Ɨkɨkombe kivoneka kwa Benyamini
44
Pe ʉYosefu akamʉlaghɨla ʉmwɨmɨlɨli ghwa nyumba jaake akati, “Ʉmemie mʉ magunila gha vaanhu ava, ɨkyakʉlia kɨno ndepoonu vipɨnda. Ʉvɨɨke indalama saave nʉjʉnge pa mʉlomo ghwa lɨgunila lyake. 2 Mʉ lɨgunila ɨlya nʼdebe, ʉvɨɨke ɨkɨkombe kyango kɨno kɨtendilue na madini gha ndalama, ʉvɨɨke ni ndalama saake.” Ʉmwɨmɨlɨli jʉla akavomba ndavʉle avʉlilue. 3 Ye kʉkiile, avakʉlʉ va Yosefu vakɨtɨkɨsivua kuvʉʉka ni dogovi saave.4 Vakatengʉla ʉlʉghendo. Neke ye vaghendile padebe kuhʉma mʉ lɨkaaja, ʉYosefu akamʼbʉʉla ʉmwɨmɨlɨli jʉla akati, “Ngʼhaningʼhaani, ʉvadagɨle avaanhu vala. Ʉngavakole, ʉvavʉʉle kuuti, ‘Kɨki mʉgomwisie ʉvʉviivi mʉ nofu sino vavavombiile? 5 Ɨkɨkombe ɨkɨ kye kɨno ʉmʼbaha ghwango inywela na kulaghʉlɨla. Mʉvombile fivi kuhɨɨja.’ ”
6 Ʉmwɨmɨlɨli jʉla akavadagɨla, akavakola, akavavʉʉla amasio ghala ghala. 7 Vakamʼbʉʉla vakati, “Ntwa, kɨki ʉkʉtʉpɨɨka enendɨɨkɨ? Ʉsue twe vakami vaako, natʉngavombe isio lʉsiku! 8 Ʉkʉmbʉke indalama sila sino tʉkasivwene mʉ magunila ghiitu, tʉkʉgomokisie kuhʉma mʉ ɨɨsi ɨja Kanaani. Pe luuva ndaani kange tʉhɨɨje indalama nambe isahabu, mʉ lɨkaaja ɨlya mʼbaha ghwitu? 9 Nave ʉkyaghe ɨkɨkombe ɨkio kwa jʉmonga mʉlyʉsue, abudue! Na jʉsue twe vano tʉsighiile tuuva vakami vaako.”
10 Ʉmwɨmɨlɨli jʉla akati, “Eena, fye lʉvisaghe ndavʉle mʉjovile. Ʉmuunhu ghweni nɨngamwaghe nɨ kɨkombe ɨkio, iiva nkami ghwango, looli mwe vange mweni muuva vasila nkole.”
11 Pe nʉjʉnge akisia ɨlɨgunila lyake ngʼhaningʼhaani na kuhʉdʉla. 12 Ʉmwɨmɨlɨli jʉla akatengʉla kulonda mʉ magunila ghooni, kutengʉlɨla kwa mʼbele kuhanga kwa ngʼhwangu. Ɨkɨkombe kɨla kɨkavoneka mʉ lɨgunila ɨlya ngʼhwangu ʉBenyamini.
13 Ye valʉvwene ʉluo, vakademʉla amenda ghaave nʉ lʉsukunalo. Vakatosia amagunila ghaave pa dogovi saave, vakagomoka mʉ lɨkaaja.
14 Ʉnsiki ʉghuo ʉYosefu akajiighe kʉ kaaja kwa mwene. ɄYuuda na vanine ye vafikile kʉ kaaja kwa Yosefu, vakafughama pa maghʉlʉ ghaake kʉkʉmpelepesia. 15 ɄYosefu akavavʉʉla akati, “Kɨki mʉvombile ʉlʉ? Namʉkagwile kuuti ʉne nɨlɨ ni ngʉfu isa kʉlaghʉla na kukagʉla sooni?”
16 ɄYuuda akati, “Ghwe ntwa ghwitu, tʉʉti kɨki? Tʉjove kɨki kuhʉfia kuuti tʉlɨ vasila nkole? ɄNgʉlʉve ahʉfisie ʉvʉhosi vwitu pa vʉvalafu! Ʉsue palɨkɨmo na jʉno aveele nɨ kɨkombe kyako, tweni tʉlɨ vakami vaako.”
