Kusyɨlua kwa Yakovo
50
ɄYosefu akamʉghumbatɨla ʉviise, akalɨla na kʉkʉnnonela. 2 Pe akavavʉʉla avaghanga vaake kuuti, vapake ʉnkota ʉmfimba ghwa viise, kuuti ghʉleke kuvola. 3 Ɨmbombo ɨjio jɨkavombeka ifighono fijigho fine, ʉlwakʉva lwale lwiho lwa Vamisili kulɨngʼhania ʉmfimba mʉ fighono ifio. AVamisili vakalɨla ifua vwɨmɨla ʉYakovo ifighono fijigho lekelalʉbale.4 Ifighono ifya kʉlɨla ifua ye fisilile, ʉYosefu akavavʉʉla avatangɨli va Falao akati, “Nave nikwɨtɨkɨsivua pamaaso ghiinu, mʉlʉte mʉ njovele kwa Falao kuuti, ʉnhaata alyambʉlile kuuti nɨjɨɨghe vwɨmɨla kʉkʉnsyɨla ʉmwene akati, 5 ‘Ʉne nitapifua. Ʉsyɨlaghe mʉ mbiipa jɨno nɨgimile mʉ ɨɨsi ɨja Kanaani.’ Lɨno, nɨkʉkʉsʉʉma ʉnyɨtɨkɨsie nɨlʉte kʉkʉnsyɨla ʉnhaata ghwango, neke nigomoka kange.” 6 ɄFalao akamʉla akati, “Lʉtagha ʉkansyɨle ʉnhaata ghwako ndavʉle ʉlyajɨghile kuvomba ʉluo.”
7 Pe ʉYosefu akalʉta kʉkʉnsyɨla ʉviise. Vakavɨngɨsania na vavombi vooni ava Falao, avagojo ava mʉ nyumba ɨja Falao palɨkɨmo na vatambʉlɨke mʉ ɨɨsi jooni ɨja Misili. 8 Kange, ʉYosefu akalongosania na vaanhu ava mʉ nyumba jaake, avanine na vaanhu ava mʉ nyumba ja viise. Avaana vaave vakajigha mʉ ɨɨsi ɨja Gosheni, palɨkɨmo ni fidɨmua fyave. 9 Kange, vakamhɨngɨlɨsia avangalɨla falaasi na magaale ghano ghikwesua ni falaasi. Lɨkava lɨpʉgha lɨvaha.
10 Vakafika pamonga pa lʉvʉgha pano pitambʉlua Atadi, ɨmwambo ɨja kɨkogha ɨkya Yolidani. Apuo vakalɨla nʉ lʉsukunalo ʉlʉkome. ɄYosefu akikala apuo ilɨla ɨfua ɨja viise ifighono lekelalʉbale. 11 AVakanaani vano valyale vikukala apuo, ye vavwene avaanhu vilɨla ɨfua pa lʉvʉgha ʉlwa Atadi, vakajova vakati, “Ɨfua ɨja Vamisili, mbaha fiijo!” Mʉ ʉluo, apoonu pala pano paale mwambo ja kɨkogha ɨkya Yolidani pakatambʉlua Abeli-Misili.a
12 Avaana va Yakovo vakamʼbombela ʉviise ndavʉle valyalaghilue: 13 Vakatwala ʉmfimba ghwake mʉ ɨɨsi ɨja Kanaani, vakansyɨla mʉ mhanga jɨno jɨlyale mʉ mʉghʉnda ʉghwa Makɨpela, kulʉngama kʉ Mamule. Ʉmʉghʉnda ʉghuo ʉAbulahamu alyaghʉlile kwa Efuloni ʉMʉhiti, pavisaghe pa kʉsyɨlɨla avaanhu vaake.
14 ɄYosefu ye ansyɨlile ʉviise, akagomoka kʉ Misili palɨkɨmo na vanyalʉkolo vaake na vaanhu avange vooni vano vakamhɨngɨlisie kʉkʉnsyɨla ʉviise.
ɄYosefu ɨkʉvasaghɨla avanine
15 Avanine va Yosefu ye vavwene ʉviise afwile, vakavʉlana vakati, “Vaya, ʉYosefu ndepoonu ɨkʉtʉkalalɨla na kuvangɨla ʉvʉviivi vwoni vʉno tʉlyamʼbombiile.” 16 Pe vakasuungʼha ɨmhola kwa Yosefu vakati, “Ʉvaaso ye akyale pifua, alyalaghiile kuuti, 17 ‘Mʉmʼbʉʉle ʉYosefu kuuti, nɨkʉnsʉʉma avasaghɨle avanine ʉvʉviivi nʉ vʉhosi vwoni vʉno valyamʼbombiile.’ Lɨno, tʉkʉkʉsʉʉma ʉtʉsaghɨle ʉsue twe vavombi va Ngʉlʉve ghwa nhaata ghwako.” ɄYosefu ye apʉliike ɨmhola ɨjio, akalɨla.
18 Pe avanine vakalʉta kwa mwene, vakafughama pa mwene vakati, “Lolagha, ʉsue tʉlɨ vakami vaako!” 19 Neke ʉYosefu akavamʉla akati, “Namʉngoghopaghe, ʉne nanɨlɨ Ngʉlʉve. 20 Ʉmue mʉlyafumbilue kʉkʉmbombela ʉvʉviivi, neke ʉNgʉlʉve alyafumbilue kuvomba inofu, kuuti nɨpoke ʉvwʉmi ʉvwa vaanhu vinga ndavʉle mulola lɨno. 21 Lɨno, namʉngoghopaghe! Ʉne nɨkʉvapeela ifiinu ifya kʉlia na vaana viinu.” Pe akajova navo vʉnofu, vakahovoka.
Kufua kwa Yosefu
22 ɄYosefu alikalile kʉ Misili palɨkɨmo na vanyalʉkolo vaake vooni kuhʉma kwa nhaata ghwake. Ʉmwene jʉjuo alikalile amaaka kɨlʉndo na kɨjigho kɨmo. 23 ɄYosefu alikalile kuhanga akavaagha avaana na visukulu va nswambe ʉEfulaimu. Kange, akavaagha na vaana va Makili, ʉmwana ghwa Manase.
24 ɄYosefu akavavʉʉla avanine akati, “Ʉne lɨno nitapifua. Neke kyangʼhaani ʉNgʉlʉve ɨkʉvatanga, ikwisa kʉkʉvavʉsia mʉ ɨɨsi ɨjɨ na kʉkʉvatwala mʉ ɨɨsi jɨno alyamʉlaghile ʉAbulahamu, ʉIsaka nʉ Yakovo.” 25 Pe ʉYosefu akavavʉʉla avaana va Isilaeli akati, “Kyangʼhaani, ʉNgʉlʉve iliiva ikwisa kʉkʉvatanga kulʉta kʉ ɨɨsi jɨla, mulondua kuvʉʉka na mafupa ghango apa.”
26 ɄYosefu akafua mʉ ɨɨsi ɨja Misili, alɨ na maaka kɨlʉndo na kɨjigho kɨmo. Vakapaka ʉmfimba ʉnkota kuuti ghʉleke kuvola, vakavɨɨka ʉmfimba ghʉla mʉ lɨvokosi.