LɄTI
ƗMHOLA ƗNDONGOSI
Ɨkɨtabu ɨkɨ kɨpelilue ɨlɨtavua lya mʉkɨjʉʉva jʉno akatambʉlwagha Lʉti, ʉmhʉma mʉ ɨɨsi ɨja Moabu. AVamoabu valyale vabadɨngʼhani va Vaisilaeli. Luvoneka kuuti amasiki aghuo aVaisilaeli na Vamoabu valyale kɨmanyaani. Imhola sino sili mʉ kɨtabu ɨkɨ silyahʉmiile amasiki ghano aVaisilaeli vilongosivua na Valamʉli (1375–1050 ye akyale kuholua ʉKɨlɨsite). Amasiki aghuo valyakyale kutengʉla kutema avatwa. AValamʉli avuo valyasungʼhilue nʉ Ngʉlʉve kʉkʉvalongosia na kʉkʉvatanga aVaisilaeli kʉ valʉgʉ vaave. Kange vakalongosyagha na kulamʉla imhola sinyinga nkate mʉ Vaisilaeli. Ɨmba ɨkɨtabu kya Valamʉli 2:10–19.
Ʉlʉvʉlanɨsio lʉno lʉlɨ mʉ kɨtabu ɨkɨ lʉkʉtʉvʉʉla kuuti, ʉlufuunyo lwa Mʉtwa ʉNgʉlʉve lʉlɨ kʉ vaanhu ava fisina fyoni. ɄNgʉlʉve alyamfunyile ʉLʉti na kʉkʉmʼbɨɨka kuuva ʉmo ghwa vano mwe kɨvʉmbʉkiile ɨkɨkolo kya kɨtwa, muno alyahʉmile ʉntwa ʉDavɨdi. Ye ghakilile amaaka minga, ghwope ʉYesu Kɨlɨsite akaholua mʉ kɨkolo kɨkio. Ʉvʉkoola vwa Lʉti kʉ vanyalʉkolo va mʉghoosi ghwake, vuvoneka pa vʉvalafu mʉ kɨtabu ɨkɨ. Kange ɨmhola jɨno mwejɨlɨ jihʉfia kuuti ʉNgʉlʉve ɨkʉvasʉngʉkɨla avaanhu vaake mʉ nhalamu sino sili papinga.