ɄYosefu ikuhʉfia kʉ vanyalʉkolo vaake
45
Apuo ʉYosefu akakunua kange pikusigha pilɨla pamaaso gha vaanhu vano valyɨmile piipi nʉ mwene, akavavʉʉla akati, “Mweni mʉhʉme kʉnji.” Akajigha ʉmwene na vanine vala, pe akijoleka kʉ veene. 2 Akalɨla fiijo kuhanga voope aVamisili vakapʉlɨka. Voope avaanhu ava mʉ nyumba ɨja Falao vakapʉlɨka.3 Pe ʉYosefu akavavʉʉla avanine akati, “Ʉne neene Yosefu! Ʉnhaata ghwango ajiighe mwʉmi?” Avanine vakakunua kʉkʉmwamʉla, ʉlwakʉva vakaale nʉ lʉdwesi ʉlʉkome.
4 Pe ʉYosefu akavavʉʉla kange akati, “Namʉngoghopaghe, veela palyʉne!” Vakaveela, akavavʉʉla akati, “Ʉne neene Yosefu, ʉnnunaviinu jʉno mʉlyamʉghusisie kʉ Misili! 5 Neke lɨno namʉngoghopaghe nambe kukupɨɨka kuuti kɨki mʉkangʉsisie! ɄNgʉlʉve jʉjuo ghwe jʉno alyavapeleliile mʉngʉsie, nɨvalongolele niise nɨpoke ʉvwʉmi vwinu. 6 Ʉghʉ mwaka ghwa vʉvɨli ʉghwa njala mʉ ɨɨsi. Ghakyale amaaka aghange ghahaano ghano avaanhu vikunwagha kulɨma nambe kupeta. 7 ɄNgʉlʉve jʉjuo ghwe jʉno alyandetile kʉno nɨvalongolele, kuuti nɨvapoke kuhʉma mʉ lʉpumuko ʉlʉvaha, neke ɨkɨkolo kiitu kɨleke pisovanɨka.
8 “Mʉ ʉluo, nakwekʉti mwemue mʉlyandetile kʉno, looli ghwe Ngʉlʉve. Ambɨkile kuuva hwene nɨlɨ viise ghwa Falao, nɨɨve mʼbaha ghwa vaanhu ava mʉ nyumba jaake na kuuva ntemi ghwa ɨɨsi jooni ɨja Misili.
9 “Lɨno, mʉlʉte ngʼhaningʼhaani kwa nhaata! Mʉmʼbʉʉle kuuti, ‘Ʉmwanaako ʉYosefu iiti, ʉNgʉlʉve ambɨkile kuuva ntemi ghwa ɨɨsi jooni ɨja Misili. Nʉngadɨlaghe kukwisa kʉlyʉne. 10 Ʉve na vanaako, avisukuluvo, ifiinu fyako ni fidɨmua fyako fyoni, mukukalagha imbale isa kʉ Gosheni, muvisagha piipi nuune. 11 Ʉkuo nɨkʉkʉlolelelagha ʉve na vanyalʉkolo vaako palɨkɨmo ni fidɨmua fyako. Nɨkʉvapeela ɨkyakʉlia, kuuti mʉleke kufua nɨ njala, ʉlwakʉva ghajiighe amaaka ghahaano agha njala.’ ”
12 ɄYosefu akavavʉʉla kange akati, “Jʉmue mulolile na maaso ghiinu, najʉ nnunavango ʉBenyamini ghwope alolile na maaso ghaake kuuti, kyangʼhaani neene Yosefu ne jʉno nijova numue. 13 Mʉlʉte mʉmʼbʉʉle ʉnhaata kuuti, ʉne nɨlɨ muunhu mʼbaha fiijo mʉ ɨɨsi ɨja Misili. Mʉmʼbʉlaghe sooni sino mʉsivwene. Pe mʉmʉleete ʉnhaata ghwango ngʼhaningʼhaani.”
14 Pe ʉYosefu akamʉghumbatɨla ʉnnuuna ʉBenyamini, vakatengʉla kulɨla kʉmo vaghumbatɨliine. 15 Neke akavaghumbatɨla avakʉlʉ vooni kʉmo ilɨla. Apuo pe avanyalʉkolo vaake vakatengʉla kujova naghwo.
ɄFalao ɨkʉnkemeela ʉYakovo
16 Imhola isio ye sifikile mʉ nyumba ɨja kɨtwa ɨja Falao, kuuti avanyalʉkolo vaake ʉYosefu visile, ʉFalao na vatangɨli vaake vooni vakahovoka fiijo.
17 ɄFalao akamʼbʉʉla ʉYosefu akati, “Ʉvavʉʉle avanyalʉkolo vaako, vatosie amasigho pa dogovi saave, vagomoke kʉ Kanaani. 18 Valʉte vamʉleete ʉnhaata ghwinu na vanyalʉkolo viinu vooni, ʉne nɨkʉvapeela apa kukala, pa vʉnofu fiijo mʉ ɨɨsi ɨja Misili, mulisagha ifinono fino fili mʉ ɨɨsi ɨjɨ.
19 “Ʉvavʉʉle kuuti, ‘Mʉtoole amagaale agha kʉkwesua ni falaasi kuhʉma kʉ Misili kʉkʉvaleeta avadala viinu na vaana viinu. Mʉkamʉleete ʉnhaata ghwinu apa. 20 Namʉngahangajɨkɨlaghe ɨkyʉma kiinu, ʉlwakʉva ʉvʉmofu ni nofu sooni isa mʉ Misili siiva siinu.’ ”
21 Avaana va Yakovo vakavomba ndavʉle vavʉlilue. ɄYosefu akavapeela amagaale ghano ghikwesua ni falaasi ndavʉle alaghiile ʉFalao, akavapeela ni fya kʉlia mʉ sɨla. 22 Vooni vakapelua amenda amapia, looli ʉBenyamini akapelua indalama filʉndo fitatu na menda ghahaano agha kwandʉla. 23 Kange, akalaghɨla vantwalɨlaghe ʉviise ʉlʉvonolo: idogovi kɨjigho sino sikapɨndile ifiinu ifinofu ifya mʉ ɨɨsi ɨja Misili, idogovi ingʼina kɨjigho sino sikapɨndile ifyakʉlia ifipete, amakate ni fingi ifya kʉlia ʉviise mʉ sɨla.
24 Pepano ʉYosefu akalaghana na vanine. Ye vivʉʉka, akavavʉʉla akati, “Namʉngalwisaghe mʉ sɨla.” 25 Pe vakavʉʉka kʉ Misili vigomoka kwa nhaata ghwave mʉ ɨɨsi jaave ɨja Kanaani.
26 Ye vafikile kwa nhaata ghwave, vakamʼbʉʉla vakati, “ɄYosefu mwʉmi! Ʉmwene ghwe ntemi ghwa ɨɨsi jooni ɨja Misili!” ɄYakovo akadegha fiijo, naakɨtɨka amasio ghaave. 27 Neke ye vamʼbʉlile amasio ghooni agha Yosefu ndavʉle avalaghɨla, na kʉkʉghaagha amagaale ghano ʉYosefu asuungʼha kʉkʉntoola, ʉmwojo ghwake ghʉkahovoka fiijo.
28 ɄYakovo akati, “Lɨno nɨtiike! Ʉmwanango ʉYosefu ajiighe mwʉmi. Nɨlʉte nɨkamʉlole, pano nɨkyale pifua.”