ɄNgʉlʉve ɨkʉnkemeela ʉAbulamu
12
Ɨkɨghono kɨmonga, ʉMʉtwa ʉNgʉlʉve akamʼbʉʉla ʉAbulamu akati, “Vʉʉka mʉ ɨɨsi jaako, ʉvaleke avanyalʉkolo vaako, na vaanhu va mʉ nyumba ja nhaata ghwako, ʉlʉte mʉ ɨɨsi jɨno kyanɨkʉkʉsoona.2 Nɨkʉkʉvɨɨka kuuva kɨsina kya vaanhu vinga,
kange nɨkʉkʉfuunya!
Nɨkʉlɨghinia ɨlɨtavua lyako,
vwɨmɨla ʉve avaanhu vilifunyua.
3 Avaanhu vano vikʉkʉfuunya, voope nɨkʉvafuunya,
neke vano vikʉkʉghuna, na jʉʉne nɨkʉvaghuna.
Kukilila ʉve avaanhu vooni mʉ ɨɨsi vilifunyua.”
4-5 Pe ʉAbulamu akavʉʉka mʉ ɨɨsi ɨja Halani, ndavʉle avʉlilue nʉ Mʉtwa ʉNgʉlʉve. Ʉnsiki ʉghuo, alyale na maaka fijigho lekelalʉbale na ghahaano. ɄAbulamu akantoola ʉnʼdala ghwake ʉSalai nʉ Loti ʉmwana ghwa nkʉlʉ, ni fiinu fyave fyoni fino valyale nafyo, palɨkɨmo na vakami vaake, vano valyale navo kʉ Halani. Pe vakavʉʉka vilʉta kʉ ɨɨsi ɨja Kanaani.
6 Ye vafikile mʉ ɨɨsi ɨja Kanaani, vakakila pakate pa ɨɨsi ɨjio, vakafika pamonga pano pitambʉlua Mole mʉ lɨkaaja ɨlya Shekemu. Pa Mole apuo paale pɨmɨke, pweghwale ʉmpiki ʉnkome ʉmualoni.a Mʉ ɨɨsi ɨjio, amasiki aghuo vakikalagha aVakanaani. 7 Pe ʉMʉtwa ʉNgʉlʉve akamʼbonekela ʉAbulamu, akamʼbʉʉla akati, “Ɨɨsi ɨjɨ je jɨno nilikʉvapeela avanyeenya vaako.” Apuo pepano ʉAbulamu akanʼjengela ʉMʉtwa ʉNgʉlʉve ɨkɨtekelelo, ʉlwakʉva akamʼbonekiile.
8 Pambele ʉAbulamu akavʉʉka pala, akalʉta imbale isa kʉ fidunda, kʉvʉdibulo vwa lɨkaaja ɨlya Beteli. Akajenga ʉkuo ɨkyeve kyake, pakate pa lɨkaaja ɨlya Beteli, lɨno lɨlyale ʉlʉbale ʉlwa kʉvʉseemo, nɨ lɨkaaja ɨlya Ai lɨno lɨlyale ʉlʉbale ʉlwa kʉvʉdibulo. Apuo poope, akanʼjengela ʉMʉtwa ʉNgʉlʉve ɨkɨtekelelo. Pa kɨtekelelo apuo pe akava ɨkʉmwɨmɨka ʉMʉtwa ʉNgʉlʉve.
9 Pambele ʉAbulamu akavʉʉka ilʉngama kulʉta ʉlʉbale ʉlwa kʉmavemba, kʉ lʉkʉve kʉ Negebu.
ɄAbulamu nʉ Salai mʉ ɨɨsi ɨja Misili
10 Lɨno, mʉ ɨɨsi ɨja Kanaani jɨlyaghwile ɨnjala. Ʉlwakʉva ɨnjala ɨjio jɨlyale mbaha fiijo, ʉAbulamu akalʉta kʉ ɨɨsi ɨja Misili kukukala ʉnsiki nʼdebe. 11 Ye alɨ piipi kukwingila kʉ Misili, akamʼbʉʉla ʉSalai ʉnʼdala ghwake akati, “Nɨkagwile kuuti, ʉve ʉlɨ nʼdala nnono fiijo. 12 AVamisili vangakwaghe kya viiti, ‘Ʉjʉ nʼdala ghwake.’ Pe kyavikʉmbuda ʉne, neke ʉve vikʉkʉleka. 13 Lɨno, ʉvavʉlaghe kuuti, ʉve ʉlɨ lʉmbʉlyango, neke vambombele inono, valeke pikʉmbuda vwɨmɨla ʉve.”
14 Pe ʉAbulamu nʉ Salai ye vafikile kʉ Misili, aVamisili vakamwagha ʉSalai kuuti nʼdala nnono fiijo. 15 Avatangɨli va ntwa ʉFalaob ye vamwaghile, vakamʼbʉʉla ʉntwa ghwave ɨmhola ɨja vʉnono vwa Salai. Pe vakantwala ʉSalai mʉ nyumba ɨja kɨtwa ɨja ntwa ʉFalao. 16 Pe ʉFalao akamʼbombela inofu ʉAbulamu vwɨmɨla ʉSalai. Akampeela ʉAbulamu ingʼholo ni ngʼombe ni dogovi, avakami avakɨnhaata na vakɨjʉʉva ni ngamɨla.
17 Neke ʉlwakʉva ʉFalao alyantolile ʉSalai ʉnʼdala ghwa Abulamu, ʉMʉtwa ʉNgʉlʉve akankopa ʉFalao mʉlwa kʉmpeela ɨnhamu ɨnhalamu, palɨkɨmo na vaanhu vooni ava mʉ nyumba jaake. 18 Pe ʉFalao akankemeela ʉAbulamu, akamposia akati, “Ʉve! Kye kɨki ɨkɨ kɨno ʉmbombiile? Ongo nʉmbʉlile kuuti ʉmʉkɨjʉʉva ʉjʉ nʼdala ghwako? 19 Kɨki ghwati lʉmbʉlio, kuhanga ʉne nantoola kuuva nʼdala ghwango? Lɨno, ʉntoole ʉnʼdala ghwako, ʉvʉʉke apa!”
20 Pe ʉFalao akavavʉʉla avaanhu vaake kuuti vamʉloleele ʉAbulamu nʉ nʼdala ghwake, palɨkɨmo ni fiinu fyake fyoni.