ɄYakovo na vaanhu vaake vihamɨla kʉ Misili
46
Pe ʉYakovo akalʉta kʉ Misili na vaanhu vaake ni fiinu fyake fyoni. Ye afikile kʉ Beeli-Sheba, akahʉmia ɨlɨtekelo kwa Ngʉlʉve ghwa Isaka, ʉviise. 2 Ɨkɨlo ye jɨfikile, ʉNgʉlʉve akajova nʉ Yakovo mʉ njosi, akankemeela, “Yakovo, Yakovo!” ɄYakovo akɨtɨka akati, “Nɨlɨ apa.”3 ɄNgʉlʉve akamʼbʉʉla akati, “Ʉne neene Ngʉlʉve ghwa nhaata ghwako, nʉngoghopaghe kulʉta kʉ Misili, ʉlwakʉva ʉkuo nɨkʉkʉvɨɨka kuuva kɨsina kɨvaha. 4 Ʉne nilʉta palɨkɨmo nuuve kʉ Misili, neke nilikʉkʉgomosia kange kʉ Kanaani. Ghuliiva ghufua, ʉYosefu jʉjuo ghe mwene ilikʉkʉghonja.”
5 ɄYakovo akavʉʉka kʉ Beeli-Sheba. Avaana vaake vakantoola ʉmwene na vaana vaave avadebe palɨkɨmo na vadala vaave. Vakavatoola mʉ magaale ghano ʉFalao akasungʼhile kʉkʉntoola ʉYakovo. 6 Vakatoola ni fidɨmua ni fiinu ifingi fyoni, fino valyale nafyo kʉ Kanaani. ɄYakovo nʉ mwoloko ghwake ghwoni vakahamɨla kʉ Misili. 7 Akatoola avaana vaake, avisukulu avahɨnja na vadɨɨmi. Ɨkɨsina kyake kyoni akakɨleeta kʉ Misili.
Ɨkɨsina kya Yakovo
8 Agha ghe matavua gha vaana va Isilaeli jʉno itambʉlua Yakovo, vano valingiile kʉ ɨɨsi ɨja Misili. ɄLubeni ghwe mʼbele mwa Yakovo.
9 Avaana va Lubeni ghwe Hanoki, ʉPalu, ʉHesiloni nʉ Kalimi.
10 Avaana va Simeoni ghwe Yemueli, ʉYamini,
ʉOhadi, ʉYakini, ʉSohali
nʉ Shauli ʉmwana jʉno alyapapilue mwa nʼdala ʉMʉkanaani.
11 Avaana va Leevi ghwe Gelishoni, ʉKohati nʉ Melali.
12 Avaana va Yuuda ghwe Eli, ʉOnani, ʉShela, ʉPelesi nʉ Sela.
Neke ʉEli nʉ Onani valyafwɨliile mʉ ɨɨsi ɨja Kanaani.
Avaana va Pelesi ghwe Hesiloni nʉ Hamuli.
13 Avaana va Isakali ghwe Tola, ʉPuva, ʉYashubu nʉ Shimloni.
14 Avaana va Sabuloni ghwe Seledi, ʉEloni nʉ Yaleeli.
15 Avuo ve vaana avadɨɨmi vano ʉYakovo alyapapile nʉ Lea mʉ ɨɨsi ɨja Mesopotamia, palɨkɨmo nʉ mwanaake ʉmhɨnja ʉDina. Avaana na visukulu vaake vano alyapapile nʉ Lea valyale fijigho fitatu na vatatu.
16 Avaana va Gadi ghwe Sefoni, ʉHagi, ʉShuni,
ʉEsiboni, ʉEli, ʉAlodi nʉ Aleli.
17 Avaana va Asheli ghwe Imna, ʉIshiva, ʉIshivi, ʉBelia,
palɨkɨmo nʉ Sela ʉlʉmbʉ ghwave.
Avaana va Belia ghwe Hebeli nʉ Malikieli.
18 Avuo ve vaana vano ʉYakovo alyapapile nʉ Silipa, ʉnkami jʉno ʉLabani alyampeliile ʉmwalɨve ʉLea. Avaana na visukulu vaake vano alyapapile nʉ Silipa valyale kɨjigho na ntanda.
