ɄBohasi ɨkwɨtɨkɨsɨvua kʉkʉmhaala ʉLʉti
4
Ɨkɨghono kɨla kɨla palwakɨlo, ʉBohasi akavʉʉka ilʉta, akafika pa mʉlyango ʉghwa kwingilila mʉ lɨkaaja,a apuo akikala. Ye ikiile, akava ikila jʉno anʼjovagha kuuti ghwe nyalʉkolo ghwa nkate ghwa Elimeleki. ɄBohasi akankemeela akati, “Isagha nyalʉkolo, ikale apa!” Akaveela, akikala. 2 Pepano ʉBohasi akavakemeela na vange kɨjigho nkate mʉ vavaha ava mʉ lɨkaaja, voope vakikala baaho.3 ɄBohasi akatengʉla pikʉmʼbʉʉla ʉnyalʉkolo ghwake jʉla akati, “ɄNaomi jʉno alyale kʉ Moabu ighʉsia ʉmʉghʉnda ghwa nyalʉkolo ghwitu ʉElimeleki ʉnyakʉsila. 4 Lɨno ʉne nɨfumbilue kʉkʉkʉvʉʉla ʉve kuuti, ʉlwakʉva veeve nyalʉkolo ghwa nkate ghwa Elimeleki ʉnyalʉkolo ghwitu, ʉghʉle ʉmʉghʉnda ʉghuo pamaaso gha vano pwevale apa na vavaha va vaanhu vango. Ʉjove nave ghughʉla, nave naghughʉla apuo nighʉla ʉne, ʉlwakʉva mʉ lʉkolo neene nɨlɨ piipi palyʉve.” Ʉmuunhu jʉla akati, “Nighʉla.” 5 Pe ʉBohasi akamʼbʉʉla akati, “Ɨkɨghono kɨno ghuliiva ghukwisa kughʉla ʉmʉghʉnda kwa Naomi, ye ghuhalagha najʉ Lʉti ʉMʉmoabu ʉnʼdala ghwa nyakʉsila ʉMaloni. Ʉmpapɨle ʉmwana, neke ɨlɨtavua lya nyalʉkolo ghwitu lɨleke pisova, kange nakɨ kyʉma kɨjighe mʉ nyumba jaake.” 6 Ʉmuunhu jʉla akamʉla akati, “Ʉne, jeeje! Nanɨngakombole ʉmʉghʉnda ʉghuo, ʉlwakʉva nanikeela kunangania ʉvʉhaasi vwa vanango. Lɨno ye kʉba ʉne nɨkʉlekele ʉve Bohasi ʉghʉle.”
7 Lwale lwiho kʉ Vaisilaeli kwa jʉno ighʉsia ɨkɨɨnu kufuula ɨkɨlatu kʉkʉmpeela jʉno ighʉla. Kwekʉti vɨtɨngʼhiine. 8 Pe ʉmuunhu jʉla akamʼbʉʉla ʉBohasi akati, “Ʉghʉle jʉʉve.” Akafuula ɨkɨlatu kyake akampeela.
9 ɄBohasi akavavʉʉla avavaha na vaanhu vooni vano pwevalyale akati, “Ʉmʉsyʉghʉ ʉmue mʉlɨ volesi piiti, ʉne nɨghʉlile kuhʉma kwa Naomi fyoni fino fyale fya Elimeleki na vaana vaake ʉKilioni nʉ Maloni. 10 Kange, ʉLʉti ʉMʉmoabu ʉmfwɨle, jʉno alyale nʼdala ghwa Maloni iiva nʼdala ghwango, neke nɨmpeele ʉnyakʉsila ʉmwana ghwa vʉhaasi, kuuti ɨkyʉma kɨjighe mʉ nyumba jaake nalɨ lɨtavua lɨleke kusova mʉ lʉkolo na mʉ lɨkaaja lyake. Ʉmʉsyʉghʉ ʉmue mʉlɨvolesi.” 11 Avavaha na vooni vano pwevalyale vakati, “Se seene, ʉsue tʉlɨ volesi. ɄMʉtwa ʉNgʉlʉve antange aave nʼdala ghwako, apaape avaana vinga ndavʉle valyale ʉLaheli nʉ Lea, vano ifisina fyoni fya Vaisilaeli mwe fivʉmbʉkiile. Ʉve mfunyua mʉ kɨsina kya Efulati nalɨ lɨtavua lyako lɨɨve lɨvaha mʉ Betelehemu jooni. 12 Kange, ɨkɨkolo kyako kɨno ʉMʉtwa ʉNgʉlʉve ɨkʉkʉpelagha mwa Lʉti, kɨɨve na vaanhu vinga ndavʉle ɨkɨkolo kya Pelesi jʉno ʉTamali alyapapile nʉ Yuuda.”
Ɨkɨsina kya Davɨdi
13 Pepano ʉBohasi akantoola ʉLʉti kuuva nʼdala ghwake. ɄMʉtwa ʉNgʉlʉve akavapeela ʉmwana ʉnʼdɨɨmi. 14 Neke avakɨjʉʉva vakamʼbʉʉla ʉNaomi vakati, “Alʉmbwaghe ʉMʉtwa ʉNgʉlʉve jʉno ʉnsiki ʉghʉ naakʉlekile kɨsila mwana ʉghwa kʉkʉsula! Ɨlɨtavua lya mwana ʉjʉ lɨɨve lɨvaha mʉ Isilaeli! 15 Ʉjuo ɨkʉkʉpeela ingʉfu imia, kange ilikʉkʉtanga ʉlaava ʉghosiipe, ʉlwakʉva jʉno amholile ʉmwana ʉjʉ ghwe nkamwanavo jʉno akʉghanile. Kange mhʉvɨlua kukila avaana avadɨɨmi lekelalʉbale.” 16 Pe ʉNaomi akantoola ʉmwana jʉla akava mʉ mavoko ghaake, akansʉngagha. 17 Avakɨjʉʉva avabadɨngʼhani va Naomi vakati, “Ʉmwana aholilue kwa Naomi.” Vakampeela ɨlɨtavua kuuti, avisaghe ghwe Obedi. ɄObedi ghwe viise ghwa Yese; ʉYese ghwe viise ghwa Davɨdi.
18 Ɨkɨsina kya Pelesi kyale ndɨɨkɨ,
ʉPelesi akamhola ʉHesiloni,
19 ʉHesiloni akamhola ʉLamu,
ʉLamu akamhola ʉAminadabu.
20 ɄAminadabu akamhola ʉNasoni.
ɄNasoni akamhola ʉSalimoni.
21 ɄSalimoni akamhola ʉBohasi,
ʉBohasi akamhola ʉObedi.
22 ɄObedi akamhola ʉYese,
ʉYese akamhola ʉDavɨdi.