Ɨlɨkaaja ɨlya Sodoma nɨ lya Gomola ghitipulua
19
Pakɨvwilile, avanyamhola vavɨlɨ vala vakafika mʉ lɨkaaja ɨlya Sodoma. Ʉnsiki ʉghuo, ʉLoti alikalile pa mʉlyango ʉghwa kwingilila mʉ lɨkaaja ɨlio. Ye avaghile, akalʉta kʉkʉvambɨlɨla, akafughama na kʉkʉvinamɨla. 2 Akavavʉʉla akati, “Vatwa vango, mwingile mʉ nyumba jango ne mʼbombi ghwinu. Mwoghe amaghʉlʉ na kughona mʉlyʉne ɨkɨlo ɨja mʉsyʉghʉ. Palwakɨlo fiijo mʉlʉtaghe nʉ lʉghendo lwinu.” Neke aveene vakamʉla vakati, “Ndali, ʉsue tughona pa kɨvanja apa.”a3 ɄLoti akavʉmɨlɨsia fiijo kuhanga vɨtɨka, vakingila mʉ nyumba jaake. Pe akavalɨngʼhanɨkɨsia ɨkyakʉlia ɨkɨnono, akavatelekela amakate amasila kɨlʉle, vakalia. 4 Neke ye vakyale pighona, avakɨnhaata vooni kuhʉma imbale sooni isa lɨkaaja ɨlya Sodoma, avasoleka na vagojo, vakajɨsyʉngʉtɨla ɨnyumba ɨja Loti. 5 Vakankemeela ʉLoti vakati, “Ghwe Loti! Avakɨnhaata vano vingiile mʉ nyumba jaako muno ɨvwilile ɨjɨ, valɨ kʉʉghi? Vahʉmie kʉnji! Tulonda tʉvavɨɨke hwene vadala, tʉghone navo.”
6 ɄLoti akahʉma kʉnji, akadinda ʉmʉlyango kʉnsana. 7 Akavavʉʉla akati, “Vanyalʉkolo vango, mʉvaleke avaanhu ava, namʉngavavombelaghe imbiivi isio! 8 Lolagha, nɨlɨ na vaana vavɨlɨ avahɨnja vano navammanyile ʉmʉghoosi, mʉleke nɨvahʉmɨkɨsie avuo, mʉvavombe sino mulonda. Neke avakɨnhaata ava, namʉngavavombaghe ʉlʉviivi lʉmonga, ʉlwakʉva vahesia vango.”
9 Neke aveene vakamwamʉla vakati, “Vʉʉka apa! Ʉve ʉlɨ mhesia apa, ghulonda kukuvɨɨka mʉlamʉsi ghwitu! Ndepoonu tʉkʉkʉvomba jʉʉve imbiivi kukila vʉle twale tʉkʉvavomba aveene!” Apuo pepano vakankungʼilisia ʉLoti kuhanga valonde vadeenye ʉlwighi.
10 Pe avahesia vala vakadindula ʉmʉlyango, vakankwesela nkate ʉLoti, vakadinda ʉmʉlyango. 11 Pe vakavapelela avaanhu vala vooni vano valɨ pa mʉlyango kuuva vabofu amaaso, avasoleka na vagojo palɨkɨmo vakakunua kʉkʉghʉvona ʉmʉlyango.
12 Avahesia vala vakamposia ʉLoti vakati, “Asi, pwevale avanyalʉkolo vaako avange vano mukukala palɨkɨmo mʉ lɨkaaja ɨlɨ? Pamo pwevale avakwivo, avanaako avadɨɨmi na vahɨnja. Ʉvatoole ngʼhaningʼhaani, mʉvʉʉke mʉ lɨkaaja ɨlɨ, 13 ʉlwakʉva tutapitipula ɨlɨkaaja ɨlɨ. Amingʼhuulo pamaaso gha Mʉtwa ʉNgʉlʉve minga kyongo, vwɨmɨla ʉvʉviivi vwa vaanhu va lɨkaaja ɨlɨ, kuhanga atʉsungʼhile twise kʉkʉlɨtipula.”
14 Pe ʉLoti akalʉta kʉ vakwive vano vakavalɨmiile avalɨve. Akavavʉʉla akati, “Mʉhʉme ngʼhaningʼhaani mʉ lɨkaaja ɨlɨ, ʉlwakʉva ʉMʉtwa ʉNgʉlʉve ilonda kʉkʉlɨtipula.” Neke avasoleka vala vakavona hwene idenga.
15 Ye kuhenga, avanyamhola vala vakansimilisia ʉLoti vakati, “Ngʼhaningʼhaani! Ʉntoole ʉnʼdala ghwako na valɨvo vavɨlɨ, mʉvʉʉke apa kuuti mʉleke kutipulua, pano ɨlɨkaaja ɨlɨ litipulua.” 16 ɄLoti akava inyeghanyegha. Neke ʉlwakʉva ʉMʉtwa ʉNgʉlʉve akamʼboniile ɨkɨsa, avanyamhola vala vakankola ʉlʉvoko ʉLoti, ʉnʼdala ghwake, palɨkɨmo na valɨve, vakavahʉmia kʉnji kʉ lɨkaaja. 17 Ye vavafikisie kʉnji kʉ lɨkaaja, ʉnyamhola jʉmonga akavavʉʉla akati, “Kɨmbɨlaghi, mupoke! Namʉngalolaghe kʉmbele, nambe kukwɨma pamonga mʉ lʉvonde ʉluo. Mʉkɨmbɨlɨle kʉ fidunda, neke mʉleke kutipulua.”
