ɄNgʉlʉve ɨkʉmʼbonekela kange ʉAbulahamu
18
Ɨkɨghono kɨmonga pamwisi, amasiki gha lɨfuke, ʉAbulahamu alikalile pa mʉlyango ʉghwa kyeve kyake. Pe ʉMʉtwa ʉNgʉlʉve akamʼbonekela piipi na mapiki amavaha ama mialoni agha Mamule. 2 ɄAbulahamu akalola, akavona avaanhu vatatu vɨmile patali padebe kʉvʉlongolo kwa mwene. Ye avaghile, akakɨmbɨla ngʼhaningʼhaani kuhʉma pa mʉlyango apuo, akalʉta kʉkʉvʉpɨla. Ye afikile, akafughama pamaaso ghaave, 3 akati, “Mwe vatwa vango! Ʉne nɨlɨ mʼbombi ghwinu! Nɨkʉvasʉʉma namʉngakilingʼhaniaghe, mwise kʉlyʉne. 4 Leke nɨvaletele amalenga amadebe mwoghe amaghʉlʉ, neke mʉpʉʉme pa lʉsulua pa mpiki ʉghʉ. 5 Mwisile kʉlyʉne ne mʼbanda ghwinu, leke nɨvalɨngʼhanɨkɨsie ɨkyakʉlia kɨdebe, mʉlie, neke mʉʉve ni ngʉfu mʉ lʉghendo lwinu.” Vooni vakamʉla vakati, “Lʉnofu, vomba ndavʉle ʉjovile.”6 Pe ʉAbulahamu akingila ngʼhaningʼhaani mʉ kyeve, akamʼbʉʉla ʉnʼdala ghwake ʉSala akati, “Vomba ngʼhaningʼhaani, toola ifilɨɨlo fitatu ifya vʉtine ʉvʉnono, ʉkande, ʉvatelekele avahesia amakate.”
7 Pe ʉAbulahamu akalʉta ngʼhaningʼhaani kʉ lʉvagha, akasalʉla ɨndama jɨmo ɨnono, akampeela ʉnkami ghwake. Ʉnkami ʉjuo, akahɨnja ngʼhaningʼhaani, akavanyanyila. 8 Ɨkyakʉlia ye kɨlɨngʼhanɨsivue, ʉAbulahamu akavaletela ʉtʉsiva ʉtʉlʉle nɨ ngʼhame nɨ nyama ɨjio, akavapeela valisaghe. Ye vilia, ʉAbulahamu alyɨmile piipi na veene paasi pa mpiki.
9 Avahesia avuo vakamposia vakati, “Ʉnʼdala ghwako ʉSala alɨ kʉʉghi?” ɄAbulahamu akavamʉla akati, “Alɨ mʉ kyeve.” 10 Jʉmonga mʉ veene akati, “Kyangʼhaani, kʉ mwakʉʉghʉ nigomoka ʉnsiki ndavʉle ʉghʉ, ʉSala iiva nʉ mwana ʉnʼdɨɨmi.” Ʉnsiki ʉghuo ʉSala alyale kʉnsana kʉ mʉlyango ghwa kyeve ɨmile ipʉlɨkɨsia.
11 ɄAbulahamu nʉ Sala valyale vaghogholo, ʉSala ʉnsiki ghwake ʉghwa kʉpaapa ghʉkasilile. 12 Pe ʉSala akaseka mʉ mwojo ghwake iiti, “Ongo ʉne nɨlɨ mʉghogholo! Ʉmʉghoosi ghwango ghwope aghosiipe. Lɨno mʉ vʉghogholo ʉvʉ, ndepoonu nipaapa ʉmwana nɨɨve nʉ lʉkeelo nʉ mʉghoosi ghwango?”
13 ɄMʉtwa ʉNgʉlʉve akamposia ʉAbulahamu akati, “Kɨki ʉSala asekile na kujova kuuti, ‘Lweli ndepoonu nipaapa ʉmwana mʉ vʉghogholo vwango ʉvʉ?’ 14 Asi, kɨɨnu kɨki kɨno kɨkʉntola ʉMʉtwa ʉNgʉlʉve kuvomba? Kʉ mwakʉʉghʉ nigomoka ʉnsiki ndavʉle ʉghʉ, ʉSala iiva nʉ mwana ʉnʼdɨɨmi!” 15 Neke ʉSala ʉlwakʉva alyale nʉ lʉdwesi akati, “Mʉtwa, ʉne nanɨsekile!” ɄMʉtwa akati, “Ʉsekile.”
