ɄAbulamu ɨkʉmpoka ʉLoti
14
Amasiki aghuo, ʉAmulafeli ʉntwa ʉghwa kʉ Shinali, ʉAlioko ʉntwa ʉghwa kʉ Elasali, ʉKedolilaoma ʉntwa ʉghwa kʉ Elamu, nʉ Tidali ʉntwa ʉghwa kʉ Goimu, 2 vooni palɨkɨmo vakalʉta kulua ɨlɨlʉgʉ nʉ Bela ʉntwa ʉghwa kʉ Sodoma, ʉBelisha ʉntwa ʉghwa kʉ Gomola, ʉShinabu ʉntwa ʉghwa kʉ Adima, ʉShemebeli ʉntwa ʉghwa kʉ Seboimu, palɨkɨmo nʉ ntwa ʉghwa kʉ Bela. Ɨlɨtavua ɨlɨngɨ ɨlya ɨɨsi ɨja Bela je Soali. 3-4 Amaaka kɨjigho na ghavɨlɨ, avatwa vahaano avuo valyale mʉ mavoko gha ntwa ʉKedolilaoma. Neke, ʉmwaka ʉghwa kɨjigho kɨmo na ghatatu, vakagalʉka. Vakakongʼhania palɨkɨmo avasikali vaave, vakingila mʉ lʉvonde lʉno lʉkatambʉlwagha Sidimi, lʉno ifighono ifi litambʉlua Lɨsʉmbe lya Mwinyo.5 Ʉmwaka ʉghwa kɨjigho kɨmo na ghane, ʉntwa ʉKedolilaoma na vatwa avajaake vano valyale vitangana, vakalʉta kulua ɨlɨlʉgʉ na kʉkʉvalema aValefai ava lɨkaaja ɨlya Ashiteloti-Kalinaimu, aVasusi mʉ lɨkaaja ɨlya Hamu, aVaemi ava mʉ lɨkaaja ɨlya Shawe-Kiliataimu, 6 na Vaholi kʉ kɨdunda kyave ɨkya Seili. Vakavalema vooni avuo na kʉkʉvadaga kuhanga kufika kʉ Eli-Palani, mʉ mhaka ɨja kʉ lʉkʉve. 7 Pe vakagomoka kʉmbele, vakafika kʉ Eni-Misifati, ɨlɨtavua ɨlɨngɨ jitambʉlua Kadeshi, vakatoola ɨɨsi jooni ɨja Vaamaleki, na kulefia aVaamoli vano vakikalagha mʉ lɨkaaja ɨlya Hasasoni-Tamali.
8 Pe ʉntwa ʉghwa kʉ Sodoma, ʉntwa ʉghwa kʉ Gomola, ʉntwa ʉghwa kʉ Adima, ʉntwa ʉghwa Seboimu nʉ ntwa ʉghwa Bela, ɨlɨtavua ɨlɨngɨ je Soali, vakalʉta kukulɨngʼhania kutengʉla ɨlɨlʉgʉ kʉ lʉvonde lwa Sidimi, 9 kuuti value nʉ Kedolilaoma ʉntwa ʉghwa kʉ Elamu, ʉTidali ʉntwa ʉghwa kʉ Goimu, ʉAmulafeli ʉntwa ʉghwa kʉ Shinali nʉ Alioko ʉntwa ʉghwa kʉ Elasali. Apuo avatwa vane vakava vilua na vatwa vahaano. 10 Ʉlʉvonde ʉlwa Sidimi lʉlyale na miina minga agha laami. Avatwa ava kʉ Sodoma na kʉ Gomola vakatovua, vakakɨmbɨla. Ye vikɨmbɨla avange vakaghwɨlɨla mʉ miina aghuo, avange vakakɨmbɨlɨla kʉ kɨdunda. 11 Pe avatwa vala vane vano valefisie, vakaghoma ifiinu fyoni ifya Sodoma ni fya Gomola, vakaghoma ni fyakʉlia fyave fyoni, vakavʉʉka vilʉta. 12 Ghwope ʉLoti, ʉmwana ghwa nnuuna ghwa Abulamu, akaghomua kʉ lɨlʉgʉ palɨkɨmo ni fiinu fyake fyoni, ʉlwakʉva alyale ikukala kʉ Sodoma.
