ɄAbulahamu ɨkʉnsyanga ʉAbimeleki
20
ɄAbulahamu akahʉma kʉ Mamule, akalʉngama kulʉta ʉlʉbale ʉlwa kʉmavemba kʉ lʉkʉve kʉ Negebu. Ye afikile ʉkuo, akikala pakate pa lɨkaaja ɨlya Kadeshi nɨ lya Shuli. Pe akalʉta kukukala ʉnsiki nʼdebe mʉ lɨkaaja ɨlya Gelali, akava mhesia. 2 Ʉkuo ʉAbulahamu akavavʉʉla avaanhu kuuti, ʉnʼdala ghwake ʉSala, lʉmbʉ. Mʉ ʉluo, ʉntwa ʉghwa lɨkaaja ɨlio, jʉno akatambʉlwagha Abimeleki, akasuungʼha avaanhu, vamʉleete ʉSala mʉ nyumba jaake.3 Neke ʉNgʉlʉve akamʼbonekela ʉAbimeleki mʉ njosi pakɨlo, akamʼbʉʉla akati, “Ʉve ghufua, ʉlwakʉva ʉmʉkɨjʉʉva jʉno ʉntolile, nʼdala ghwa muunhu!” 4 Ʉnsiki ʉghuo ʉAbimeleki akakyale kughona nʉ Sala, akamʉla akati, “Ghwe Mʉtwa, ghubuda avaanhu vano navahokile? 5 ɄAbulahamu jʉjuo ghwe jʉno ajovile kuuti, ʉmʉkɨjʉʉva ʉjuo lʉmbʉ! Ghwope ʉSala ajovile kuuti, ʉAbulahamu lʉmbʉ! Lɨno, nɨvombile ʉlʉ nʉ mwojo ʉmʼbalafu, nanɨhokile kɨmonga!”
6 Pe ʉNgʉlʉve akamʼbʉʉla mʉ njosi kuuti, “Nɨkagwile kuuti, ʉvombile ʉluo nʉ mwojo ʉmʼbalafu. Fye nambe nɨkʉsighile ʉleke kuvomba ʉvʉhosi, nɨkʉsighile ʉleke kʉkʉmwabasia ʉmʉkɨjʉʉva ʉjuo. 7 Lɨno, ʉnʼgomosie ʉmʉkɨjʉʉva ʉjuo kwa mʉghoosi ghwake. Ʉmʉghoosi ghwake mʼbɨli, kyande ɨkʉkʉsʉmɨla ʉjighe mwʉmi. Nave naghʉkʉnʼgomosia, ʉkagʉlaghe kyangʼhaani kuuti, ghufua ʉve palɨkɨmo na vaanhu vaako vooni.”
8 ɄAbimeleki akasisimuka lʉ lwakɨlo, akavakemeela avavombi vaake vooni, akavavʉʉla injosi sino aghoniile, avavombi vala vakoghopa fiijo. 9 Pe ʉAbimeleki akankemeela ʉAbulahamu, akamposia akati, “Ʉtʉvombiile kɨki? Nɨkʉhokile kɨki kuhanga ʉndetiile ʉne na vaanhu va vʉtwa vwango ʉlʉtalamu ʉlʉ? Ʉmbombiile sino nasinoghiile kuvombeka.” 10 ɄAbimeleki akamʼbʉʉla kange ʉAbulahamu akati, “Ʉveele nʉ vʉfumbue vʉki kuvomba ʉlʉ?”
11 ɄAbulahamu akamwamʉla akati, “Nɨvombile enendɨɨkɨ, ʉlwakʉva nasaghagha kuuti kʉno nakwale ʉmuunhu jʉno ɨkʉmwogopa ʉNgʉlʉve. Mʉ ʉluo, noghwipe kuuti, mwale mʉkʉmbuda, neke mʉtoole ʉnʼdala ghwango. 12 Palɨkɨmo nʉluo, lweli ʉmwene lʉmbʉlyango, ʉlwakʉva ʉnhaata ghwitu ghwe jʉmo, neke natʉpapilue ʉmama jʉmo, pe ʉne nɨkantoola kuuva nʼdala ghwango. 13 ɄNgʉlʉve ye ambʉlile kuuti nɨvʉʉke kʉ kaaja kwa nhaata ghwango, nɨkamʼbʉlile ʉnʼdala ghwango kuuti, ‘Kuhʉfia kuuti ʉnganile, ʉnoghiile imbale sooni sino tulʉta ʉtisaghe ʉne nɨlɨ lʉmbʉlio.’ ”
14 Pe ʉAbimeleki akanʼgomokesia ʉAbulahamu ʉnʼdala ghwake ʉSala. Akampeela ni ngʼholo, ni ngʼombe, na vakami avadɨɨmi na vahɨnja. 15 ɄAbimeleki akamʼbʉʉla ʉAbulahamu akati, “Lolagha, ɨɨsi ɨjɨ jooni jɨno jɨlɨ pamaaso ghaako, jango. Mʉsalʉle pano mʉpaghanile, mukalaghe.” 16 Pe ʉAbimeleki akamʼbʉʉla ʉSala akati, “Nɨmpeliile ʉlʉmbʉlio indalama ɨmbilima jɨmo isa kʉvʉsɨkɨsia isoni pamaaso gha vaanhu vaako vooni, kange avaanhu vakagʉle kuuti ʉve ʉlɨ nsila nkole.”
17 Pepano ʉAbulahamu akansʉmɨla kwa Ngʉlʉve ʉAbimeleki, pe ʉNgʉlʉve akamʼbʉsia ʉvʉghʉmba ʉAbimeleki, ʉnʼdala ghwake, na vakami vaake vooni, vakatengʉla kupaapa kange. 18 Lʉlyale enendɨɨkɨ, ʉlwakʉva ʉMʉtwa ʉNgʉlʉve akavavɨkile vaghʉmba avakɨjʉʉva vooni vano valɨ mʉ nyumba ja Abimeleki, vwɨmɨla kutoola ʉSala, ʉnʼdala ghwa Abulahamu.