ɄLʉti ihalaala kʉ maghʉnda gha Bohasi
2
Mʉ lɨkaaja ɨlya Betelehemu kwealyale ʉmuunhu jʉmonga jʉno akatambʉlwagha Bohasi. Ʉmuunhu ʉjuo alyale nyalʉkolo ghwa Elimeleki ʉmʉghoosi ghwa Naomi. ɄBohasi alyale mwoghopua kange mmofu. 2 Ɨkɨghono kɨmonga, ʉLʉti akitavʉla kwa nkamwana akati, “Lɨno nisʉʉma nɨlʉte kʉ maghʉnda, nɨkahalaale kwa muunhu jʉno kyaɨkʉnyʉpɨla.”a ɄNaomi akamwɨtɨka. 3 ɄLʉti akavʉʉka ilʉta. Ye afikile kʉ maghʉnda, akatengʉla pihalaala mʉmbele mʉ vavombi, hɨmbe muno afikiile ghwale mʉghʉnda ghwa Bohasi ʉnyalʉkolo ghwa Elimeleki.4 ɄBohasi akiisa kʉ maghʉnda kuhʉma kʉ Betelehemu, akavaagha avavombi, pe akavahʉngɨla akati, “ɄMʉtwa ʉNgʉlʉve avisaghe numue!” Voope vakamwɨtɨkɨla vakati, “ɄMʉtwa ʉNgʉlʉve akʉfunyaghe na jʉʉve!” 5 Ye avahʉngiile akamposia ʉmwɨmɨlɨli akati, “Ʉmhɨnja jʉla mwalɨve ghwani?” 6 Ʉmwɨmɨlɨli akatengʉla pikʉmwoleka akati, “Ʉla Mʉmoabu, ghwe jʉno akisile nʉ Naomi kuhʉma kʉ Moabu. 7 Aveele isile apa asʉmile kuuti, ahalalaghe ɨngongilue mʉmbele mʉ vavombi, nɨmwɨtɨkisie. Alɨndile ihalaala pihʉma lʉlwakɨlo, lɨno apʉmile padebe pa kyeve.”
8 Pe ʉBohasi akamʼbʉʉla ʉLʉti akati, “Mwalɨvango, ʉhalalaghe bahaapa, ʉlekaghe kulʉta kʉvʉnge, ʉvisaghe na vahɨnja avavomba mbombo vango. 9 Ʉvɨngɨsaniaghe navo, kange nɨvavʉlile avadɨɨmi avanya mbombo kuuti valekaghe pikʉkʉgasia. Ʉngavone ghwʉmilue amalenga, ʉlʉtaghe pa saaji kunyua amalenga ghano vaneghile avadɨɨmi avuo.” 10 ɄLʉti akafughama na kʉkʉmwinamɨla,b akati, “Nidegha kyongo, kɨki ʉkʉmbombela inofu isi napano nɨlɨ mʉgheesi mʉ ɨɨsi ɨjɨ?” 11 ɄBohasi akamwamʉla akati, “Nɨpʉliike imbombo inofu sino ʉmʼbombiile ʉNaomi ʉnkamwanavo kuhʉma ifua ʉmʉghoosi ghwako. Kange ʉlamwile kʉkʉmʉleka ʉvaaso nʉ mamaajo nɨ ɨɨsi jaako, ghwisile kukukala na vaanhu vano nʉkavakagwile. 12 ɄMʉtwa ʉNgʉlʉve, ʉNgʉlʉve ghwa Isilaeli jʉno ʉmwɨtiike na kʉkʉmhʉvɨɨla kuuti akʉdɨmaghe, akʉfunyaghe na kʉkʉkʉmemekesia inofu kʉ sooni sino ʉkavombile.” 13 ɄLʉti akati, “Ghwe ntwa, ʉmbombiile isa kʉdegha napano nanɨlɨ mʉ kɨpʉgha kya vavombi vaako. Ʉvʉkoola nɨ njovele jaako fihovwisie.”
14 Ʉnsiki ʉghwa kʉlavʉka ye ghʉfikile, ʉBohasi akamʼbʉʉla ʉLʉti, “Isagha ʉsaase ʉnkate mʉ lʉhʉʉje, ʉlie.” ɄLʉti akikala na vavombi, pe vakampeela ɨngongilue ɨngʼhasinge, ʉLʉti akalia akikuta na kusighasia.c 15 Ye aliile, akɨɨma akatengʉla kange kuhalaala. ɄBohasi akavavʉʉla avavombi vaake akati, “Mʉmʉlekaghe ʉLʉti ahalalaghe mʉmbele mʉlyʉmue, nambe pano iveela mʉ finyagha mʉlekaghe kʉkʉnʼdalɨkɨla. 16 Kange pano mupinya ɨngongilue, jɨmonga mʉjɨlekaghe mʉmbele neke ʉmwene akongʼhaniaghe. Mʉlekaghe pikʉnʼdalɨkɨla.” 17 ɄLʉti akakongʼhania ɨngongilue ɨla kufika ʉnsiki ʉghwa pakɨvwilile, akatwanga na kukwelʉsia, jɨkava lɨteneka lɨmo nɨ kyaghe.
18 Akapinya ɨngongilue, akitwɨka akavʉʉka ivuja kʉ kaaja, akamhʉfia ʉnkamwana, akampeela na fino aveele asighisie ye ilia. 19 ɄNaomi akatengʉla pidegha akati, “Ʉhalalile kʉʉghi ʉmʉsyʉghʉ? ɄMʉtwa ʉNgʉlʉve amfunyaghe jʉno akʉtangile.” ɄLʉti akamʉla akati, “Nɨveele nihalaala kʉ maghʉnda gha muunhu jʉno itambʉlua Bohasi.” 20 Kange ʉNaomi akati, “ɄMʉtwa ʉNgʉlʉve amfunyaghe ʉmuunhu ʉjuo, ʉMʉtwa ʉNgʉlʉve nya lʉsʉngʉ, ʉlwakʉva atʉvombiile inofu ʉsue na vano vafwile.d Ʉmuunhu ʉjuo ghwa nkate mʉ lʉkolo lwitu ghwe nya kʉkʉhaala ʉve na kʉkʉtʉsula ʉsue.” 21 ɄLʉti akajova kange akati, “Atiile jaatu nɨvɨngɨsaniaghe na vavombi vaake avahɨnja kʉ maghʉnda ghaake, nɨhalalaghe kuhanga pano viliiva vimala kubena.” 22 ɄNaomi akankangasia akati, “Mwalɨvango, lʉnofu kuvomba ndavʉle akʉvʉlile, ʉlwakʉva kulʉta kʉ maghʉnda aghange valakʉgasia.” 23 Pe ʉLʉti akalʉtagha kuhalaala ifighono fyoni mʉmbele muno vakabenagha avavomba mbombo va Bohasi, kuhanga pano vimala kubena ɨngongilue nɨ ngano. ɄLʉti akajigha ikukala nʉ nkamwana.