Ɨghalika
7
Pe ʉMʉtwa ʉNgʉlʉve akamʼbʉʉla ʉNwaka akati, “Mʉ vaanhu vooni ava kɨsina ɨkya masiki agha, nɨkʉvwene jʉʉve kuuti ʉlɨ mʉgholofu. Lɨno, ingila mʉ safina palɨkɨmo nʉ nʼdala ghwako na vaswambo na vadala vaave. 2 Ʉtoole ifidɨmua ni fikanu fyoni fino fili papinga, fino finoghiile kuuva lɨtekelo, kɨla kɨkanu ʉtoole ifikambako lekelalʉbale ni fingʼina lekelalʉbale. Neke ifidɨmua ni fikanu fino nafinoghiile kuuva lɨtekelo, ʉtoole kɨla kɨkanu fivɨlɨ fivɨlɨ, ɨkɨkambako nɨ kɨngʼina. 3 Kange, ʉtoole injuni sooni sino sili papinga, kɨla njuni ifighoosi lekelalʉbale ni fingʼina lekelalʉbale kuuti fileke kufua na kusovanɨka mʉ ɨɨsi. 4 Fisighiile ifighono lekelalʉbale, nileeta ɨfula mʉ ɨɨsi, jitoonya ifighono fijigho fine, pakɨlo na pamwisi. Ifipelua fyoni fino nɨpelile mʉ ɨɨsi nɨkʉfitipula.” 5 ɄNwaka akavomba sooni ndavʉle avʉlilue nʉ Mʉtwa ʉNgʉlʉve. 6 Ɨghalika ye jikwisa mʉ ɨɨsi, ʉNwaka alyale na maaka filʉndo ntanda.7 ɄNwaka nʉ nʼdala ghwake na vaswambe na vadala vaave vakingila mʉ safina, kuuti vakuluke ɨghalika. 8 Ifidɨmua ni fikanu fino finoghiile kuuva lɨtekelo na fino nafinoghiile, ni njuni ni fipelua fino fighenda vwafula, 9 fikingila fivɨlɨ fivɨlɨ mʉ safina muno mwale ʉNwaka. Fikingila ifikambako ni fingʼina ndavʉle alyalaghiile ʉNgʉlʉve. 10 Ifighono lekelalʉbale ye fikilile, amalenga gha ghalika ghakatengʉla kumema mʉ ɨɨsi.
11 Ɨkɨghono ɨkya kɨjigho kɨmo na lekelalʉbale ɨkya mwesi ʉghwa vʉvɨlɨ, ʉNwaka ye alɨ na maaka filʉndo ntanda, ifinʼdwivu fyoni mʉ ɨɨsi fikahʉmia amalenga minga, nɨ fula nyinga kuhʉma kʉkyanya jɨkiika. 12 Ɨfula jɨkatoonya mʉ ɨɨsi ifighono fijigho fine pakɨlo na pamwisi. 13 Ɨkɨghono kɨla kɨla ɨfula ye jitengʉla kutoonya, ʉNwaka nʉ nʼdala ghwake na vaswambe: ʉShemu, ʉHamu nʉ Yafeti na vadala vaave, vakingila mʉ safina. 14 Vakingila palɨkɨmo ni fikanu fyoni ifya mʉ lɨsoli, ifidɨmua, ifipelua fino fighenda vwafula ni njuni sino sili papinga. 15 Ifipelua fyoni ifio ifyʉmi, fikingiile fivɨlɨ fivɨlɨ mʉ safina mʉno mwale ʉNwaka. 16 Fyoni fikingiile ɨkɨkambako nɨ kɨngʼina, ndavʉle ʉNgʉlʉve alyamʉlaghiile ʉNwaka. Pe ʉMʉtwa ʉNgʉlʉve akadinda ʉmʉlyango ghwa safina kʉnji.
17 Mʉ fighono fijigho fine, ɨghalika jɨkava jifikwongelela. Amalenga ghakava minga kuhanga ghakinula ɨsafina, jɨkava jikweveela. 18 Amalenga ghakava ghifikwongelela fiijo mʉ ɨɨsi, najɨ safina jɨkava jifikweveela mʉnkyanya mʉ malenga. 19 Amalenga ghakava ghifikwongelela kuhanga ghakakupikila ifidunda fyoni ifitali mʉ ɨɨsi. 20 Ghalyongeliile kuhanga ghakakupikila ifidunda ʉvʉtali ʉvwa mita lekelalʉbale nɨ nusu. 21 Ifipelua fyoni mʉ ɨɨsi ifinya vwʉmi fikafua: injuni, ifidɨmua, ifikanu, ifipelua fyoni fino fighenda vwafula na vaanhu vooni. 22 Ifipelua fyoni ifinya vwʉmi mʉ ɨɨsi fikafua. 23 ɄNgʉlʉve akafitipula ifipelua fyoni mʉ ɨɨsi: avaanhu, ifidɨmua, ifipelua fino fighenda vwafula ni njuni. Fyoni fikatipulua. Looli ʉNwaka palɨkɨmo na vano valyale lʉmo mʉ safina, vakakuluka. 24 Amalenga ghalikalile mʉ ɨɨsi ifighono kɨlʉndo kɨmo ni fijigho fihaano.