LɄTI
ɄElimeleki nɨ nyumba jaake vihamɨla kʉ Moabu
1
1-2 Amaaka agha pamwande mʉ ɨɨsi ɨja Isilaeli ye vitema aValamʉli vano vakalongosyagha ndavʉle avatwa, jaghwile ɨnjala. Amaaka aghuo, pwealyale ʉmuunhu jʉmonga jʉno akatambʉlwagha Elimeleki, ʉmhʉma mʉ lɨkaaja ɨlya Betelehemu mʉ kɨghavo ɨkya Yuuda, mʉ kɨkolo kya Efulati. Ʉnʼdala ghwake alyale ghwe Naomi. Valyale na vaswambe vavɨlɨ, jʉmo akatambʉlwagha Maloni, ʉjʉnge Kilioni. Ʉlwakʉva jɨlyale njala mʉ ɨɨsi jaave, vakalamʉla kuhamɨla kʉ ɨɨsi ɨja Moabu kupona ɨnjala. 3 Ye valɨ kʉ Moabu ʉElimeleki akafua, ʉNaomi akasighala na vaswambe. 4 Avaswambe vakatoola avadala aVamoabu, jʉmo akatambʉlwagha ghwe Lʉti ʉjʉnge Olipa. Mʉ maaka kɨjigho ghano valikalile kʉ Moabu, 5 avaswambe va Naomi, ʉMaloni nʉ Kilioni voope vakafua.ɄNaomi nʉ nkamwana vigomoka kʉ Betelehemu
6 Pambele ʉNaomi akapʉlɨka ɨmhola kuuti, kʉ kaaja kʉ Betelehemu ʉMʉtwa ʉNgʉlʉve avapeliile ɨmota. Ye apʉliike ɨmhola ɨjio, akalamʉla kuvuja. 7 Akavʉʉka pano akikalagha na vakamwana, akava ivuja kʉ kɨghavo ɨkya Yuuda, avakamwana vakava vidagɨla. 8 Pe akavavʉʉla avakamwana akati, “Lɨno ʉmue mʉvujaghe kʉ vapaafi viinu. ɄMʉtwa ʉNgʉlʉve avatangaghe, avapelaghe inofu ndavʉle ʉmue mʉmbombiile ʉne na vanango vano vafwile. 9 ɄMʉtwa ʉNgʉlʉve avapelaghe avaghoosi avange neke mʉtenganaghe mʉ nyumba siinu.” Pe akavanonela. Avakamwana vakatengʉla pilɨla, 10 vakamwamʉla vakati, “Tulʉtania kʉ vanyalʉkolo vaako.”
11 Ʉmwene ʉNaomi akajova kange akati, “Mwe vanango, mʉvujaghe, kɨki mulonda pivɨngɨsania nuune? Ʉne nanɨngapaape avaana avange avadɨɨmi ava kʉvahaala ʉmue. 12 Ʉne nɨlɨ mʉghogholo, nanɨngatolue kange. Poope nambe nɨtolue ɨkɨlo jɨjɨɨjɨ nɨpaape avaana avadɨɨmi, 13 ndepoonu mughulila vahange vakʉle neke viise vavahaale ʉmue? Ndepoonu mukiva kujigha kɨsila vaghoosi? Ndali vanango! Ʉlʉpumuko lwango lʉtalamu kyongo kukila ʉlwinu, ʉlwakʉva ʉMʉtwa ʉNgʉlʉve avʉsisie ʉlufuunyo lwake kʉlyʉne.” 14 Ye ajovile isio vakalɨla kange. ɄOlipa akannonela ʉNaomi, akavʉʉka ivuja. Neke ʉLʉti akajigha ifikʉnʼdagɨla ʉnkamwana.
15 ɄNaomi akansyetʉkɨla ʉLʉti akati, “Lolagha, ʉnnino avujile kʉvanave, kʉ vanyalʉkolo vaake na kʉ mangʉlʉve ghaake, na jʉʉve lʉtagha.” 16 ɄLʉti akamwamʉla akati,
“Sivuo, ʉleke kʉkʉngʼhaana kulʉtania,
kange kʉkʉsigha kuvɨngɨsania nuuve.
Kʉno ghulʉta, tulʉtaniagha,
pano ghulʉta pikukala na jʉʉne nikukalagha baaho.
Avaanhu vaako vivisagha vango,
ʉNgʉlʉve ghwako ivisagha ghwango.
17 Pano ghulifwɨla na jʉʉne nifwɨlagha baaho,
pano ghusyɨlua na jʉʉne nisyɨlwagha bahapuo.
Ʉvʉfue vwe vʉlatʉbaghʉlania.
Nave nanivomba isio, ʉMʉtwa ʉNgʉlʉve amhelaghe ʉlʉtalamu.”
18 ɄNaomi ye avwene ʉnkamwana akangisie ʉlwa kulʉtania, akavʉhɨɨla kʉkʉnʼjofia ʉlwa kuvuja kʉ Moabu.
19 Pe vakavɨngɨsaniagha ve vavɨɨlɨ kuhanga kufika kʉ Betelehemu. Ye vafikile, avaanhu vooni vakava videgha, avakɨjʉʉva vakiposaniagha viiti, “Ʉjʉ ghwe Naomi?” 20 ɄNaomi akavavʉʉla akati, “Mʉlekaghe kʉkʉnhambʉla kuuti neene Naomi (kwekʉti anoghiile), mʉnhambʉlaghe Mala (kwekʉti vʉvafi), ʉlwakʉva ʉNgʉlʉve ʉNyangʉfu Sooni amheliile ʉlʉpumuko. 21 Nɨlyavʉkile apa nɨlɨ mmofu, neke ʉMʉtwa ʉNgʉlʉve angomwisie mavoko gheene. Kɨki kʉkʉnhambʉla ʉne Naomi, pano ʉMʉtwa ʉNgʉlʉve angʼhopile, ʉNgʉlʉve ʉNyangʉfu Sooni amheliile ʉlʉpumuko.”
22 ɄNaomi nʉ nkamwana ʉLʉti ye vifika mʉ Betelehemu kuhʉma kʉ Moabu, ghʉlyale nsiki ghwa kʉtengʉla kubena ɨngongilue.