ɄYakovo ɨkʉvafuunya avanaake
49
Pe ʉYakovo akavakemeela avanaake, akavavʉʉla akati, “Mweni mʉkongʼhaane apa, nɨvavʉʉle sino silikʉvaagha pambele.2 Ʉmue mwe vaana va Yakovo, mʉkongʼhaane mʉpʉlɨke,
mʉmhʉlɨkɨsie ʉne ne Isilaeli, ne nhaata ghwinu.
3 Lubeni, ʉve veeve mʼbele mʉlyʉne,
ngʉfu sango, kɨpeke kɨlongosi mʉ vʉsoleka vwango.
Ʉvakilile avanunaavo vooni ʉvʉvaha ni ngʉfu.
4 Ʉve naghusighika ndavʉle indenga,
lɨno nʉngavakile avanunaavo kange,
ʉlwakʉva ʉlyavwafwike nʉ nʼdala ghwango,a
na kunyasia ɨkɨtala kyango.
5 ɄSimeoni nʉ Leevi ve vamo,
ibamba saave vivombela imbiivi.b
6 Neke ʉne nanɨngingile mʉ vʉsʉfu vwave,
nanɨngave vʉhangɨlanɨsi mʉ kɨpʉgha kyave,
ʉlwakʉva mʉ ngʼhalaasi jaave valyabudile avaanhu,
mʉ vʉpakasi vwave valyatemile ʉlʉkole lwa ngʼombe.
7 Ʉlʉghuno lwango lukwisa kʉ veene vwɨmɨla ɨngʼhalaasi jaave ɨmbaha,
ɨlyojo lyave lya vʉbudi.
Nɨkʉvapalasania mʉ ɨɨsi ja Yakovo,
nɨkʉvapalasania mʉ Isilaeli.
8 Ʉve Yuuda! Avanino vikʉkʉghiniagha,
ghulikʉvalema avalʉgʉ vaako,
avaana va nhaata ghwako vilikʉkʉfughamɨla.
9 Yuuda mwanango, ʉve ʉlɨ ndavʉle ɨnyaana ja nyalʉpala,
ʉfwɨmile, ʉbudile na kuvʉʉka.
Lɨno, ʉghonile paasi ndavʉle ɨnyalʉpala ɨngʼina,
ghwe veeni jʉno ndepoonu ighela kʉkʉkʉsisimula?
10 Ʉlʉkwegho ʉlwa kɨtwa nalʉlavʉʉka kwa Yuuda,
lulijigha mʉ vanyeenya vaake ifighono fyoni,
kuhanga iliiva ikwisa ʉnya vʉtwa,
jʉno ɨɨsi sooni sinoghiile kʉkʉnkʉnda.
11 Ivisagha na maghʉnda amanya fundila,
ilɨsyagha idogovi saake isabibu saake inofu.
Ʉlʉhʉʉje lwake luvisagha lwinga fiijo hwene malenga,
isukagha amenda ghaake mʉ lʉhʉʉje lwake ʉlʉlangali.
12 Amaaso ghaake ghivisagha malangali
vwɨmɨla kunyua ʉlʉhʉʉje lwake ʉlwinga.
Amiino ghaake ghivisagha mavalafu
vwɨmɨla kunyua ʉtʉsiva twake ʉtwinga.
13 ɄSebuloni ikukalagha imbale isa kʉ nyanja,
imbale saake piiva pe pa kwɨmia ingalava,
imhaka saake silifika kʉ Sidoni.
14 ɄIsakali ghwe dogovi ɨnya ngʉfu,
jɨno jighona pakate pa masigho ghaake.
15 Ivona apa kʉpʉʉma panofu,
najɨ ɨɨsi jihovosia,
ikwinama ʉnsana ghwake kutoola amasigho,
iiva nkami ghwa kʉvomba ɨmbombo kʉ ngʉfu.
16 ɄDanic ivisagha mʉlamʉsi ghwa vaanhu vaake,
ndavʉle avalamʉsi avange mʉ fisina fya Vaisilaeli.
17 ɄDani ivisagha hwene njoka mʉlʉbale mʉ sɨla,
hwene njoka inya sumu ɨngʼhali jɨno jikufisa mʉ sɨla,
jɨno jiluma ifisukuluuni ifya falaasi,
neke jʉno angaliile aghue paasi.
