2
झुटा बोद देनाराहांअ बाबोताम
1 जुना जोमानाम ईसरायेल लोकाहांमेनेअ , झुटी रीते सोताल पोरमेहेराअ गोठ जाहेर केअनारा आखावीन सोताअ बोंणावली गोठ आखनारा पेदा वेअला। तेंहकींअज कीईन, तुमाहांमेनेअ बी सोताल हाचा बोद देनारा एंहकींअ झुटी रीते आखावीन झुटा बोद देनारा पेदा वीअ। ते मोंडोळुंहम झुटा ने लोकाहांन वीसवासामनेअ पाळी टाके एंहडा बोद दीअ, आने सोताल पापाअ सीक्सामेनेअ सोळावांअ कींमोत चुकवुअनारा मालीखाअ बाबोताअ हाचायुल बी नांय मानीअ। आने एंहकींअ कीईन ते सोतेज आत्मीक रीते माहरीज नास वीअ जाय। 2 आने जों बादी जातीअ सीनालों ने बीहरें मोलवाअलें कामें ते केअताह, तीयाहांन देखीन मोंडोळाअ बीहरें खुब मांहेंअ बी तेंहकींअज कीअ। 3 पोयसाहांअ सोताअ लोबुअ लीदे, ते उबजावी काडली गांअयुंहवाला बोद तुमनेंह दीईन तुमांहपनेअ पोयसा पाळावीअ। तीयाहांन सीक्सा केरांअ नोक्की केअनारो जोज, मोंजे का, पोरमेहेर तीयाहांन सीक्सा केरांअ तीयारुज हाय, आने नोक्कीज जो तीयाहांअ नास केअनारो हाय। तो हुवी नांह गीयो।
4 ईत केरा का, जीया होरगाअ दुताहीं पाप केअयो, तीया दुताहांन पोरमेहेरांय नोक्कीज सीक्सा केअयी आने तीयाहांन पाताळाम टाकीन नीयायाअ दीह लोगुंअ आंदाराअ खाडांहम बांदी थोव्याह। 5 तेंहकींअज कीईन, तीयांय जुना जोमानाअ खाराब लोकाहांन बी नांह सोळ्या। उलटों, तीयाहांन रेलाअ पांअयांकींअ माय टाक्या। पेन तीयांय हाचा मारगुअ गोठ आखनारा नुहुल आने तीयाअरी बीहरा सांत मांहांहांन ओतेंअज वाचाव्यें। 6 आने तेंहकींअज कीईन, पोरमेहेरांय सोदोम आने गोमोरा सेहेरुंहन बालीन खाक कीअ टाक्यें, आने एंहकींअ कीईन तीयांय जाहेर केअयों का, तें सेहेरें नास वेअली हालोतामुज कायोम रीअ, आने एंहकींअ कीईन तीयाहां जें गुना वोगुराअ नांह तीया मांहांहांन केंहडी सीक्सा वीअ तीयाअ नोमुनो देखाव्यो। 7 आने तीयांय आबराहामाअ पावुअ पोयरा लोतुल वाचावी लेदो। तो लोत हाचो आथो आने सोदोम सेहेराअ खाराब मांहांहांअ नोफ्फोट चाल-चोलगोत्या हीअ-हीईन तो दुखी वेअत्लो। 8 काहाका, तीयाहांअरी रीईन तीयाहां केअला खाराब कामाहांन देखीन आने तीयाहां आखल्या खाराब गोठ्या रोददीह उनाय-उनायन तीयाअ हाचा मोनाम तो कायोमुज दुखी वेअत्लो। 9-10 ईं बादों आपनेंह ईं देखावेह का, भोकती-भावुअ जीवोन जीवनारांहन तीयाहांअ दुखाहांमेनेअ आने पारखांहमनेअ सोळवुअता पोरमेहेराल आवळेह, आने जे हाचा नांह तीया लोकाहांन, खास कीईन जे लोक सोताअ सोरीलाहांअ मोलवाअली मोर्जींअ काबाम रेताह आने पोरमेहेराअ आदीकार नांह मानता तीयाहांन, नीयायाअ दीह सीक्सा मीले तांव लोगुंअ हाकलीहींकींअ बांदी राखता बी तीयाल आवळेह।
