ɄLʉfingo lwa Ngʉlʉve nʉ Abulamu
15
Imhola isio ye sikilile, ʉMʉtwa ʉNgʉlʉve akasuungʼha ɨmhola kwa Abulamu mʉ nyivonelo kuuti, “Abulamu! Nʉngoghopaghe! Ʉne nɨkʉkʉsighagha hwene ngʉla, kange nɨkʉkʉpeela ʉlʉvonolo ʉlʉkome.”2 Neke ʉAbulamu akati, “Ghwe Ntwa, Mʉtwa Ngʉlʉve ghwango, ghʉkʉmheela kɨki, pano ʉne nifua kɨsila mwana? ɄElieseli ʉghwa kʉ Damesiki, ʉnkami ghwango ʉjʉ, ghwe nya vʉhaasi ifiinu fyango fyoni!” 3 ɄAbulamu akafijovagha iiti, “Nʉmheliile avaana, mʉ ʉluo ʉnkami jʉno akaholilue mʉ nyumba jango, ghwe jʉno kyaihaala ifiinu fyango!”
4 Pe ʉMʉtwa ʉNgʉlʉve akajova naghwo kange akati, “Ʉjuo, naangahaale ifiinu fyako, looli ʉmwanaako jʉno ghupaapa jʉʉve, ghwe jʉno ihaala.” 5 Pe akamhʉmia kʉnji akati, “Lola kʉkyanya kʉ vʉlanga! Ʉvale inhondue, nave lweli ndepoonu ghuvala.” Pe akamʼbʉʉla akati, “Enendɨɨkɨ fye ʉmwoloko ghwako ghuliiva mwinga!” 6 ɄAbulamu akamwɨtɨka ʉMʉtwa ʉNgʉlʉve. Mʉ ʉluo, ʉNgʉlʉve akamʼbalɨla kuuva muunhu mʉgholofu.
7 Pe ʉMʉtwa ʉNgʉlʉve akamʼbʉʉla akati, “Ʉne neene Mʉtwa Ngʉlʉve! Neene nɨkakʉvʉsisie kʉ Ulu, ɨlɨkaaja ɨlya Vakalidayo, kuuti nɨkʉpeele ɨɨsi ɨjɨ, vʉʉve vʉhaasi vwako.” 8 Neke ʉAbulamu akamposia akati, “Ghwe Mʉtwa Ngʉlʉve, ghwe Ntwa ghwa fyoni nikagʉla ndaani kuuti, ɨɨsi ɨjɨ vʉhaasi vwango?” 9 ɄMʉtwa akamwamʉla akati, “Ʉndetele ɨndama ɨja maaka ghatatu, ɨmhene ɨnhɨghano ɨja maaka ghatatu, ɨduuvi ɨja maaka ghatatu, ɨngʼhʉnda nɨ nyaana ja njɨva.” 10 Pe ʉAbulamu akamʉletela ifio fyoni. Akahɨnja fyoni, nɨkɨngɨ akaghavania pavɨlɨ, akafivɨɨka mʉ ngʼhɨndɨ ivɨlɨ filoliine. Neke ifinya mapɨga naakaghavinie. 11 Amatumbusi pano ghakava ghilʉta pilia ɨnyama jɨla, ʉAbulamu akava ɨkʉghadaga.
12 Ɨlɨjʉva ye lɨseema, ʉAbulamu sikankola itʉlʉ imbaha. Nakalɨngi ɨngʼhiisi ɨmbaha jɨkahʉmɨla, jɨkankupika, akoghopa fiijo. 13 Pe ʉMʉtwa akamʼbʉʉla ʉAbulamu akati, “Ʉve ʉkagʉlaghe ʉvwakyangʼhaani kuuti, avanyeenya vaako viliiva vahesia mʉ ɨɨsi jɨno najaave. Aveene viliiva vakami, kange vilipumusivua amaaka ifilʉndo fine.a 14 Neke ɨɨsi jɨno jilikʉvavɨɨka kuuva vakami vaave, nilikʉvakopa. Neke aveene vilivʉʉka ʉkuo nɨ kyʉma kinga. 15 Looli ʉve ghulikukala amaaka minga, kange ghulifua nʉ lʉtengaano. 16 Avanyeenya vaako, ɨkɨsina kya vʉne,b ve vano viligomoka mʉ ɨɨsi ɨjɨ, ʉlwakʉva aVaamoli vakyale kukililila kuvomba ʉvʉhosi kuuti nɨvakope.”
17 Ɨlɨjʉva ye lɨsemile, najɨ ngʼhiisi jingiile, nakalɨngi ɨkɨvɨgha ɨkɨnya lyosi nʉ mwoto ghʉno ghuviika kɨkakila pakate pa nyama jɨla. 18 Ɨkɨghono ɨkio, ʉMʉtwa ʉNgʉlʉve akafinga nʉ Abulamu, akati, “Nɨvapeliile avanyeenya vaako ɨɨsi ɨjɨ, kutengʉlɨla ɨkɨkogha ɨkya Misili, kuhanga kufika ɨkɨkogha kɨla ɨkɨvaha, ɨkya Eufulati. 19 Kwekʉti ɨɨsi isa Vakeni, aVakenisi, aVakadimoni, 20 aVahiti, aVapelisi, aValefai, 21 aVaamoli, aVakanaani, aVagiligashi na Vayebusi.”