Ɨkɨvalɨlo kya lʉfingo lwa Ngʉlʉve nʉ Abulamu
17
ɄAbulamu ye alɨ na maaka fijigho budikalʉbale na budikalʉbale, ʉMʉtwa ʉNgʉlʉve akamʼbonekela akamʼbʉʉla akati, “Neene Ngʉlʉve ne Nyangʉfu Sooni. Ʉngʼhʉndaghe na kuvomba sino nikeela ʉne. 2 Ʉne nivɨɨka ʉlʉfingo lwango nuuve, na kukwongelesia fiijo ʉmwoloko ghwako.”3 Apuo ʉAbulamu akafughama, akinama kʉkʉmwɨmɨka ʉNgʉlʉve. Pe ʉNgʉlʉve akamʼbʉʉla akati, 4 “Ʉlʉ lwe lʉfingo lwango nuuve: Ghuuva nhaata ghwa fisina finga. 5 Kutengʉlɨla lɨno, naghutambʉlwagha Abulamu,a looli ghutambʉlwagha Abulahamu,b ʉlwakʉva nɨkʉvɨkɨle kuuva nhaata ghwa fisina finga. 6 Nɨkʉkʉpeela ʉmwoloko mwinga fiijo, kuhʉma mʉlyʉve fihʉma ifisina finga palɨkɨmo na vatwa.
7 “Nivɨɨka ʉlʉfingo lwango nuuve nʉ mʉlwoko ghwako na vanyeenya vaave vooni kuuva lwa masiki ghooni. Ʉlʉfingo ʉluo lwe ʉlʉ: Niiva Ngʉlʉve ghwako nʉ mwoloko ghwako ghwoni. 8 Nɨkʉkʉpeela ʉve nʉ mwoloko ghwako, ɨɨsi ɨja Kanaani jɨno ghukukala lɨno mʉ vʉhesia, kuuva ɨɨsi jiinu amasiki ghooni. Na jʉʉne nivisagha Ngʉlʉve ghwave.”
9 ɄNgʉlʉve akamʼbʉʉla ʉAbulahamu akati, “Ʉve palɨkɨmo na vanyeenya vaako nʉ mwoloko ghwave, mʉgadɨlɨlaghe ʉlʉfingo lwango. 10 Lɨno, ʉmʉkɨnhaata ghweni pakate palyʉmue avombelue ɨkɨvʉngo ɨkya kʉdumula ɨngola ɨja kɨdɨɨmi. Ʉlʉ lwe lʉfingo lwango lʉno mulondua kugadɨlɨla, ʉve nʉ mwoloko ghwako. 11 Mulondua kuvombelua ɨkɨvʉngo ɨkio. Ɨkio kye kɨvalɨlo ɨkya lʉfingo lwango numue. 12 Mʉ mwoloko ghwoni ghʉno ghukwisa, ʉmwana ghweni ʉnʼdɨɨmi ilondua kuvombelua ɨkɨvʉngo ɨkya kʉdumula ɨngola ɨja kɨdɨɨmi,c ɨkɨghono ɨkya lekelakwoni kuhʉma iholua. Nakwekʉti va vanyeenya vaako veene, looli nava vakami vano vaholilue mʉ nyumba jaako, na vano vaghʉlilue ni ndalama kuhʉma kʉ vahesia. 13 Ʉmʉkɨnhaata ghweni jʉno aholilue mʉ nyumba jaako nambe jʉno aghʉlilue ni ndalama saako, ilondua kuvombelua ɨkɨvʉngo. Ɨkio kye kɨvalɨlo kya lʉfingo lwango mʉ mavɨlɨ ghiinu, ʉlʉfingo ʉlwa masiki ghooni. 14 Ʉmʉkɨnhaata ghweni jʉno naadumulilue ɨngola jaake ɨja kɨdɨɨmi, adagwaghe mʉ kɨpʉgha, ʉlwakʉva iiva adenyile ʉlʉfingo lwango.”
ɄNgʉlʉve ɨkʉmʉlagha ʉAbulahamu kʉkʉmpeela ʉmwana ʉnʼdɨɨmi
15 ɄNgʉlʉve akamʼbʉʉla ʉAbulahamu akati, “Lɨno, ʉnʼdala ghwako ʉSalai, nʉngantambʉlaghe Salai, ɨlɨtavua lyake iiva ghwe Sala.d 16 Nɨkʉmfuunya akʉpapɨle ʉmwana ʉnʼdɨɨmi. Nɨkʉmfuunya aave mama ghwa fisina finga. Avatwa va ɨɨsi vihʉma mwa mwene.”
17 Pe ʉAbulahamu akafughama, akinama kuhanga kufika paasi, akaseka, akajova mʉ mwojo ghwake akati, “Ʉmuunhu ʉghwa maaka kɨlʉndo, ndepoonu ipaapa ndaani ʉmwana? ɄSala ʉghwa maaka fijigho budikalʉbale, ndepoonu ipaapa?” 18 Pe akansʉʉma ʉNgʉlʉve akati, “Ʉmwɨtɨkɨsie ʉIsimaeli kukwʉpɨla inyifuunyo isio.”
19 ɄNgʉlʉve akamwamʉla akati, “Nafye lʉlɨvuo! Looli ʉnʼdala ghwako ʉSala ɨkʉkʉpapɨla ʉmwana ʉnʼdɨɨmi, na jʉʉve ʉkʉmpeela ɨlɨtavua ɨlɨ Isaka.e Ʉne nilivɨɨka kange ʉlʉfingo lwango kwa mwene nʉ mwoloko ghwake. Ʉlʉfingo lwango luuva lwa masiki ghooni. 20 Vwɨmɨla ʉIsimaeli, nɨpʉliike isʉʉmo saako vwɨmɨla ʉmwene. Ghwope nɨkʉmfuunya, nɨkʉmʼbɨɨka aave nʉ mwoloko, kange nɨkʉghwongelesia fiijo. Iiva kɨvʉmbʉko kya vatwa kɨjigho na vavɨlɨ,f kange nɨkʉmʼbɨɨka kuuva mpaafi ghwa vaanhu vinga fiijo. 21 Neke ʉlʉfingo lwango lʉla, luuva mwa Isaka jʉjuo jʉno iholua nʉ Sala kʉ mwakʉʉghʉ, ʉnsiki ndavʉle ʉghʉ.” 22 ɄNgʉlʉve ye amalile kujova nʉ Abulahamu, akamʉleka.
23 Ɨkɨghono kɨla kɨla, ʉAbulahamu akantoola ʉIsimaeli ʉmwanaake, na vange vooni vano vaholilue mʉ nyumba jaake palɨkɨmo na vano vaghʉlilue ni ndalama saake. Ʉmʉkɨnhaata ghweni ʉghwa mʉ nyumba jaake, akamʼbombela ɨkɨvʉngo ndavʉle alyalaghiile ʉNgʉlʉve.
24-25 ɄAbulahamu alyavombilue ɨkɨvʉngo palɨkɨmo nʉ mwanaake ʉIsimaeli. Ʉnsiki ʉghuo ʉAbulahamu alyale na maaka fijigho budikalʉbale na budikalʉbale, ʉmwanaake ʉIsimaeli alyale na maaka kɨjigho kɨmo na ghatatu. 26 ɄAbulahamu nʉ mwanaake valyavombilue ɨkɨvʉngo ɨkɨghono kye kɨmo, 27 palɨkɨmo na vakɨnhaata vooni vano valyaholilue mʉ nyumba jaake, na vano valyaghʉlilue ni ndalama kuhʉma kʉ vahesia.