Ɨghalika jisila
8
ɄNgʉlʉve naakansyemua ʉNwaka ni fikanu fyoni ifya mʉ lɨsoli, ni fidɨmua fino filyale palɨkɨmo nʉ mwene mʉ safina. Akaleeta ɨmhepo ɨmbaha jɨkapuula mʉ ɨɨsi, amalenga ghakatengʉla kukepʉka. 2 Ifinʼdwivu mʉ ɨɨsi fikadindua, najɨ fula kʉkyanya jɨkasighua kutoonya. 3 Amalenga ghakafikepʉkagha lʉkelʉke mʉ ɨɨsi, ye fikilile ifighono kɨlʉndo kɨmo ni fijigho fihaano, amalenga ghakava ghakepwike fiijo. 4 Ɨkɨghono ɨkya kɨjigho kɨmo na lekelalʉbale ɨkya mwesi ghwa lekelalʉbale, ɨsafina jɨkɨɨma mʉ fidunda ifya Alalati. 5 Amalenga ghakafikepʉkagha lʉkelʉke. Ɨkɨghono ɨkya kwanda ɨkya mwesi ʉghwa kɨjigho, ifidunda fikatengʉla pivoneka pakyanya.6 Ye fikilile ifighono fijigho fine, ʉNwaka akadindula ɨlɨdiliisa ɨlya safina lɨno akatendile. 7 Akahʉmia ɨhoove mʉ safina, neke najɨkagomoka, jɨkava jipululuka kʉno na kʉno kuhanga amalenga ghakʉʉma mʉ ɨɨsi.
8 Pe akahʉmia ɨngʼhʉnda, kuuti jɨlole nave amalenga ghakepwike mʉ ɨɨsi. 9 Neke, ɨngʼhʉnda jɨla najɨkapaagha apa kwɨma, ʉlwakʉva amalenga ghakajiighe mʉ ɨɨsi jooni, jɨkagomoka kʉ safina. ɄNwaka akagholosia ʉlʉvoko akajɨtoola na kʉkʉjɨgomosia mʉnkate mʉ safina. 10 Akaghulila kange ifighono lekelalʉbale, pe akajɨsuungʼha kange ɨngʼhʉnda jɨla. 11 Ɨngʼhʉnda jɨla jɨkagomoka ʉnsiki ʉghwa pakɨvwilile, jɨkiisa nɨ lɨtʉndʉ ɨliighu ɨlya mpiki ʉnseituni mʉ mʉlomo ghwake. Mʉ ʉluo, ʉNwaka akakagʉla kuuti amalenga ghakepwike mʉ ɨɨsi. 12 Pe akaghuula kange ifighono ifingi lekelalʉbale, akajɨhʉmia kange ɨngʼhʉnda jɨla, neke najɨkagomoka.
ɄNwaka ihʉma mʉ safina
13 Ɨkɨghono ɨkya kwanda ɨkya mwesi ghwa kwanda, ʉNwaka ye alɨ na maaka filʉndo ntanda na ghʉmo, amalenga ghakava ghʉmile mʉ ɨɨsi. ɄNwaka akafunukula ɨkɨfuniko ɨkya safina, akalola, akavona ɨɨsi jɨtengwile kukwʉma. 14 Ɨkɨghono ɨkya fijigho fivɨlɨ na lekelalʉbale ɨkya mwesi ghwa vʉvɨlɨ, ɨɨsi jɨkava jʉmile lwoni.
15 Apuo ʉNgʉlʉve akamʼbʉʉla ʉNwaka akati, 16 “Hʉma mʉ safina, ʉve nʉ nʼdala ghwako na vaswambo na vadala vaave. 17 Ʉhʉmie ifipelua fyoni fino fyava palɨkɨmo nuuve mʉ safina: injuni, ifidɨmua ni fingi fyoni fino fighenda vwafula, fyolokaghe na kuuva finga mʉ ɨɨsi.” 18 Pe ʉNwaka akahʉma mʉ safina, palɨkɨmo nʉ nʼdala ghwake na vaswambe na vadala vaave. 19 Ifikanu ni fidɨmua, ifipelua fino fighenda vwafula, injuni, ni fipelua ifingi fyoni fikahʉma mʉ safina nifingi paajo, fivɨngɨsania.
ɄNwaka ihʉmia ɨlɨtekelo kwa Mʉtwa ʉNgʉlʉve
20 Pe ʉNwaka akanʼjengela ʉMʉtwa ʉNgʉlʉve ɨkɨtekelelo.a Akatoola ifidɨmua fimonga ni njuni fino finoghiile kuuva lɨtekelo,b akatavʉla kuuva lɨtekelo lya kʉnyanyua. 21 Ʉlʉnuusi ʉlʉnono ʉlwa lɨtekelo ɨlio, lʉkamhovosia ʉMʉtwa ʉNgʉlʉve, akati mʉ mwojo ghwake, “Nanɨlajɨghʉna kange ɨɨsi vwɨmɨla avaanhu, nɨkagwile kuuti, amasaaghe ghaave maviivi kuhʉma ʉvwana vwave. Nanɨngatipule kange ifipelua fyoni, ndavʉle nɨkavombile.
22 Ʉnsiki ghwoni ghʉno ɨɨsi jɨjiighe pwejɨlɨ,
kweghuvisagha ʉnsiki ʉghwa kʉvyala nʉ ghwa kʉpeta,
kweghuvisagha ʉnsiki ʉghwa mhepo nʉ ghwa lɨfuke,
kweghuvisagha ʉnsiki ʉghwa kɨjʉva nʉ ghwa kɨfuku,
kweghuvisagha ʉnsiki ʉghwa pakɨlo nʉ ghwa pamwisi.
Ndalʉve ndaani amasiki ghooni aghuo kweghivisagha.”