ɄAbulahamu ɨkʉvasʉmɨla avaanhu ava kʉ Sodoma
16 Avahesia avuo ye valiile, vakavʉʉka vilʉta. Pe ʉAbulahamu akavahɨngɨlɨsia, vakafika pamonga pano ɨlɨkaaja ɨlya Sodoma lɨvoneka. 17 Pe ʉMʉtwa ʉNgʉlʉve akati, “Asi, nɨmfise ʉAbulahamu kɨno nilonda pivomba? 18 Kyangʼhaani ʉmwene iliiva kɨvʉmbʉko kya vaanhu mʉ ɨɨsi ɨmbaha, kange ɨnya ngʉfu. Kukilila ʉmwene avaanhu mʉ ɨɨsi sooni vilifunyua. 19 Nɨnsalwile ʉmwene alongosie avanaake na vanyeenya vaake kuuti, vavɨngɨlɨlaghe ɨsɨla jango: Vavisaghe vagholofu na kuvomba isa kyangʼhaani. Nave vivombagha ʉluo, na jʉʉne ne Mʉtwa Ngʉlʉve nɨkʉmʼbombela ʉAbulahamu ndavʉle nɨkamʉlaghile.”
20 Apuo, ʉMʉtwa ʉNgʉlʉve akati, “Nɨpʉliike ɨngʼhooloa vwɨmɨla avaanhu mʉ lɨkaaja ɨlya Sodoma nɨ lya Gomola. Inyɨvi saave nyinga fiijo! 21 Lɨno, nikwika kuuti nɨlole nave inyɨvi sino vivomba silɨngʼhiine nɨ ngʼhoolo jɨno nɨpʉliike. Nave nafyelʉle kyanikagʉla.”
22 Pe avaanhu vavɨlɨ vala vakavʉʉka pala, vakalʉngama kulʉta kʉ Sodoma, neke ʉAbulahamu akajigha ɨmile pamaaso gha Mʉtwa ʉNgʉlʉve. 23 ɄAbulahamu akamʼbelelela ʉMʉtwa ʉNgʉlʉve akamposia akati, “Asi, ghutipula avagholofu palɨkɨmo na vahosi? 24 Nave mʉ lɨkaaja mwevale avaanhu avagholofu fijigho fihaano, asi, ghutipula kɨsila kʉvavonela ɨkɨsa vwɨmɨla avagholofu fijigho fihaano avuo? 25 Ʉleke pivomba ʉluo, pibuda avagholofu palɨkɨmo na vahosi! Ʉleke pikʉvavomba avagholofu ndavʉle avahosi! Ʉmhɨghi ʉghwa ɨɨsi jooni naileka kuvomba ʉvwakyangʼhaani!” 26 ɄMʉtwa ʉNgʉlʉve akamwamʉla akati, “Nave nɨvone mwevale avagholofu fijigho fihaano mʉ lɨkaaja ɨlya Sodoma, nisaghɨla ɨlɨkaaja lyoni vwɨmɨla aveene!”
27 ɄAbulahamu akajova kange akati, “Nambe ʉne nɨlɨ lʉngʼhʉnde kange lɨpembo, nɨkʉkʉsʉʉma nɨjove nuuve, ghwe Ntwa ghwango. 28 Nave avaanhu fijigho fihaano vapʉngwike, valɨ fijigho fine na vahaano, asi, ghutipula ɨlɨkaaja ɨlio lyoni, ʉlwakʉva vapʉngwike avagholofu vahaano?” ɄMʉtwa akamwamʉla akati, “Ndali! Nanɨngatipule ɨlɨkaaja ɨlio nave mwevale avagholofu fijigho fine na vahaano.” 29 ɄAbulahamu akamposia kange akati, “Luuva ndaani nave mwevale avagholofu fijigho fine veene?” Ghwope akamwamʉla akati, “Vwɨmɨla avagholofu avuo fijigho fine, nanɨngatipule.” 30 ɄAbulahamu akajova kange akati, “Ghwe Ntwa ghwango, nɨkʉkʉsʉʉma ʉleke pikalala! Ʉnyɨtɨkɨsie nɨposie kange. Nave mwevale avagholofu fijigho fitatu?” ɄMʉtwa akamwamʉla akati, “Nave nɨvaaghe avagholofu fijigho fitatu, nanɨngatipule.” 31 ɄAbulahamu akati, “Nisʉʉma nɨjove nuuve, ghwe Ntwa ghwango. Lɨno, nave mwevale avagholofu fijigho fivɨlɨ?” ɄMʉtwa akamwamʉla akati, “Vwɨmɨla avagholofu fijigho fivɨlɨ, nanɨngatipule.” 32 Kʉvʉsililo, ʉAbulahamu akati, “Ghwe Ntwa ghwango, ʉleke pikalala, leke nɨjove kakaaka keene. Nave mwevale avaanhu avagholofu kɨjigho kɨmo veene?” ɄMʉtwa akamwamʉla akati, “Vwɨmɨla avagholofu kɨjigho kɨmo, nanɨngatipule ɨlɨkaaja ɨlio.” 33 ɄMʉtwa ʉNgʉlʉve ye amalile kujova nʉ Abulahamu, akavʉʉka ilʉta. ɄAbulahamu ghwope, akagomoka kʉ kaaja jaake.