13 Ʉmuunhu jʉmonga akatyegha, akalʉta kʉkʉmʼbʉʉla ʉAbulamu ʉMʉebulania imhola isio. Amasiki aghuo ʉAbulamu akikalagha piipi na mapiki amavaha ama mialoni agha Mamule jʉno alyale Mʉamoli. ɄMamule alyale nyalʉkolo ghwa Eshikoli nʉ Aneli. Vooni ava valyafingile nʉ Abulamu kutangana mʉ nhalamu sino sikʉvaagha.
14 ɄAbulamu ye apʉliike kuuti ʉmwana ghwa nnuuna aghomilue kʉ lɨlʉgʉ, akavapeela ifilwɨlo avalua lɨlʉgʉ vaake filʉndo fitatu nɨ kɨjigho kɨmo na lekelakwoni vano valyaholilue mʉ mavoko ghaake. Pe vakavalʉtɨla avalʉgʉ avuo kuhanga kufika mʉ lɨkaaja ɨlya Dani. 15 Pakɨlo ʉAbulamu akavaghavania avaanhu vaake fipʉgha fipʉgha, vakavalʉkɨla avalʉgʉ vaave, vakavalema na kʉkʉvadaga kuhanga kufika mʉ lɨkaaja lya Hoba, ʉlʉbale ʉlwa kʉvwehe ʉlwa Damesiki. 16 Pe vakatoola ifiinu fyoni fino vaghoma na kʉkʉnʼgomosia ʉLoti ʉmwana ghwa nnuuna, palɨkɨmo ni fiinu fyake na vakɨjʉʉva na vaanhu avange vano valyaghomilue.
ɄMelekisedeki ɨkʉmfuunya ʉAbulamu
17 ɄAbulamu ye igomoka kuhʉma kʉ lɨlʉgʉ kʉno akamʉlemile ʉntwa ʉKedolilaoma na vajaake, ʉntwa ʉghwa kʉ Sodoma akalʉta kʉkʉmwambɨlɨla ʉAbulamu kʉ lʉvonde ʉlwa Shawe, ɨlɨtavua ɨlɨngɨ lutambʉlua lʉvonde lwa ntwa. 18 Pepano ʉntwa ʉghwa kʉ Salemu, ʉMelekisedeki, akaleeta amakate nʉ lʉhʉʉje. ɄMelekisedeki alyale ntekesi ghwa Ngʉlʉve ʉMʼbaha ghwa fyoni. 19 Pe akamfuunya ʉAbulamu akati,
“ɄNgʉlʉve ʉMʼbaha ghwa fyoni,
ʉmpeli ghwa vʉlanga nɨ ɨɨsi,
amfuunye ʉAbulamu!
20 Aghinwaghe ʉNgʉlʉve ʉMʼbaha ghwa fyoni,
jʉno avavɨkile avalʉgʉ vaako mʉ mavoko ghaako!”
Pe ʉAbulamu akampeela ifiinu ɨkɨlʉndo kɨmo mʉ filʉndo kɨjigho mʉ fyoni fino aghomile kʉ lɨlʉgʉ. 21 Ʉntwa ʉghwa kʉ Sodoma akamʼbʉʉla ʉAbulamu akati, “Ʉmheele avaanhu vango, neke ifiinu ifingi fyoni, ʉtolaghe.” 22 Neke ʉAbulamu akamʼbʉʉla akati, “Nijɨɨgha pamaaso gha Mʉtwa ʉNgʉlʉve ʉMʼbaha ghwa fyoni, ʉmpeli ghwa vʉlanga nɨ ɨɨsi 23 kuuti, nanitoola kɨmonga kʉlyʉve, nambe lʉsalavua nambe kakova aka kʉpinyila ɨkɨlatu, ʉleke kukughinia kuuti, ‘Ʉne nɨmpeleliile ʉAbulamu kuuva mmofu.’ 24 Nanɨngʉpɨle kɨmonga, ʉlwene fi fyakʉlia fino avasoleka vango vakaliile. Looli nisʉʉma ʉvapeele ɨlɨghavo avaanhu vano twalʉtania, ʉAneli, ʉEshikoli nʉ Mamule.”