ɄNgʉlʉve ivɨɨka ʉlʉfingo nʉ Nwaka
9
Pepano ʉNgʉlʉve akamfuunya ʉNwaka na vaswambe, akavavʉʉla akati, “Mʉpapaghe, neke mwoloke mʉʉve vinga mʉ ɨɨsi. 2 Ifikanu fyoni mʉ ɨɨsi, injuni sooni, ifipelua fyoni fino fighenda vwafula ni samaki sooni isa mʉ nyanja, fyoni ifio fikʉvoghopagha ʉmue, ʉlwakʉva nɨfivɨkile mʉ mavoko ghiinu. 3 Kuhʉma lɨno, ifikanu fyoni fivisagha kyakʉlia kiinu. Nɨkʉvapeela ifiinu fyoni, ndavʉle nɨkavapeliile ɨnyafu ɨnya matʉndʉ. 4 Looli namʉngalisaghe ɨnyama jɨno jɨjiighe nɨ danda, ʉlwakʉva ʉvwʉmi ʉvwa kɨkanu vʉlɨ mʉ danda. 5 Nivangɨla kwa muunhu ghweni jʉno ɨkʉmʼbuda ʉnʼjaake, nakɨ kɨkanu kɨno kibuda ɨkɨkanu ɨkɨnine. Kyangʼhaani nisighila ɨdanda kwa muunhu ghweni jʉno ikuungʼa ɨdanda ɨja muunhu. 6 Nɨlyapelile avaanhu mʉ kɨhwani kyango. Mʉ ʉluo, ʉmuunhu ghweni angakuungʼe ɨdanda ɨja muunhu, ghwope ɨdanda jaake jikungʼua nʉ muunhu. 7 Lɨno ʉmue, mʉpapaghe, mwolokaghe, mʉʉve vinga fiijo, mʉkwɨlanɨsie ɨɨsi.”Ʉlʉnʼgangalyosi ʉlwa fula
8 Pe ʉNgʉlʉve akamʼbʉʉla ʉNwaka na vaswambe akati, 9 “Mʉmhʉlɨkɨsie. Ʉne nivɨɨka ʉlʉfingoa numue nʉ mwoloko ghwinu 10 ni fipelua fyoni ifinya vwʉmi: injuni, ifidɨmua, ifikanu, fyoni fino fikahʉmile mʉ safina palɨkɨmo numue, kwekʉti ifipelua fyoni ifyʉmi mʉ ɨɨsi. 11 Nifinga numue kuuti, nanɨngafitipule kange ifipelua fyoni nɨ ghalika, kange najɨlahʉmɨla kutipula ɨɨsi.”
12-13 Kange, ʉNgʉlʉve akati, “Nivɨɨka ʉlʉnʼgangalyosi ʉlwa fula kʉkyanya, kuuva kye kɨvalɨlo kya lʉfingo lwango nɨ ɨɨsi jooni. Nifinga numue ni fipelua fyoni ifyʉmi fino fili numue palɨkɨmo nʉ mwoloko ghwoni ʉghwa pambele. 14 Ʉnsiki pano amafunde ghighuvaana mʉ ɨɨsi, nʉ lʉnʼgangalyosi kuvoneka kʉkyanya, 15 nikʉmbʉkagha ʉlʉfingo lwango lʉno nɨfingile numue ni fipelua fyoni ifinya vwʉmi. Amalenga naghiliiva ghalika lʉsiku ɨja kʉtipula ifipelua fyoni ifyʉmi. 16 Lɨno, pano ʉlʉnʼgangalyosi luvonekagha kʉkyanya, nikʉmbʉkagha ʉlʉfingo ʉlwa masiki ghooni lʉno nɨfingile numue ni fipelua fyoni ifinya vwʉmi mʉ ɨɨsi.” 17 Pe ʉNgʉlʉve akamʼbʉʉla ʉNwaka akati, “Ɨkio kye kɨvalɨlo ɨkya lʉfingo lʉno nɨfingile ni fipelua fyoni ifinya vwʉmi mʉ ɨɨsi.”
Avaana va Nwaka
18 Avaana va Nwaka vano valyahʉmile mʉ safina ghwe Shemu, ʉHamu nʉ Yafeti. ɄHamu ghwe jʉno alyale viise ghwa Kanaani. 19 Avaana avuo vatatu ve vano valyale vaana va Nwaka. Mʉ avuo fikahʉmɨla ifisina fyoni mʉ ɨɨsi.
20 ɄNwaka akatengʉla kulɨma, akava muunhu ghwa kwanda kuvyala isabibu. 21 Ɨkɨghono kɨmonga, akanyua ʉlʉhʉʉje lwa sabibu, akaghaala. Pe akaghona vʉfuula mʉ kyeve kyake. 22 ɄHamu, ʉviise ghwa Kanaani, akamwagha ʉviise alɨ vʉfuula, akahʉma kʉnji, akalʉta kʉkʉvavʉʉla avakʉlʉ ʉShemu nʉ Yafeti. 23 Looli ʉShemu nʉ Yafeti vakavɨɨka ʉmwenda pa fivegha fyave, vakalʉta kɨnsanansana, vakamfwɨka ʉviise kʉmo vilola kʉlʉbale, kuuti valeke kulola ʉviise vʉle alɨ vʉfuula.
“ɄKanaani aghunwaghe!
Ivisagha nkami fiijo
kukila avakami vooni kʉ vanyalʉkolo vaake.”
26 ɄNwaka akafijovagha akatisagha,
“Aghinwaghe ʉMʉtwa ʉNgʉlʉve ʉghwa Shemu!
ɄKanaani avisaghe nkami ghwa Shemu.
27 ɄNgʉlʉve ongelesie imhaka isa Yafeti,b
ikalaghe nʉ lʉtengaano mʉ fyeve palɨkɨmo nʉ Shemu,
ʉKanaani avisaghe nkami ghwa Yafeti.”