13
Pe ʉAbulamu akavʉʉka kʉ Misili nʉ nʼdala ghwake ni fiinu fyake fyoni palɨkɨmo nʉ Loti, vakagomoka kange kʉ Negebu.ɄAbulamu nʉ Loti vilekana
2 Ʉnsiki ʉghuo, ʉAbulamu alyale mmofu fiijo. Alyale ni fidɨmua na madini gha ndalamaa ni sahabu.
3 Kuhʉma kʉ Negebu, akalʉta kʉ lɨkaaja ɨlya Beteli. Akafika pano alyajengile ɨkyeve ʉlwa kwanda pakate pa lɨkaaja ɨlya Beteli nɨ lya Ai, 4 pano alyajengile ɨkɨtekelelelo. Apuo ʉAbulamu akamwɨmɨka ʉMʉtwa ʉNgʉlʉve.
5 ɄLoti, jʉno alyale palɨkɨmo nʉ Abulamu, ghwope alyale na mapʉgha gha ngʼholo, imhene, ingʼombe, na maheema minga. 6 Ifidɨmua fyave filyale finga, ɨɨsi jɨla najɨkavakwɨla ʉAbulamu nʉ Loti kukukala palɨkɨmo. 7 Pe kʉkava na mabaatu, avadɨɨma fidɨmua va Abulamu na va Loti. Ʉnsiki ʉghuo, voope aVakanaani na Vapelisi valyale vikukala mʉ ɨɨsi jɨla.
8 ɄAbulamu ye alʉvwene ʉluo, akamʼbʉʉla ʉLoti akati, “Tʉleke kulua ʉne nuuve, nambe avadɨɨma fidɨmua vango na vaako, ʉlwakʉva tʉlɨ lʉkolo. 9 Lolagha inyika imbaha kʉvʉlongolo kʉlyʉve. Nisʉʉma tʉbaghʉlane. Nave ghulonda kulʉta ʉlʉbale ʉlwa kʉngʼhɨghɨ, ʉne nilʉta ʉlʉbale ʉlwa kʉndio; nave ghulʉta kʉndio, ʉne nilʉta kʉngʼhɨghɨ.”
10 ɄLoti akalola pa vʉtali, akalwagha ʉlʉvonde ʉlʉvaha ʉlwa kɨkogha ɨkya Yolidani kuhanga kufika ɨlɨkaaja ɨlya Soali, akavona lʉlɨ na malenga minga, ndavʉle ɨɨsi ɨja Misili, na mʉ mʉghʉnda ghwa Mʉtwa ʉNgʉlʉve ghʉno ghutambʉlua Edeni. Kʉbaghʉlana ʉkuo, kʉlyahʉmiile ʉMʉtwa ʉNgʉlʉve ye akyale kutipula ɨlɨkaaja ɨlya Sodoma nɨ lya Gomola.
11 Pe ʉLoti akasalʉla ʉlʉvonde lwoni ʉlwa Yolidani, akavʉʉka ilʉta ʉlʉbale ʉlwa kʉvʉdibulo. Enendɨɨkɨ fye valyabaghʉliine. 12 ɄAbulamu akajigha mʉ ɨɨsi ɨja Kanaani. ɄLoti akalʉta kukukala piipi na makaaja ghano ghalyale mʉ lʉvonde, akajenga amaheema piipi nɨ lɨkaaja ɨlya Sodoma. 13 Neke, avaanhu ava kʉ Sodoma valyale vahosi kyongo, valyale vivomba inyɨvi imbaha pamaaso gha Mʉtwa ʉNgʉlʉve.
ɄNgʉlʉve ɨkʉnsoona ɨɨsi ʉAbulamu
14 ɄLoti nʉ Abulamu ye valekiine, ʉMʉtwa ʉNgʉlʉve akamʼbʉʉla ʉAbulamu akati, “Lola imbale sooni, kʉvwehe na kʉmavemba, kʉvʉdibulo na kʉvʉseemo. 15 Ɨɨsi jooni ɨjɨ jɨno ghʉkʉjaagha, nɨkʉkʉpeela ʉve na vanyeenya vaako, jɨvisaghe ɨɨsi jiinu amasiki ghooni. 16 Nilipelela avanyeenya vaako vaave vinga, vano navivalɨka, ndavʉle ɨlɨhanga. 17 Lɨno, ɨma ʉghendeghende mʉ ɨɨsi ɨjɨ jooni, ʉlʉte mʉ vʉtali na mʉ vweleefu, ʉlwakʉva ɨɨsi ɨjɨ nɨkʉkʉpeela ʉve.” 18 Pe ʉAbulamu akakumula amaheema ghaake, akalʉta kukukala mʉ ɨɨsi ɨja Hebuloni, pa mapiki amavaha ama mialoni, pano pitambʉlua Mamule. Apuo akanʼjengela ʉMʉtwa ʉNgʉlʉve ɨkɨtekelelo.