17 Neke ʉYosefu akati, “Ndali! Nanɨngavombe ʉluo! Jʉno aveele ahɨjile ɨkɨkombe kyango, ghwe mwene iiva nkami ghwango. Mwe vange mweni mʉgomokaghe nʉ lʉtengaano kwa nhaata ghwinu.”
ɄYuuda ɨkʉntanga ʉBenyamini
18 Pe ʉYuuda akamʼbelelela ʉYosefu akamʼbʉʉla akati, “Ghwe ntwa, ʉne nɨlɨ nkami ghwako, nɨkʉkʉsʉʉma nɨjove amasio madebe. Ghwe ntwa ghwango, nʉngangʼhalalɨlaghe napano ʉve ʉlɨ ndavʉle ʉFalao jʉjuo. 19 Ʉve ghwe ntwa ghwitu ʉkatʉposisie kuuti, ‘Mʉlɨ nʉ nhaata ghwinu nambe ʉnnunaviinu ʉjʉnge?’ 20 Ʉsue tʉkakʉvʉlile kuuti, ‘Ʉnhaata ajiighe mwʉmi, mʉghogholo fiijo. Kange, tʉlɨ nʉ nnunaviitu jʉno ʉnhaata akampapile mʉ vʉghogholo vwake. Ʉnnunaviitu ʉjʉ, ʉnkʉlʉ ghwake mwa ngʼina alyafwile. Lɨno ʉjʉ, asighiile mwene mwa ngʼina, kange ghwe mʉghanɨke fiijo kwa nhaata ghwitu.’
21 “Ntwa ghwango, ʉkatʉvʉlile ʉsue twe vakami vaako kuuti tʉkamʉleete ʉnnunaviitu, neke ʉmwaghe. 22 Tʉkakʉvʉʉla kuuti, ‘Naangamʉleke ʉviise. Angamʉleke, ʉviise ifua.’ 23 Neke ʉkatʉvʉʉla twe vakami vaako ʉkati, ‘Nanɨngavʉpɨle kange, nave namukwisa nʉ ngʼhwangu.’ 24 Ye tʉgomwike kwa nhaata, ʉnkami ghwako, twamʼbʉʉla sino ʉkatʉvʉlile.
25 “Pe ʉnhaata akatʉvʉʉla akati, ‘Mʉgomoke mʉlʉte kughʉla ɨkyakʉlia ɨkɨngɨ.’ 26 Twamʼbʉʉla twati, ‘Natulʉta ʉkuo, nave natulongosania nʉ nnunaviitu. Nave natulʉta nʉ nnunaviitu, ʉmʼbaha jʉla kyaikaana kʉkʉtwʉpɨla kange.’
27 “Ʉnkami ghwako ʉnhaata ghwango akatʉvʉʉla akati, ‘Mʉkagwile kuuti ʉnʼdala ghwango ʉLaheli, akamhapiile avaana vavɨlɨ. 28 Jʉmonga alyasovaniike lwoni, kyangʼhaani alyademʉlilue finyughunyughu. Nanɨmwaghile kuhʉma ʉnsiki ʉghuo! 29 Nave mʉkʉntoola ghwope ʉBenyamini, lʉngamwaghe ʉlʉtalamu, ʉne ne mʉghogholo muuva mʉndetiile ʉlʉsukunalo ʉlʉkome lʉno lʉkʉmbuda.’
30 “Lɨno ntwa ghwango, nanɨngagomoke kwa nhaata kɨsila nsoleka ʉjʉ. Ʉvwʉmi vwa nhaata vʉlɨ kwa nsoleka ʉjʉ. 31 Angavone natʉlɨ naghwo, kyangʼhaani ifua. Ʉsue natʉnoghiile kʉkʉmʼbuda ʉnhaata ghwitu mʉlwa kʉmpelela ʉlʉsukunalo ʉlʉkome mʉ vʉghogholo vwake. 32 Ʉne ne nkami ghwako nɨkajɨghile kwa nhaata kuuti niiva mʉloleleli ghwa nsoleka ʉjʉ. Nɨkamʼbʉlile kuuti, ‘Nɨngaleke kʉkʉnʼgomosia kʉlyʉve, nɨpɨkwaghe ifighono fyoni!’