Kuholua kwa Isaka
21
ɄMʉtwa ʉNgʉlʉve, akansʉngʉkɨla ʉSala ndavʉle alyajovile, akamʼbombela ndavʉle alyamʉlaghile.a 2 Pe ʉSala akava nkunue, akampapɨla ʉAbulahamu ʉmwana ʉnʼdɨɨmi mʉ vʉghogholo vwake, ʉnsiki ghʉla ghʉla ghʉno ʉNgʉlʉve alyamʼbʉlile. 3 ɄAbulahamu akampeela ʉmwana ʉjuo ɨlɨtavua ɨlɨ Isaka. 4 ɄIsaka ye afikisie ifighono lekelakwoni, ʉAbulahamu akamʼbombela ɨkɨvʉngo ɨkya kʉdumula ɨngola ɨja kɨdɨɨmi, ndavʉle alyamʉlaghiile ʉNgʉlʉve. 5 Ʉnsiki ghʉno ʉIsaka alyapapilue, ʉAbulahamu alyale na maaka kɨlʉndo kɨmo.6 ɄSala akati, “ɄNgʉlʉve amheleliile nɨseke nʉ lʉkeelo. Ʉmuunhu ghweni angapʉlɨke ɨmhola ɨjɨ, ghwope iseka nʉ lʉkeelo.” 7 Kange akati, “Ghwe veeni jʉno ale ɨkʉmʼbʉʉla ʉAbulahamu kuuti, na jʉʉne ne Sala nale nikwongʼhesia ʉmwana? Lolagha lɨno, nɨmpapiile ʉmwana ʉnʼdɨɨmi mʉ vʉghogholo vwake!” 8 ɄIsaka akakʉla, ɨkɨghono kɨno vamʉlekisie kukwongʼha, ʉAbulahamu akavɨɨka ɨkɨkulukulu ɨkɨvaha.
ɄHajili nʉ Isimaeli vidagua
9 Ɨkɨghono kɨmonga, ʉSala akavona ʉIsimaeli, ʉmwana ghwa Abulahamu jʉno alyaholilue nʉ Hajili ʉMʉmisili, ɨkʉnʼjova fivi ʉmwanaake ʉIsaka. 10 Mʉ ʉluo, ʉSala akamʼbʉʉla ʉAbulahamu akati, “Ʉnʼdage ʉmʉkɨjʉʉva ʉnkami ʉjʉ nʉ mwanaake, ʉlwakʉva ʉmwana ghwa nkami, naalɨ nʉ vʉhaasi palɨkɨmo nʉ mwanango ʉIsaka.”
11 Amasio gha Sala ghakamʉlemasia fiijo ʉAbulahamu, ʉlwakʉva ʉIsimaeli ghwope alyale mwanaake. 12 Neke ʉNgʉlʉve akamʼbʉʉla ʉAbulahamu akati, “Nʉngahangajɨkaghe vwɨmɨla ʉnkami ghwako nʉ mwanaake. Sooni sino ʉSala ɨkʉkʉsʉʉma, ʉvombaghe, ʉlwakʉva ɨkɨsina kyako kihʉma mwa Isaka. 13 Ghwope ʉmwana ghwa nkami ghwako, nɨkʉmʼbɨɨka aave kɨvʉmbʉko kya ɨɨsi ɨmbaha, ʉlwakʉva ghwope mwanaako.”
14 Ɨkɨghono ɨkɨvɨngɨlɨli lʉ lwakɨlo, ʉAbulahamu akatoola ifyakʉlia nɨ kɨdele ɨkya malenga, akantwɨka ʉHajili, akanʼdaga palɨkɨmo nʉ mwanaake. ɄHajili akavʉʉka pala, akava ihangajɨka kʉ lʉkʉve kʉ Beeli-Sheba. 15 Amalenga ye ghasilile, ʉHajili akamʉleka ʉmwanaake pa lʉsulua ʉlwa kɨhanji. 16 Pe akalʉta pavʉlongolo padebe, ʉvʉtali ʉvwa mita kɨlʉndo ndɨɨkɨ, akikala ikujovasia iiti, “Nanilonda kulola vʉle ʉmwanango ifua.” Ye ajiighe ikalile pala, akatengʉla kulɨla.