19 Avaana vano ʉYakovo alyapapile kwa Laheli
ghwe Yosefu nʉ Benyamini.
20 Avaana vano ʉYosefu alyapapile mʉ ɨɨsi ɨja Misili
ghwe Manase nʉ Efulaimu.
Avasoleka avuo, akapaapa nʉ Asenati, jʉno ʉviise alyale ghwe Potifela ʉntekesi ghwa lɨkaaja lya Oni.
21 Avaana va Benyamini ghwe Bela, ʉBekeli, ʉAshibeli, ʉGela,
ʉNaimani, ʉEhi, ʉLoshi, ʉMupimu, ʉHupimu nʉ Alidi.
22 Avuo ve vaana na visukulu vano ʉYakovo alyapapile kwa Laheli. Valyale kɨjigho na vane.
23 Ʉmwana ghwa Dani ghwe Hushimu.
24 Avaana va Nafutali ghwe Yaseeli, ʉGuni, ʉYeseli nʉ Shilemu.
25 Avuo ve vaana va Yakovo vano alyapapile nʉ Biliha, ʉnkami jʉno ʉLabani alyampeliile ʉmwalɨve ʉLaheli. Avaana na visukulu vaake vano alyapapile nʉ Biliha valyale lekelalʉbale.
26 Avaanhu vooni vano ʉYakovo alyahamile navo kulʉta kʉ ɨɨsi ɨja Misili, valyale fijigho ntanda na ntanda kɨsila kʉvala avadala vaave. 27 Kʉ Misili ʉkuo, ʉYosefu alyapapile avaana avadɨɨmi vavɨlɨ. Ɨkɨsina kyoni ɨkya Yakovo vano valikalile mʉ ɨɨsi ɨja Misili valyale avaanhu fijigho lekelalʉbale.
ɄYakovo ifika kʉ Misili
28 ɄYakovo akansuungʼha ʉYuuda alʉte kwa Yosefu kuuti ansoone ɨsɨla ɨja kʉlʉta kʉ Gosheni. Ye vafikile kʉ Gosheni, 29 ʉYosefu akapanda ɨgaale jaake ɨja kʉkwesua ni falaasi, akalʉta kʉ Gosheni kʉkʉmwʉpɨla ʉviise. Ye afikile pa viise, akamʉyayɨla na kulɨla ʉnsiki ntali.
30 Pe ʉYakovo akamʼbʉʉla ʉYosefu akati, “Lɨno, nambe nɨfwisaghe, nakʉlɨ kɨmonga kʉlyʉne, ʉlwakʉva nɨkʉmwene na maaso ghango kuuti ʉjiighe mwʉmi.”
31 ɄYosefu akavavʉʉla avanine palɨkɨmo na vange vooni ava mʉ nyumba ɨja nhaata ghwake akati, “Nilʉta kʉkʉmʼbʉʉla ʉFalao kuuti avanyalʉkolo vango, vano valyale vikukala kʉ ɨɨsi ɨja Kanaani, palɨkɨmo na vaanhu va mʉ nyumba ɨja nhaata, vooni visile kʉlyʉne. 32 Nɨkʉmʼbʉʉla kuuti, avaanhu ava vadɨɨma fidɨmua, visile ni mhene, ingʼholo, ingʼombe ni fiinu fyave fyoni.
33 “Lɨno, ʉFalao angavakemeele na kʉkʉvaposia kuuti, ‘Muvomba ɨmbombo nyɨki?’ 34 Mʉtisaghe, ‘Ʉsue tʉlɨ vavombi vaako. Ʉsue tʉlɨ vadɨɨma fidɨmua kuhʉma ʉvwana vwitu kuhanga kufika ʉmʉsyʉghʉ, ɨmbombo ɨjɨ tʉlyʉpiile kuhʉma kʉ vakʉʉlʉ viitu.’ Apuo pe mukwɨtɨkɨsɨvua kukukala imbale isi isa Gosheni, ʉlwakʉva aVamisili navavaghanile avadɨɨma fidɨmua.”