ɄNgʉlʉve ɨkʉmʉghela ʉAbulahamu
22
Pambele, ʉNgʉlʉve akamʉghela ʉAbulahamu. Akankemeela akati, “Abulahamu!” ɄAbulahamu akɨtɨka akati, “Eena, nɨlɨ apa.” 2 ɄNgʉlʉve akamʼbʉʉla akati, “Ʉntoole ʉmwanaako ʉmʉghanɨke ʉIsaka, jʉno alɨ jʉmo mwene, ʉlʉte naghwope mʉ ɨɨsi ɨja Molia, ʉntavʉle kuuva lɨtekelo ɨlya kʉnyaanya pa kɨdunda kɨno kyanɨkʉkʉsoona.”3 Pe ʉAbulahamu akavʉʉka lʉ lwakɨlo, akalɨngʼhania isanjala isa kʉnyanyɨla ɨlɨtekelo. Akatoola ɨdogovi jaake na vakami vaake vavɨlɨ, palɨkɨmo nʉ mwanaake ʉIsaka, akavʉʉka ilʉta kʉno avʉlilue nʉ Ngʉlʉve.
4 Ɨkɨghono ɨkya vʉtatu mʉ lʉghendo lwave, ʉAbulahamu akalola, akapavona apoonu pala pa vʉtali. 5 Akavavʉʉla avakami vaake akati, “Mʉjighe bahaapa palɨkɨmo nɨ dogovi. Ʉne nʉ mwanango, tulʉta kʉla kʉkʉmwɨmɨka ʉNgʉlʉve. Kyande tʉmalile, tugomoka apa.” 6 Pe ʉAbulahamu akatoola isanjala isa kʉnyanyɨla ɨlɨtekelo, akantwɨka ʉmwanaake ʉIsaka. Ʉmwene akatoola ʉmwoto nʉ mhaghe, vakavʉʉka vilʉta ve vavɨɨlɨ.
7 Mʉ sɨla ʉIsaka akamposia ʉviise akati, “Nhaata!” Ghwope akɨtɨka akati, “Eena, mwanango.” ɄIsaka akati, “Ʉmwoto ni sanjala pwefili, neke ɨngʼholo ɨja kʉhʉmia ɨlɨtekelo ɨlio jɨlɨ kʉʉghi?” 8 ɄAbulahamu akamwamʉla akati, “Mwanango, ʉNgʉlʉve jʉjuo ghwe jʉno ɨkʉtʉpeela ɨngʼholo ɨja kʉtekela.” Pe vakava vifighenda palɨkɨmo vilʉta.
9 Pe vakafika pano ʉNgʉlʉve alyamʼbʉlile ʉAbulahamu. Akajenga ɨkɨtekelelo, akavɨɨka isanjala pa kɨtekelelo. Akampinya ʉmwanaake ʉIsaka, akamʉghonia pakyanya pa sanjala. 10 Akatoola ʉmhaghe, kuuti amʼbude ʉmwanaake. 11 Ʉnyamhola ghwa Mʉtwa ʉNgʉlʉve, akankemeela kuhʉma kʉkyanya akati, “Abulahamu, Abulahamu!” Akɨtɨka akati, “Eena, nɨlɨ apa!” 12 Ʉnyamhola ʉjuo akati, “Nʉngamʉlemasyaghe ʉmwanaako! Nambe kʉkʉmʼbomba lʉmonga! Lɨno nɨkagwile kuuti ʉkʉmwoghopa ʉNgʉlʉve, ʉlwakʉva nʉsitile kʉkʉnhavʉlɨla ʉmwanaako jʉno alɨ jʉmo mwene.”
13 ɄAbulahamu akasyetʉka, akajaagha ɨduuvi, amapembe ghaake ghʉmɨliile mʉ kɨhanji. Pe akalʉta akatoola ɨduuvi jɨla, akatavʉla kuuva lɨtekelo lya kʉnyaanya kupyanɨsia pa mwanaake. 14 ɄAbulahamu akapatambʉla apoonu pala, Yehova-Yile, kwekʉti, “ɄMʉtwa ʉNgʉlʉve ɨkʉtʉpeela!” Fye nambe kuhanga lɨno avaanhu vikʉpatambʉla viiti, “Pa kɨdunda ɨkya Mʉtwa ʉNgʉlʉve, avaanhu vipelua.”
15 Ʉnyamhola ghwa Mʉtwa ʉNgʉlʉve akankemeela ʉAbulahamu ʉlwa vʉvɨli kuhʉma kʉkyanya, 16 akamʼbʉʉla akati, “ɄMʉtwa ʉNgʉlʉve ijova iiti, ‘Ʉlwakʉva nʉkanile kʉkʉnhavʉlɨla ʉmwanaako jʉno alɨ jʉmo mwene, nɨjɨghile jʉʉne kuuti, 17 nɨkʉkʉfuunya ʉve, nʉ mwoloko ghwako nɨkʉvafuunya viiva vinga hwene nhondue isa kʉkyanya, kange hwene nsanga ʉghwa kʉ nyanja. Avanyeenya vaako vilighoma amakaaja agha valʉgʉ vaave. 18 Kukilila ʉmwoloko ghwako, avaanhu mʉ ɨɨsi sooni vilifunyua, ʉlwakʉva ʉkʉngʼhʉnda.’ ”
19 Pe ʉAbulahamu akagomoka kʉ vakami vaake vala, vakavʉʉka palɨkɨmo vigomoka kʉ Beeli-Sheba. ɄAbulahamu akajigha ikukala ʉkuo.
Avaana va Naholi
20 Pambele ɨkɨghono ɨkɨngɨ, ʉAbulahamu akavʉlua kuuti, “ɄMilika ampapiile ʉNaholi ʉnnunaavo avaana avadɨɨmi.”a 21 Ʉmwana ʉmʼbele itambʉlua Usi, ʉghwa vʉvɨlɨ itambʉlua Busi, ʉghwa vʉtatu itambʉlua Kemueli. ɄKemueli ghwe viise ghwa Alamu. 22 Avaana avange ava Naholi ve ava: ʉKesedi, ʉHaso, ʉPilidashi, ʉYidilafu nʉ Betueli. 23 ɄBetueli alyale viise ghwa Lebeka. ɄMilika alyampapiile ʉNaholi ʉnnuuna ghwa Abulahamu, avaana avuo lekelakwoni. 24 ɄNaholi alyale nʉ nʼdala ʉnkamib ghwake jʉno alyale itambʉlua Leuma. Ghwope alyampapiile avaana, amatavua ghaave vitambʉlua Teba, Gahamu, Tahashi nʉ Maaka.