Ʉmnala ghwa Babeli
11
Mʼbʉkʉʉlʉ, avaanhu vooni mʉ ɨɨsi valyale vijova ɨnjovele jɨmo, na masio ghe ghamo. 2 Avaanhu ye vihaama kulʉta ʉlʉbale ʉlwa kʉvʉdibulo, vakajaagha ɨɨsi jɨno jɨlɨ mʉ lʉvɨndɨ, ɨɨsi ja Shinali, vakalʉta kujenga ʉkuo.3 Pe vakavʉlana vakati, “Tʉfyatʉle amapamba agha kʉjengela, tʉnyaanye vʉnofu.” Mʉ fighono ifio, avaanhu vakajengelagha amapamba, navakajengelagha amavue; kange vakajengelagha ɨlaami, navakajengelagha ɨlɨkeeji. 4 Pepano vakavʉlana vakati, “Lɨno, tʉjenge ɨlɨkaaja nʉ mnala ʉntali fiijo, ghʉfike kʉ vʉlanga. Tʉvombe ʉluo, neke ɨlɨtavua liitu lɨtambʉlɨkaghe, kange tʉleke kupalasana mʉ ɨɨsi jooni.”
5 Neke ʉMʉtwa ʉNgʉlʉve akiika paasi, kuuti alole ɨlɨkaaja nʉ mnala ghʉno ghʉkajengwagha na vaanhu. 6 ɄMʉtwa ʉNgʉlʉve ye afyaghile, akajova akati, “Avaanhu ava, kɨsina kɨmo, vijova ɨnjovele jɨmo, kange ɨmbombo jɨno vavombile mwe vʉtengʉlɨlo vwa sino vivombagha. Mʉ ʉluo, imbombo sooni sino vilonda kuvomba, sivombekagha. 7 Lɨno twike, tʉlʉte tʉhasɨngʼhanie ɨnjovele jaave, kuuti vakunue kupʉlɨngʼhana vavuo.”
8 Pepano ʉMʉtwa ʉNgʉlʉve akavapalasania kulʉta mʉ ɨɨsi jooni, pe vakavʉhɨɨla kujenga ɨlɨkaaja ɨlio. 9 Ɨlɨkaaja ɨlio lɨkatambʉlua Babeli,a ʉlwakʉva apuo pepano ʉMʉtwa ʉNgʉlʉve akahasɨngʼhinie ɨnjovele ɨja vaanhu vooni. Kuhʉma apuo akapalasania avaanhu kulʉta mʉ ɨɨsi jooni.
Ʉmwoloko ʉghwa Shemu
10 Ʉghʉ ghwe mwoloko ghwa Shemu: Ye ghakilile amaaka ghavɨlɨ kuhʉma ɨghalika jisila, ʉShemu ye alɨ na maaka kɨlʉndo kɨmo, akampaapa ʉAlifakisadi. 11 Kuhʉma ɨkʉmpaapa ʉAlifakisadi, akikala amaaka filʉndo fihaano, akapaapa avaana avange avadɨɨmi na vahɨnja.
12 ɄAlifakisadi ye alɨ na maaka fijigho fitatu na ghahaano, akampaapa ʉShela. 13 Kuhʉma ɨkʉmpaapa ʉShela, akikala amaaka filʉndo fine na ghatatu, akapaapa avaana avange avadɨɨmi na vahɨnja.
14 ɄShela ye alɨ na maaka fijigho fitatu, akampaapa ʉEbeli. 15 Kuhʉma ɨkʉmpaapa ʉEbeli, akikala amaaka filʉndo fine na ghatatu, akapaapa avaana avange avadɨɨmi na vahɨnja.
16 ɄEbeli ye alɨ na maaka fijigho fitatu na ghane, akampaapa ʉPelegi. 17 Kuhʉma ɨkʉmpaapa ʉPelegi, akikala amaaka filʉndo fine ni fijigho fitatu, akapaapa avaana avange avadɨɨmi na vahɨnja.
18 ɄPelegi ye alɨ na maaka fijigho fitatu, akampaapa ʉLeu. 19 Kuhʉma ɨkʉmpaapa ʉLeu, akikala amaaka filʉndo fivɨlɨ na budikalʉbale, akapaapa avaana avange avadɨɨmi na vahɨnja.
20 ɄLeu ye alɨ na maaka fijigho fitatu na ghavɨlɨ, akampaapa ʉSelugi. 21 Kuhʉma ɨkʉmpaapa ʉSelugi akikala amaaka filʉndo fivɨlɨ na lekelalʉbale, akapaapa avaana avange avadɨɨmi na vahɨnja.
22 ɄSelugi ye alɨ na maaka fijigho fitatu, akampaapa ʉNaholi. 23 Kuhʉma ɨkʉmpaapa ʉNaholi, akikala amaaka filʉndo fivɨlɨ, akapaapa avaana avange avadɨɨmi na vahɨnja.
24 ɄNaholi ye alɨ na maaka fijigho fivɨlɨ na budikalʉbale, akampaapa ʉTela. 25 Kuhʉma ɨkʉmpaapa ʉTela, akikala amaaka kɨlʉndo kɨmo nɨ kɨjigho kɨmo na budikalʉbale, akapaapa avaana avange avadɨɨmi na vahɨnja.
26 ɄTela ye alɨ na maaka fijigho lekelalʉbale, akampaapa ʉAbulamu, ʉNaholi nʉ Halani.
Ʉmwoloko ʉghwa Tela
27 Ʉghʉ ghwe mwoloko ghwa Tela: ɄTela akampaapa ʉAbulamu, ʉNaholi nʉ Halani. Ghwope ʉHalani akampaapa ʉLoti. 28 Pambele ʉHalani akafua, ʉviise ʉTela ye ajiighe mwʉmi. Akafwɨla mʉ lɨkaaja ɨlya Ulu muno alyapapilue. Ɨlɨkaaja ɨlya Ulu lɨlyale mʉ ɨɨsi ɨja Vakalidayo. 29 ɄAbulamu nʉ Naholi vakatoola avadala. Ʉnʼdala ghwa Abulamu akatambʉlwagha Salai, ʉnʼdala ghwa Naholi akatambʉlwagha Milika. ɄMilika ʉjuo nʉ nnuuna ʉIsika, valyale valɨve va Halani. 30 ɄSalai alyale mʉghʉmba, naalyale nʉ mwana.
31 ɄTela akatoola ʉmwanaake ʉAbulamu nʉ Salai ʉnkamwana, palɨkɨmo nʉ mʉsukulu ʉLoti ʉmwana ghwa Halani, vakavʉʉka mʉ lɨkaaja ɨlya Ulu mʉ ɨɨsi ɨja Vakalidayo, vakalʉngama kulʉta kʉ ɨɨsi ɨja Kanaani. Neke ye vafikile mʉ ɨɨsi ɨja Halani,b vakalamʉla kukukala ʉkuo. 32 ɄTela ye alɨ na maaka filʉndo fivɨlɨ na ghahaano, akafua mʉ ɨɨsi ɨja Halani.