ɄYakovo ɨkʉmfuunya ʉFalao
47
Pe ʉYosefu akalʉta kwa Falao, akamʼbʉʉla akati, “Ʉnhaata na vanyalʉkolo vango, visile kuhʉma mʉ ɨɨsi ɨja Kanaani, palɨkɨmo ni ngʼombe, ingʼholo, imhene ni fiinu fyave fyoni. Lɨno, valɨ kʉ Gosheni.” 2 ɄYosefu akasalʉla vahaano mʉ vakʉlʉ vaake, akavatwala kwa Falao, valʉte kukujoleka.3 ɄFalao akavaposia avakʉlʉ va Yosefu akati, “Muvomba ɨmbombo nyɨki?” Vakamwamʉla vakati, “Ntwa ghwitu, ʉsue tʉlɨ vakami vaako. Ʉsue tʉlɨ vadɨɨma fidɨmua ndavʉle valyale avakʉʉlʉ viitu.” 4 Kange, vakamʼbʉʉla vakati, “Twisile kukukala padebe kʉno kʉ vʉhesia, ʉlwakʉva kʉ ɨɨsi ɨja Kanaani kʉlɨ njala ɨngʼhali. Kʉla nakwekʉle ʉkwa kʉdɨmɨla ifidɨmua fiitu. Ghwe ntwa ghwitu, ʉsue twe vakami vaako tʉkʉkʉsʉʉma ʉtwɨtɨkɨsie tukalaghe imbale isa kʉ Gosheni.”
5 ɄFalao akamʼbʉʉla ʉYosefu akati, “Ʉnhaata ghwako na vanyalʉkolo vaako visile kʉlyʉve kʉ Misili kʉno. 6 Ɨɨsi jooni ɨja Misili jɨlɨ mʉ vwɨmɨlɨli vwako. Ʉvapeele, ʉnhaata ghwako na vanyalʉkolo vaako ʉlʉbale ʉlʉnofu kukila imbale sooni mʉ ɨɨsi ɨjɨ. Ʉvapeele ɨɨsi ɨja Gosheni, vikalaghe ʉkuo. Nave ʉvakagwile avaanhu avanya ngʉfu mʉ veene, ʉvavɨɨke vaave vɨmɨlɨli va fidɨmua fyango.”
7 Pe ʉYosefu akantwala ʉviise kwa Falao kʉkʉmhʉfia. ɄYakovo akamfuunya ʉFalao. 8 ɄFalao akamposia akati, “Ʉlɨ na maaka ghalɨngi?” 9 ɄYakovo akati, “Amaaka ghango agha kʉhamahaama ghafikile kɨlʉndo kɨmo ni fijigho fitatu, ghamemile ʉlʉpumuko. Amaaka aghuo madebe kukila amaaka ghano vakahamaghahamagha vakʉʉlʉ viitu.” 10 Pe ʉYakovo akamfuunya ʉFalao, akavʉʉka ilʉta.
11 Pepano ʉYosefu akampeela ʉviise na vanyalʉkolo vaake imbale inofu isa ɨɨsi ɨja Misili. Akavapeela ɨlɨkaaja ɨlya Lamesesi, paave pa kukala aveene, ndavʉle ʉFalao vʉle amʉlaghɨla ʉYosefu. 12 Pe ʉYosefu akava ɨkʉvapeela ifyakʉlia, ʉviise na vanyalʉkolo vaake na vaanhu vooni ava mʉ nyumba ɨja viise kulɨngʼhana nʉ vwinga vwave.
ɄYosefu itanga avaanhu amasiki gha njala
13 Pambele kʉkava kʉsili ifyakʉlia mʉ ɨɨsi jooni ɨja Misili nɨ ja Kanaani. Ɨnjala jɨkava ngʼhali kyongo kuhanga avaanhu vooni mʉ ɨɨsi isio vakava vighanda. 14 ɄYosefu akakongʼhania indalama sooni sino avaanhu ava kʉ Misili na kʉ Kanaani valyaghʉliile ifyakʉlia kwa mwene, akasitwala kʉ nyumba ɨja kɨtwa.
15 Indalama isa vaanhu ava kʉ Misili na kʉ Kanaani ye sisilile, aVamisili vooni vakalʉta kwa Yosefu na kʉkʉmʼbʉʉla kuuti, “Indalama siitu sisilile, tufua pamaaso ghaako, ʉtʉpeele ifyakʉlia!”
16 ɄYosefu akavavʉʉla akati, “Nave indalama siinu sisilile, mʉleete ifidɨmua fiinu, twananie ni fyakʉlia.” 17 Pe avaanhu avuo vakamʉletela ʉYosefu ifidɨmua fyave, ifalaasi, ingʼholo, imhene, ingʼombe ni dogovi. Ʉmwaka ʉghuo ʉYosefu akavapeela ifyakʉlia mʉlwa kwanania ni fidɨmua fyave fyoni.
