ɄSalai nʉ Hajili
16
1-3 ɄAbulamu ye ikalile amaaka kɨjigho mʉ ɨɨsi ɨja Kanaani, ʉnʼdala ghwake ʉSalai naalyampapiile ʉmwana. Neke alyale nʉ nkami ʉmhɨnja jʉno akatambʉlwagha Hajili, alyale Mʉmisili. Pe ʉSalai akamʼbʉʉla ʉAbulamu akati, “Ʉkagwile kuuti, ʉMʉtwa ʉNgʉlʉve afinyile avaana. Lɨno, nɨkʉkʉsʉʉma, ʉntoole ʉnkami ghwango ʉHajili, pamo ndepoonu ɨkʉtʉpapɨla avaana.” ɄAbulamu akɨtɨka amasaaghe gha Salai. Pe ʉSalai akampeela ʉAbulamu ʉnkami ghwake ʉmhɨnja ʉHajili ʉMʉmisili, aave nʼdala ghwake. 4 Pe ʉAbulamu akaghona nʉ Hajili, akava nkunue. ɄHajili ye akagwile kuuti nkunue, akatengʉla kʉkʉmʼbeda ʉSalai, ʉmʼbaha ghwake. 5 Pe ʉSalai akamʼbʉʉla ʉAbulamu akati, “Ʉve veeve ʉpeleliile imhumuko isi sino sikʉnyaagha. Ʉne nɨkakʉpeliile ʉnkami ghwango, aave nʼdala ghwako. Neke ʉlwakʉva akagwile kuuti nkunue, ɨkʉmbeda ʉne. ɄMʉtwa ʉNgʉlʉve alole veeni nsove, ʉne nuuve!” 6 ɄAbulamu akamʼbʉʉla akati, “Pʉlɨkɨsia, ʉnkami ʉjʉ alɨ mʉ mavoko ghaako, naangakʉtole.” Pe ʉSalai akatengʉla kʉkʉmpumusia ʉHajili kuhanga akakɨmbɨla.Kuholua kwa Isimaeli
7 Pe ʉnyamholaa ghwa Mʉtwa ʉNgʉlʉve akamwagha ʉHajili kʉ lɨhaka, alɨ piipi nɨ kɨtiimu. Ɨkɨtiimu ɨkio kɨlyale mʉ sɨla ɨja kʉlʉta kʉ Shuli. 8 Ʉnyamhola akamposia akati, “Hajili, ghwe nkami ghwa Salai, ʉhʉmile kʉʉghi? Kange, ghulʉta kʉʉghi?” ɄHajili akamwamʉla akati, “Nɨkʉnkɨmbɨla ʉmʼbaha ghwango ʉSalai.”
9 Ʉnyamhola akamʼbʉʉla akati, “Gomoka kwa mʼbaha ghwako, ʉnkʉndaghe.” 10 Akajova kange akati, “Nilikwongelesia ʉmwoloko ghwako kuuva mwinga fiijo, nambe muunhu naangavale.
11 Ʉve lɨno ʉlɨ nkunue,
ghupaapa ʉmwana ʉnʼdɨɨmi.
Ʉntambʉlaghe ɨlɨtavua Isimaeli,b
ʉlwakʉva ʉMʉtwa ʉNgʉlʉve alwaghile ʉlʉpumuko lwako.
12 ɄIsimaeli ʉjuo, ivisagha hwene dogovi ɨja mʉ lɨsoli.c
Ilwisagha nʉ muunhu ghweni,
kange avaanhu vooni vikanɨngʼhanagha nʉ mwene.
Ilwisagha na vanyalʉkolo vaake vooni.”
13 Pe ʉHajili akati mʉ mwojo ghwake, “Lɨno, nɨmwaghile ʉmwene jʉno ɨkʉnyaagha ʉne.” Mʉ ʉluo, akantambʉla ʉMʉtwa ʉNgʉlʉve akati, “Ʉve veeve Ngʉlʉve ghwe jʉno ghulola,”d ʉlwakʉva akajovile nʉ mwene ʉkuo. 14 Fye nambe ɨkɨtiimu ɨkio kɨkatambʉlwagha Beeli-Lahai-Loi.e Ɨkɨtiimu ɨkɨ kɨlɨ pakate pa lɨkaaja ɨlya Kadeshi nɨ lya Beledi.