18 ɄLoti akavasʉʉma akati, “Ndali, vatwa viitu! 19 Lolagha! Mʉfunyile ʉne ne mʼbombi ghwinu, mʉmboniile fiijo ɨkɨsa mʉlwa kʉmhoka. Neke, lʉtalamu kʉlyʉne kukɨmbɨlɨla kʉ fidunda, ʉlwakʉva fili kʉtali fiijo. Ʉlʉtalamu ʉlʉ lʉnganyaaghe pano nɨkyale kufika ʉkuo, nifua. 20 Lolagha, kʉla kwelɨlɨ ɨlɨkaaja ɨlɨdebe, nisʉʉma mʉndeke nɨkɨmbɨlɨle kʉla, ʉlwakʉva piipi, lɨkaaja lɨdebe vʉvʉle, kʉla nikuluka.”
21 Jʉmonga mʉ vanyamhola vala akamwamʉla akati, “Nɨkwɨtɨkisie, nanɨngalɨtipule ɨlɨkaaja lɨno ʉjovile. 22 Ngʼhaningʼhaani, kɨmbɨlɨla ʉkuo! Nanɨngavombe kɨmonga kuhanga ʉfike ʉkuo.” Ʉlwakʉva ʉLoti alyatiile lɨkaaja lɨdebe, ɨlɨkaaja ɨlio lɨkatambʉlua, Soali.b
23 Ɨlɨjʉva ye lɨdibwile, ʉLoti akava afikile mʉ lɨkaaja ɨlya Soali. 24 Nakalɨngi ʉMʉtwa akajughuja ʉmwoto ʉmʼbaha na mavue ghano ghiviika kuhʉma kʉkyanya, ghakaghua mʉ lɨkaaja ɨlya Sodoma nɨ lya Gomola. 25 Akatipula amakaaja ghala nʉ lʉvonde lwoni, na vaanhu vano vikalagha mʉ makaaja aghuo na mamela ghooni. 26 Neke ʉnʼdala ghwa Loti akasyetʉka kulola kʉnsana. Bahapuo akahambʉka kuuva sɨmbɨlɨ ja mwinyo.
27 Ɨkɨghono ɨkɨvɨngɨlɨli palwakɨlo, ʉAbulahamu akalʉta pano akɨmile nʉ Mʉtwa ʉNgʉlʉve. 28 Akalola ʉlʉbale ʉlwa kʉ Sodoma nʉ lwa kʉ Gomola, nʉ lʉvonde lwoni, akavona ɨlyosi ɨlɨvaha lisuuka, hwene lya mbembelo.
29 ɄNgʉlʉve ye itipula amakaaja mʉ lʉvonde ʉluo, akakʉmbwike isʉʉmo isa Abulahamu. Mʉ ʉluo, akamhʉmia ʉLoti mʉ lʉtalamu ʉlʉvaha lʉno lʉkaghavwene amakaaja ghano ʉLoti alyale ikukala.
Avalɨve va Loti vighona nʉ viise
30 ɄLoti akoghopa kukukala kʉ Soali. Pe akavʉʉka palɨkɨmo na valɨve vala vavɨlɨ, vakalʉta kukukala mʉ mhanga kʉ fidunda.
31 Ɨkɨghono kɨmonga, ʉmwalɨve ʉmʼbaha akamʼbʉʉla ʉnnuuna akati, “Ʉnhaata ghwitu aghosiipe, kange nakwale ʉmʉkɨnhaata ghweni ʉghwa kʉtʉtoola mʉ ɨɨsi ɨjɨ, ndavʉle lʉlɨvuo kʉ vakɨjʉʉva vooni ava mʉ ɨɨsi. 32 Lɨno, tʉnnywesie ʉlʉhʉʉje aghaale, pe tʉghone naghwo, tʉʉve na vaana, ɨkɨkolo kiitu kɨleke kusova.”
33 Ɨkɨlo jɨla vakannywesia ʉviise ʉlʉhʉʉje kuhanga akaghaala, ʉmwalɨve ʉmʼbaha akalʉta akaghona naghwo. Neke ʉviise naakakagwile vʉle ʉmwalɨve alʉtile kughona nʉ mwene, nambe vʉle avʉkile.
34 Ye kʉkiile, ʉmhɨnja ʉmʼbaha akamʼbʉʉla ʉnnuuna akati, “Ʉne pakɨlo nɨveele nɨghonile nʉ nhaata. Lɨno, ʉmʉsyʉghʉ tʉmʉghasie kange, na jʉʉve ʉghone naghwo. Apuo tweni tuuva na vaana, ɨkɨsina kiitu nakɨngasove.” 35 Ɨkɨlo jɨla, vakannywesia kange ʉviise ʉlʉhʉʉje. Pe ʉmwalɨve ʉnʼdebe akalʉta akaghona naghwo. Ʉviise naakakagwile kange vʉle ʉmwalɨve alʉtile kughona nʉ mwene, nambe vʉle avʉkile.
36 Enendɨɨkɨ fye avalɨve va Loti vooni ve vavɨɨlɨ, vakava vakunue kukilila ʉviise. 37 Ʉmwalɨve ʉmʼbaha akapaapa ʉmwana ʉnʼdɨɨmi, akampeela ɨlɨtavua ɨlɨ Moabu. Ʉjuo ghwe kɨvʉmbʉko kya Vamoabuc kuhanga kufika ʉmʉsyʉghʉ. 38 Ghwope ʉmwalɨve ʉnʼdebe akapaapa ʉmwana ʉnʼdɨɨmi, akampeela ɨlɨtavua ɨlɨ Ben-Ami. Ʉjuo ghwe kɨvʉmbʉko kya Vaamonid kuhanga kufika ʉmʉsyʉghʉ.