18 Ʉmwaka ghʉno ghʉkavɨngɨlɨla, vakiisa kange vakamʼbʉʉla vakati, “Ntwa, kyangʼhaani indalama siitu sooni sisilile, nafi fidɨmua fiitu fyako! Lɨno, tʉlɨ vasila kɨɨnu ɨkya kʉkʉpeela, ʉlwene amavɨlɨ ghiitu na maghʉnda ghiitu. 19 Nʉngatʉlekaghe tʉfue! Amaghʉnda ghoope malaghafu. Ʉtʉghʉle ʉsue na maghʉnda ghiitu kukwanania ni fyakʉlia. Ʉsue tuuva vakami va Falao nagha maghʉnda ghiitu ghiiva ghaake. Tufua nɨ njala, ʉtʉpeele ɨmbeju, ɨɨsi jiitu jɨleke kuuva vʉkɨva.”
20 Pe ʉYosefu akamʉghʉlɨla ʉFalao ɨɨsi jooni ɨja Misili. AVamisili vooni vakaghʉsia amaghʉnda ghaave ghooni, ʉlwakʉva ɨnjala jɨlyale ngʼhali. Ɨɨsi jooni jɨkava ja Falao. 21 ɄYosefu akavavɨɨka avaanhu imbale sooni isa Misili kuuva vakami va Falao. 22 Neke ʉYosefu naakaghʉla amaghʉnda agha vatekesi ava Vamisili, ʉlwakʉva aveene valyale vikwʉpɨla ɨlɨghavo kuhʉma kwa Falao, vooni valyale ni fyakʉlia ifya kʉkwɨlana. Fye nambe navalyaghʉsisie amaghʉnda ghaave.
23 ɄYosefu akavavʉʉla avaanhu akati, “Lɨno, nɨvaghʉlile ʉmue mweni, palɨkɨmo na maghʉnda ghiinu, kuuva kyʉma kya Falao. Lɨno, mupelua ɨmbeju, mʉlʉte mʉvyale mʉ maghʉnda. 24 Neke muliiva mupeta, ɨkɨghavo kɨmo mʉ fighavo fihaano ghuuva mpeto ghwa Falao. Pe ifighavo fine fino fisighala fivisagha mbeju ni fyakʉlia fiinu, palɨkɨmo na vaana viinu na vaanhu ava mʉ nyumba siinu.”
25 Vakamʼbʉʉla vakati, “Ghwe ntwa ghwitu, ʉtʉpokile! Ʉtʉhʉfisie ʉvʉnofu vwako. Tuuva vakami va Falao.”
26 Fye enendɨɨkɨ ʉYosefu alyavɨkile ʉlʉlaghɨlo mʉ ɨɨsi ɨja Misili. Ʉlʉlaghɨlo ʉluo luvombeka kuhanga kufika ifighono ifi mʉ ɨɨsi ɨja Misili kuuti, ɨkɨghavo kɨmo mʉ fighavo fihaano ifya mpeto, kyʉma kya Falao. Looli mʉ maghʉnda agha vatekesi aVamisili, navakaghavagha amaghavo aghuo.
ɄYosefu ijɨɨgha kʉkʉnsyɨla vʉnofu ʉviise ʉYakovo
27 Avaisilaeli vakikala imbale isa kʉ Gosheni, mʉ ɨɨsi ɨja Misili. Vakava nɨ kyʉma kinga na kukwoloka fiijo. 28 ɄYakovo akikala mʉ ɨɨsi ɨja Misili amaaka kɨjigho na lekelalʉbale. Amaaka ghaake ghooni mʉ vwʉmi, ghalyale kɨlʉndo kɨmo ni fijigho fine na lekelalʉbale.
29 ɄYakovo ye alɨ piipi kufua, akankemeela ʉmwanaake ʉYosefu akati, “Nave kyangʼhaani ʉnganile, ʉvɨɨke ʉlʉvoko lwako kʉ vwotelo vwango, ʉjɨɨghe kuuti ghʉkʉmbombela inofu sino sinoghiile sino nilʉta pikʉkʉvʉʉla! Nɨkʉkʉsʉʉma nʉngasyɨlaghe ʉne kʉ Misili kʉno. 30 Nɨngafue kuuva na vakʉʉlʉ vango, ʉnholaghe kuhʉma apa pa Misili, ʉlʉtaghe ʉsyɨlaghe kʉ Kanaani kʉ mbiipa sa vakʉʉlʉ vango.” ɄYosefu akati, “Nivomba ndavʉle ʉjovile.”
31 ɄYakovo akamʼbʉʉla akati, “Jɨɨgha.” ɄYosefu akajɨɨgha. Pe ʉYakovo akinama, akeghama ʉlʉbale ʉlwa kʉ mutu ʉlwa kɨtala kyake.