ɄAbulahamu ighʉla apa kʉnsyɨla ʉnʼdala ghwake
23
ɄSala alikalile amaaka kɨlʉndo kɨmo ni fijigho fivɨlɨ na lekelalʉbale. 2 Akafwɨla mʉ lɨkaaja ɨlya Kiliati-Aliba, lɨno ifighono ifi litambʉlua Hebuloni, mʉ ɨɨsi ɨja Kanaani. ɄAbulahamu akalɨla ɨfua na kujɨjɨvɨla.3 Pe ʉAbulahamu akaghʉleka ʉmfimba ʉghwa nʼdala ghwake, akalʉta kujova na Vahitia avanya kaaja va ɨɨsi jɨla akati, 4 “Ʉne nikalile pakate palyʉmue apa nɨlɨ mhesia. Nisʉʉma mʉngʉsɨkɨsie pamonga nɨnsyɨle ʉnʼdala ghwango.”
5 AVahiti vala vakamwamʉla vakati, 6 “Ghwe ntwa ghwitu, ʉtʉpʉlɨkɨsie! Ʉve veeve mʼbaha palyʉsue apa. Salʉla ɨmbiipa jɨno ghughanile pikʉnsyɨla ʉnʼdala ghwako. Nakwale ʉmuunhu jʉno ɨkʉkʉfinya ɨmbiipa jaake.”
7 Pe ʉAbulahamu akɨɨma na kufughama nʉ vwoghofi pamaaso gha Vahiti avuo. 8 Akajova navo akati, “Nave mʉkʉnyɨtɨkɨsia nɨnsyɨle ʉnʼdala ghwango mʉmhʉlɨkɨsie, mʉsʉmɨle kwa Efuloni ʉmwana ghwa Sohali 9 kuuti, angʉsɨkɨsie ɨmhangab jaake jɨno jɨlɨ kʉ Makɨpela mʉ mhaka kʉ mʉghʉnda ghwake. Mʉmʼbʉʉle angʉsɨkɨsie pamaaso ghiinu ni ndalama sino ilonda, kuuti paave pango apa kʉsyɨla.”
10 ɄEfuloni jʉjuo alyale palɨkɨmo na Vahiti avuo pa mʉlyango ʉghwa kwingilila mʉ lɨkaaja. Pe ʉEfuloni akamwamʉla ʉAbulahamu pamaaso gha Vahiti vooni akati, 11 “Ndali ntwa ghwango, ʉmhʉlɨkɨsie. Nɨkʉkʉpeela vʉvʉle ʉmʉghʉnda ghʉla palɨkɨmo nɨ mhanga ɨjio. Nɨkʉkʉpeela pamaaso gha Vahiti vajango, ʉnsyɨle apuo ʉnʼdala ghwako.”
12 ɄAbulahamu akafughama kange pamaaso gha Vahiti vala. 13 Akamʼbʉʉla ʉEfuloni kʉmo avaanhu vala vipʉlɨkɨsia, akati, “Nɨkʉkʉsʉʉma ʉmhʉlɨkɨsie, nɨkʉkʉhomba indalama isa kʉkwɨla kughʉla ʉmʉghʉnda ʉghuo. Ghwʉpɨle, neke nɨɨve na pa kʉnsyɨla ʉnʼdala ghwango.”
14 ɄEfuloni akamwamʉla ʉAbulahamu akati, 15 “Ntwa ghwango ʉmhʉlɨkɨsie. Ʉmʉghʉnda ʉghuo ghʉlyaghʉlilue ni ndalama filʉndo fine, neke lɨno ʉlʉhombo ʉluo na kɨɨnu kɨtalamu kʉlyʉne nuuve. Ʉve syɨla ʉmuo ʉnʼdala ghwako.”
16 ɄAbulahamu nʉ Efuloni vakɨtɨngʼhana. ɄAbulahamu akamʉghelela ʉEfuloni indalama sino vɨtɨngʼhiine pamaaso gha Vahiti vajaake, indalama filʉndo fine kulɨngʼhana ni fighelelo ifya kʉghʉsia amasiki aghuo.
17 Enendɨɨkɨ ʉAbulahamu fye alyʉpiile ʉmʉghʉnda ʉghwa Efuloni ʉghwa kʉ Makɨpela, kulʉngama kʉ Mamule, palɨkɨmo nɨ mhanga jaake na mapiki ghooni kuuti fiive fyake. 18 Ɨmbombo ɨjio jɨlyavombiike pamaaso gha vavaha va Vahiti vano valyakongʼhanile pa mʉlyango ghwa lɨkaaja ɨlio.