18 Ghwe Mʉtwa, nighuula ʉvʉpoki vwako.
19 ɄGadi, avahɨjiavabudi vilikʉmwalʉkɨla,
neke ʉmwene ilikʉvagoma na kʉkʉvalema.
20 ɄAsheli, ɨɨsi jaake jiliiva nɨ mota,
jimesyagha ifyakʉlia ifinono fino ikeela ʉntwa.
21 ɄNafutali alɨ ndavʉle ɨswengu ɨngʼina ɨmbopole,
jɨno jilela inyaana inofu.
22 ɄYosefu alɨ ndavʉle ʉmpiki ʉnsabibu ghʉno ghukoma fiijo,
ʉmpiki ghʉno ghukoma mʉlʉbale mʉ finʼdwivu,
amataafi ghaake ghilandala mʉ lʉvʉmba.
23 Avanya mhalala valyamwalʉkiile,
valyahʉlʉngile kwa mwene kʉkʉnʼgasia.
24 Neke ɨmhalala jaake jɨlyajiighe ngʼhangafu,
amavoko ghaake ghalyapelilue ingʉfu,
vwɨmɨla ingʉfu isa Ngʉlʉve ghwa Yakovo,
mʉ lɨtavua lya nʼdɨɨmi, ʉlɨnhalavue lya Isilaeli,
25 vwɨmɨla ʉNgʉlʉve ghwa nhaata ghwako jʉno ɨkʉkʉtanga,
ʉNgʉlʉve ʉNyangʉfu Sooni jʉno ɨkʉkʉfuunya,
ghwʉpɨle inyifuunyo isa fula kuhʉma kʉkyanya,
inyifuunyo isa malenga agha fyogho kuhʉma paasi,
inyifuunyo isa mwoloko ʉghwa vaana ni fidɨmua.
26 Inyifuunyo isa nhaata ghwako mbaha
kukila inyifuunyo sino silyahʉmile kʉ fidunda ifikʉʉlʉ,
nyinga kukila sino silyahʉmile kʉ tʉdunda ʉtʉkʉʉlʉ.
Inyifuunyo isio sikalaghe kʉ mutu ghwa Yosefu,
kʉ vweni vwa mwene,
ʉlwakʉva ghwe mʼbaha mʉ vakʉlʉ na vanuuna.
27 ɄBenyamini ngʼhekeeva ngʼhali,
palwakɨlo jilia fino jɨfwɨmile,
pakɨvwilile jighava fino jɨkolile.”
28 Ifio fye fisina kɨjigho na fivɨlɨ ifya Isilaeli.d Amasio aghuo ghe ghano ʉYakovo alyavavʉlile na kʉkʉvafuunya avanaake. Akavapeela nʉjʉnge inyifuunyo ndavʉle lʉnoghiile.
ɄYakovo ifua
29 Pe ʉYakovo akavavʉʉla avanaake akati, “Ʉne nɨlɨ piipi pifua na kuuva palɨkɨmo na vakʉʉlʉ vango. Mʉsyɨlaghe kʉ vakʉʉlʉ vango kʉ mhanga jɨno jɨlɨ mʉ mʉghʉnda ʉghwa Efuloni ʉMʉhiti, 30 kʉ mʉghʉnda ʉghwa kʉ Makɨpela, kulʉngama kʉ lɨkaaja ɨlya Mamule mʉ ɨɨsi ɨja Kanaani. ɄAbulahamu alyaghʉlile ɨmhanga nʉ mʉghʉnda ʉghuo kwa Efuloni ʉMʉhiti, kuuti pe vasyɨlwaghe avaanhu vaake. 31 Mʉ mhanga ʉmuo, mwe muno valyasyɨlilue ʉAbulahamu nʉ nʼdala ghwake ʉSala, ʉIsaka nʉ nʼdala ghwake ʉLebeka, kange mwe muno nɨkansyɨlile ʉnʼdala ghwango ʉLea. 32 Ʉmʉghʉnda nɨ mhanga ɨjio filyaghʉlilue kʉ Vahiti.”e
33 ɄYakovo ye amalile kʉkʉvavʉʉla avanaake, akagomosia amaghʉlʉ ghaake pa kɨtala, akafua na kuuva palɨkɨmo na vakʉʉlʉ vaake.