ɄYakovo ɨkʉvafuunya avaana va Yosefu
48
Ifighono ndafilɨngi ye fikilile, ʉYosefu akavʉlua kuuti, “Ʉnhaata ghwako ntamu.” Akatoola avaana vaake vavɨlɨ, ʉManase nʉ Efulaimu, vakalʉta palɨkɨmo kwa viise. 2 ɄYosefu ye afikile, ʉYakovo akavʉlua kuuti, “Ʉmwanaako ʉYosefu isile kʉkʉkʉlola.” Apuo ʉYakovo akikangasia, akinamʉka, akikala pa kɨtala.3 ɄYakovo akamʼbʉʉla ʉYosefu akati, “ɄNgʉlʉve ʉNyangʉfu Sooni alyambonekiile ye nɨlɨ kʉ Lusu, mʉ ɨɨsi ɨja Kanaani, akafuunya ʉne. 4 Akambʉʉla akati, ‘Lolagha, nikwongelesia ʉmwoloko ghwako, viiva vinga, nɨkʉkʉvɨɨka ghuuva nkʉʉlʉ ghwa fisina finga. Nilikʉkɨpeela ɨkɨsina kyako ɨɨsi ɨjɨ, vuuva vʉhaasi vwave amasiki ghooni!’ ”
5 ɄYakovo akafijovagha iiti, “Avanaako vavɨlɨ vano vaholilue kʉ Misili kʉno ye nɨkyale kukwisa kʉlyʉve kʉno, ʉEfulaimu nʉ Manase, viiva vanango ndavʉle ʉLubeni nʉ Simioni. 6 Neke avaana vano ghupaapa pambele, viiva vaako. Avuo vilihaala ɨɨsi sino sili mʉ vʉhaasi vwa Efulaimu nʉ Manase.
7 “Nɨvombile ʉluo vwɨmɨla ʉmama ghwinu ʉLaheli. Ye nigomoka kuhʉma kʉ Mesopotamia, nɨlyale nʉ lʉsukunalo ʉlʉkome, ʉlwakʉva ʉmama ghwinu akafwɨla mʉ sɨla. Ʉnsiki ʉghuo tʉlyale piipi nɨ lɨkaaja ɨlya Efulati mʉ ɨɨsi ɨja Kanaani. Pe nɨkansyɨla mʉlʉbale mʉ sɨla ɨja kʉlʉta kʉ Efulati, kwekʉti kʉ Betelehemu.”
8 ɄYakovo ye ɨkʉvaagha avaana va Yosefu, akamposia akati, “Ava ve vaveeni?” 9 ɄYosefu akamwamʉla ʉviise akati, “Ava vanango, ve vano ʉNgʉlʉve akamheliile kʉno.”
ɄYakovo akati, “Vavesie apa, nilonda kʉkʉvafuunya.” 10 Amaaso gha Yakovo naghalyale ghilola vʉnofu vwɨmɨla ʉvʉghogholo vwake. ɄYosefu akavavesia avanaake kwa viise. Pe ʉYakovo akavanonela na kʉkʉvaghumbatɨla. 11 ɄYakovo akamʼbʉʉla ʉYosefu akati, “Mwanango, nanɨkakagwile kuuti ndepoonu nɨkʉkwagha kange, neke lɨno ʉNgʉlʉve anhangile nɨvaghile nava vanaako.”
12 ɄYosefu akavavʉsia avanaake pa mafundo gha Yakovo, akamwinamɨla kuhanga kufika paasi. 13 Pe akavatoola kange avanaake vavɨlɨ. Akamʼbɨɨka ʉEfulaimu kʉ lʉvoko lwake ʉlwa ndio, kʉkʉmʉlʉngamɨsia kʉ lʉvoko ʉlwa ngʼhɨghɨ ʉlwa Yakovo. Ghwope ʉManase akamʼbɨɨka kʉ lʉvoko lwake ʉlwa ngʼhɨghɨ, kʉkʉmʉlʉngamɨsia kʉ lʉvoko ʉlwa ndio ʉlwa Yakovo. Akavavesia pa paapa ghwave. 14 Neke ʉYakovo akandʉlania amavoko ghaake. Ʉlʉvoko lwake ʉlwa ndio akalʉvɨɨka kʉ mutu ghwa Efulaimu, jʉno alyale nʼdebe. Ʉlʉvoko lwake ʉlwa ngʼhɨghɨ akalʉvɨɨka kʉ mutu ghwa Manase, jʉno alyale mʼbele.
15 Pe akamfuunya ʉYosefu akati,
“ɄNgʉlʉve jʉno avakʉʉlʉ vango ʉAbulahamu nʉ Isaka vakamʼbɨngɨlɨlagha,
ʉNgʉlʉve jʉno andɨmile mʉ vwʉmi vwango kuhanga kufika ʉmʉsyʉghʉ,
16 ʉnyamhola ghwake alyamhokile mʉ mbiivi sooni,
avafunyaghe avasoleka ava.
Vwɨmɨla avasoleka ava, lɨkʉmbʉkwaghe ɨlɨtavua lyango,
na matavua gha vakʉʉlʉ vango ʉAbulahamu nʉ Isaka.
Volokaghe, vavisaghe vinga.”
17 ɄYosefu ye avwene ʉviise avɨkile ʉlʉvoko lwake ʉlwa ndio kʉ mutu ghwa Efulaimu, naakakeela. Pe akakola ʉlʉvoko lwa viise kʉ mutu ghwa Efulaimu, ilonda pivɨɨka kwa Manase. 18 Akamʼbʉʉla ʉviise akati, “Ndali nhaata, nafye lʉlɨvuo! Ʉjʉ apa ghwe mwanango ʉmʼbele. Ʉvɨɨke ʉlʉvoko lwako ʉlwa ndio kʉ mutu ghwake.”
19 Neke ʉviise akakaana akati, “Mwanango, nɨkagwile. Avaana va Manase voope viiva kɨsina kɨvaha. Neke ʉnnuuna iiva mʼbaha kukila, ʉmwoloko ghwake fiiva fisina finga.” 20 Ɨkɨghono ɨkio, ʉYakovo akavafuunya akati,
“AVaisilaeli vifunyanagha mʉlwa kʉtambʉla amatavua ghiinu,
vitisagha, ‘ɄNgʉlʉve akʉfuunye ndavʉle ʉEfulaimu nʉ Manase!’ ”
Fye enendɨɨkɨ ʉYakovo alyamʼbɨkile ʉEfulaimu kuuva ntasi kwa Manase.