Ʉmwoloko ʉghwa Nwaka
10
Ɨghalika ye jɨsilile, ʉShemu, ʉHamu nʉ Yafeti, vano vaale vaana va Nwaka, vakapaapa avaana. Ʉmwoloko ghwa vaana avuo ghwe ʉghʉ, 2 avaana va Yafeti ve ava: ʉGomeli, ʉMagogu, ʉMadai, ʉYavani, ʉTubali, ʉMesheki nʉ Tilasi. 3 Avaana va Gomeli ve ava: ʉAshikenasi, ʉLifati nʉ Togalima. 4 Avaana va Yafani ve ava: ʉElisha, ʉTalishishi, aVakitimu na Vadodanimu.a 5 Avaana va Yavani ve vano valyale fisina fya vaanhu vano valyapalasiine na kukukala mʉ ɨɨsi sino sili mʉlʉbale mʉ nyanja. Avaanhu ava vakava nɨ njovele jaave, ni ngʼholo saave nɨ ɨɨsi jaave.6 Avaana va Hamu ve ava: ʉKushi, ʉMisili, ʉPutu nʉ Kanaani.b 7 Avaana va Kushi ve ava: ʉSeba, ʉHavila, ʉSabuta, ʉLaama nʉ Sabuteka. Avaana va Laama ve ava: ʉSheba nʉ Dedani.
8 ɄKushi alyale nʉ mwana ʉjʉnge, ɨlɨtavua lyake ghwe Nimulodi. ɄNimulodi alyale muunhu ghwa kwanda ʉnya ngʉfu fiijo mʉ ɨɨsi. 9 ɄMʉtwa ʉNgʉlʉve akampeela kuuva ni ngʉfu isa kʉfwɨma ifikanu. Fye nambe kwelʉle ʉlʉjovo lʉno lwiti, “Ʉve ʉlɨ ndavʉle ʉNimulodi, ʉmfwɨmi ghwa kyangʼhaani pamaaso gha Mʉtwa.” 10 Amakaaja ghano alyatengwile kutema ghe agha: Babeli, Eleki, Akadi nɨ Kaline mʉ ɨɨsi ɨja Shinali.c 11 Kuhʉma mʉ ɨɨsi ɨjio, ʉNimulodi akalʉta mʉ ɨɨsi ɨja Ashulu. Ʉkuo akajenga ɨlɨkaaja ɨlya Ninaawi, ɨlya Lehoboti-Ili, ɨlya Kala, 12 nɨ lya Leseni. Ɨlɨkaaja ɨlya Leseni lɨlɨ pakate pa lɨkaaja lya Ninaawi nɨ lya Kala, lɨno lye lɨkaaja ɨlɨvaha. 13 ɄMisili akapaapa aValudi, aVaanami, aValehabi, aVanafutuhi, 14 aVapatilusi, aVakasiluhi vano kye kɨvʉmbʉko kya Vafilisiti, kange akapaapa aVakafutoli. 15 ɄKanaani akampaapa ʉmwana ʉmʼbele ʉSidoni, neke pambele akampaapa ʉHiti, 16 na Vayebusi, aVaamoli, aVagiligashi, 17 aVahivi, aVaaliki, aVasini, 18 aVaalivadi, aVasemali na Vahamati. Ifisina ifi fyoni ifya Vakanaani fikapalasana. 19 Imhaka isa Vakanaani satengwile kʉ Sidoni kulʉta kʉ Gelali kuhanga kufika kʉ Gasa. Kange, silyafikile kʉ Sodoma, kʉ Gomola, kʉ Adima, kʉ Seboimu kuhanga kufika kʉ Lasha. 20 Avuo vooni ve vano valyale vaana va Hamu, vakava ni njovele saave ni fikolo fyave, ni ɨɨsi saave.
21 ɄShemu ʉnkʉlʉ ghwa Yafeti, ghwe jʉno alyale nkʉʉlʉ ghwa vaana vooni ava Ebeli. 22 Avaana va Shemu valyale ve ava: ʉElamu, ʉAshulu, ʉAlifakisadi, ʉLudi nʉ Alamu. 23 Avaana va Alamu valyale ve ava: ʉUsi, ʉHuli, ʉGeteli nʉ Mashi. 24 ɄAlifakisadi alyale viise ghwa Shela, ghwope ʉShela akampaapa ʉEbeli. 25 ɄEbeli akapaapa avaana vavɨlɨ avadɨɨmi. Ʉmwanaake ʉmʼbele akampeela ɨlɨtavua Pelegi,d ʉlwakʉva ʉnsiki ʉghuo avaanhu mʉ ɨɨsi vakaghavɨngʼhiine. Ʉmwana ʉghwa vʉvɨlɨ akatambʉlua Yokitani. 26 ɄYokitani akapaapa ʉLimodadi, ʉShelefu, ʉHasalimaweti, ʉYela, 27 ʉHadolamu, ʉUsali, ʉDikila, 28 ʉObali, ʉAbimaeli, ʉSheba, 29 ʉOfili, ʉHavila nʉ Yobabu. Vooni avuo valyale vaana va Yokitani. 30 Ɨɨsi jɨno avaanhu avuo valyale vikukala, jɨkatengʉliile kʉ kɨdunda ɨkya Mesha kulʉta kʉ Sefali kʉ fidunda ifya kʉvʉdibulo. 31 Avuo vooni ve vano valyale vaana va Shemu, vakava ni njovele saave ni fikolo fyave, ni ɨɨsi saave.
32 Avuo fye fikolo fya vaana va Nwaka, kulɨngʼhana nʉ mwoloko ghwave ni ɨɨsi saave. Kutengʉlɨla ɨghalika jisila, ifikolo fyoni filyapalasiine mʉ ɨɨsi jooni.