaana avahɨnja ava vaanhu. Imimuunhu ighio ghilyale minya ngʉfu, kange mitambʉlɨke fiijo.
5 ɄMʉtwa ʉNgʉlʉve akavona kuuti, ʉvʉhosi vwa vaanhu vwinga kyongo, kange sooni sino visaagha mʉ moojo ghaave vʉhosi ifighono fyoni. 6 ɄMʉtwa ʉNgʉlʉve akipɨɨka fiijo mʉ mwojo ghwake vwɨmɨla kʉkʉmpela ʉmuunhu mʉ ɨɨsi, akasukunala. 7 Pe akati, “Nɨkʉvatipula avaanhu vooni vano nɨvapelile mʉ ɨɨsi, nitipula ifidɨmua, ifipelua fino fighenda vwafula ni njuni. Nikupɨɨka kuuti kɨki nɨlyafipelile!” 8 Looli ʉNwaka akavombagha sino ikeela ʉMʉtwa ʉNgʉlʉve.
ɄNwaka itenda ɨsafina
9 Ɨjɨ je mhola ja Nwaka nʉ mwoloko ghwake: ɄNwaka alyale mʉgholofu, naakapɨkwagha mʉ vwʉmi vwake, kange akavombagha sino ikeela ʉNgʉlʉve. 10 ɄNwaka alyale na vaana vatatu avadɨɨmi: ʉShemu, ʉHamu nʉ Yafeti.
11 Ʉnsiki ʉghuo ɨɨsi jɨkava jɨnangiike, jɨmemile ʉvʉhosi pamaaso gha Ngʉlʉve. 12 ɄNgʉlʉve akavona ɨɨsi jɨnangiike, akavona avaanhu nʉjʉnge ivɨngɨlɨla ʉlʉveelo lwake ʉlʉviivi. 13 Pe akamʼbʉʉla ʉNwaka akati, “Nɨlamwile kʉkʉvatipula avaanhu vooni, ʉlwakʉva mʉ ɨɨsi jooni vamemisie ʉvʉhosi. Kyangʼhaani nɨkʉvatipula vooni palɨkɨmo nɨ ɨɨsi.
14 “Lɨno, ʉtende ɨsafinad ɨja mbavo isa mpiki ʉmninga, ʉghavanie ifyʉmba mʉnkate na kupaka ɨlaami mʉnkate na kʉnji. 15 Ɨsafina ɨjio ʉtende ndɨɨkɨ: ʉvʉtali jɨvisaghe imita kɨlʉndo kɨmo ni fijigho fitatu na budikalʉbale, ʉvweleefu jɨvisaghe imita fijigho fivɨlɨ ni haano, kulʉta kʉkyanya jɨvisaghe imita kɨjigho kɨmo ni haano. 16 Ɨsafina ɨjio jɨvisaghe ni gholoofa itatu nʉ mʉlyango mʉlʉbale. Ʉtende ɨkɨtʉvɨlɨ, na kʉkʉvʉleka ʉvweleefu nusu mita kuhʉma pa daali kufika pa kɨtʉvɨlɨ.
17 “Lolagha, nileeta ɨghalika kuuti nɨtipule ifiinu fyoni ifyʉmi mʉ ɨɨsi. Ifipelua fyoni ifyʉmi mʉ ɨɨsi fifua. 18 Looli, nifinga nuuve kuuti, ghukwingila mʉ safina palɨkɨmo nʉ nʼdala ghwako na vaswambo na vadala vaave. 19 Ghwingisie ifipelua fyoni ifyʉmi, fivɨlɨ fivɨlɨ ɨkɨngʼina nɨ kɨkambako kuuti fileke kufua, fijighe fyʉmi palɨkɨmo nuuve. 20 Ghwingisie injuni sino sili papinga ivɨlɨ ivɨlɨ, ifidɨmua fino fili papinga fivɨlɨ fivɨlɨ, ifipelua fino fighenda vwafula fino fili papinga fivɨlɨ fivɨlɨ. Fyoni fikwisa mʉlyʉve kuuti fileke kufua. 21 Ʉtoole ifyakʉlia finga fino fili papinga, ʉvɨɨke kɨɨve kyakʉlia kiinu ni fipelua ifio.”
22 ɄNwaka akavomba sooni ndavʉle amʼbʉlile ʉNgʉlʉve.