17 Pambele ʉNgʉlʉve akapʉlɨka ʉmwana ʉjuo ilɨla. Pe ʉnyamhola ghwa Ngʉlʉve akamposia ʉHajili kuhʉma kʉkyanya akati, “Kɨki ghupumuka? Ʉleke pikwoghopa! ɄNgʉlʉve apʉliike ʉmwanaako ilɨla pala. 18 Ɨma, ʉlʉte ʉmwinule ʉmwanaako, ʉnkole vʉnono. Ʉne nɨkʉmʼbɨɨka aave kɨvʉmbʉko kya ɨɨsi ɨmbaha.”
19 Pe ʉNgʉlʉve akanʼdindula ʉHajili amaaso ghaake, akakyagha ɨkɨtiimu kya malenga. Akalʉta, akamemia amalenga mʉ kɨdele, akannywesia ʉmwanaake.
20 ɄNgʉlʉve akamʉlolelela ʉmwana ʉjuo kuhanga akava nsoleka mʼbaha. Akava ikukala kʉ lʉkʉve, kange akava mfwɨmi nnofu fiijo, akafwɨmɨlagha indibulo. 21 Alyale ikukala kʉ lʉkʉve kʉ Palani, ʉngʼina akantolesia ʉmʉkɨjʉʉva kuhʉma mʉ ɨɨsi ɨja Misili.
ɄAbulahamu nʉ Abimeleki vifingana
22 Ɨkɨghono kɨmonga, ʉAbimeleki palɨkɨmo nʉ mʼbaha ghwa vasikali vaake, jʉno akatambʉlwagha Fikoli, vakamʉghendela ʉAbulahamu, vakamʼbʉʉla vakati, “ɄNgʉlʉve alɨ palɨkɨmo nuuve mʉ mbombo sooni sino ghuvomba. 23 Lɨno, ʉjɨɨghe mʉ lɨtavua lya Ngʉlʉve kuuti, nʉngasyange ʉne, nambe avanango, nambe vanyeenya vango. Ndavʉle ʉne vʉle nɨkʉvombiile vʉnofu, enendɨɨkɨ na jʉʉve ʉmbombelaghe vʉnofu ʉne, nɨ ɨɨsi ɨjɨ jɨno ghukukala mʉ vʉgheesi.”
24 ɄAbulahamu akati, “Nijɨɨgha.” 25 Neke akakuuta kwa Abimeleki vwɨmɨla ɨkɨtiimu ɨkya malenga kɨno avakami ava Abimeleki vakakunyile. 26 ɄAbimeleki akamʼbʉʉla akati, “Ʉne nanɨkagwile ʉmuunhu jʉno akavombile ʉluo, na jʉʉve nʉkambʉlile. Pe nipʉlɨka ʉmʉsyʉghʉ ɨmhola ɨjio.”
27 Pe ʉAbulahamu akatoola ingʼholo ni ngʼombe, akampeela ʉAbimeleki, vooni ve vavɨɨlɨ vakafingana. 28 ɄAbulahamu akasalʉla ingʼholo inhɨghano lekelalʉbale. 29 ɄAbimeleki akamposia akati, “Kɨki ʉsalwile ingʼholo isi inhɨghano lekelalʉbale na kʉkʉsivɨɨka paajo?” 30 ɄAbulahamu akamwamʉla akati, “Ingʼholo isi inhɨghano lekelalʉbale nɨkʉkʉpeela ʉve kuuva vwolesi kuuti ʉne neene nɨkagimile ɨkɨtiimu ɨkɨ.” 31 Pepano ɨkɨtiimu ɨkio kɨkatambʉlua Beeli-Sheba,b ʉlwakʉva vooni ve vavɨɨlɨ valyajɨghɨlaniile pala.
32 Ye vamalile kuvomba amapʉlɨngʼhano aghuo pa Beeli-Sheba, ʉAbimeleki akavʉʉka palɨkɨmo nʉ Fikoli, ʉmʼbaha ghwa vasikali vaake, vakagomoka mʉ ɨɨsi ɨja Vafilisiti. 33 ɄAbulahamu akavyala ʉmpiki ʉnkwaju pa Beeli-Sheba, apuo pe pano akamwɨmɨkagha ʉMʉtwa ʉNgʉlʉve, ʉNgʉlʉve ʉghwa masiki ghooni. 34 ɄAbulahamu alikalile hwene mhesia ifighono finga mʉ ɨɨsi ɨja Vafilisiti.