ते झुटा बोद देनारा ता, केडाल बी बीनारा नांह आने टीणी तीअ रेनारा हाय। ते होरगामेर्याअ दुताहांन मान नांह देता, पेन उलटों तीयाहांअ नींदा केअताह। 11 होरगाअ दुत झुटा बोद देनारा ईयाहांअ केअता वादारे ताकोतावाला हाय तेबी, ते मालीखाअ हाजरीम तीया झुटा बोद देनाराहांअ नींदा कीईन तीयाहांपेअ गुनो नांह थोवता। 12 पेन ते झुटा बोद देनारा खेरों-खोटों नांय जांअनारा ने तेरायन माय टाकायांअज जोन्मुअला जोंगली जोनावोराहांअ होच हाय। आने ते होमजुअता नांह तेंहडी केल्ली बी गोठीअ नींदा केअताह। आने जेंहकींअ जोंगली जोनावोराहांअ नास वीअ, तेंहकींअ झुटा बोद देनारा तीया लोकाहांअ बी नास वीअ। 13 तीयाहां बीहराहांन दुखी केअयेंह तीयाअ लीदे, तें बी दुखें भोगवीअ। आने भोर दीहाअ खाय-पीन मोज्या केरांअ आने सीनालों केरांअ तीयाहांन खुब गोंवेंह। आने ठोगनारी वाटे जाता ते मोज्या केअताह। ते चोख्खा पोतळाल लागला डागुअ होच हाय। तेबी ते तुमांअरी खाताह। 14 आने ते बादी बायाहांन कायोम सीनालों केरांअ नोजरेज हेअताह। आने तें मोलवाअलें कामें केअता कीदीह बी ताराअता नांह। ते आत्मीक रीते नोबला मांहांहांन लालचावीन पापाअ मारगे लीअ जाताह। ते माल-मीलकोताअ लोब राखांअ हुच्यार हाय। आने तीयाअ लीदे पोरमेहेर तीयाहांन नोक्कीज सीक्सा कीअ। 15 ते ता हाचो मारोग सोळी थोवीन खाराब मारगे गीयाह। आने बेयोरुअ पोयरो बालाम, जो जुना जोमानाम पोरमेहेराअ गोठ जाहेर केअनारो आथो आने जीयांय खोटों केरांअ बोदलाम मीलांअ आथा तीया पोयसांहपेअ माया राखी, तीयाअ होच तीया झुटा बोद देनाराहां बी केअयोंह। 16 पेन बालामुल, तीयाअ जांय जोवीन केअला गुनाअ बोदलाम ठोपको मीललो आने तीयाअ फुरक्यांह मांहांअ होच गोगीन तीयाल ओकली वोगुराअ काम केअता ओटकाव्यो।
17 ते झुटा बोद देनारा ता, पांअयुं वोगुराअ चोरुंअ होच आने वादुंअरी हाअडाय जानारा आने वोहरात नांय देनारा वादलांअ होच नोककामा हाय। तीया लोकाहांअ खातुर पोरमेहेरांय नोरकाम आंदारोंगुळुक जागो तीयार कीअ थोव्योह। 18 ते ओभीमानुवाल्या आने ओकली वोगुराअ गोठ्या आखताह आने पोरमेहेराअ बाबोताअ हाचाय जें नांह जांअतें तीया मांहांहांमेनेअ नोवा ख्रीस्ती वीसवास्यांहन लालचावीन फोसावांअ ते सोरीलाहांअ नोफ्फोट मोर्जींहन वापरुअताह। 19 ते तीया मांहांहांन आत्मीक वीदींअ से सुट दांअ वोचोन देताह। पेन ते सोतेज पापी मोर्जींअ गुलाम हाय। काहाका, मांहुंअ जीयाअ बी काबाम रेहे, तीयाअ तो गुलाम बोंणी जाहे। 20 आपुअ मालीख आने वाचावनारा ईसु ख्रीस्तुल ओअखीन जें मांहेंअ ईयु दुन्याअ बाटलावनारी बाबोतींहमनेअ सुटें वीयेंह, तें फाचें तीयु पापी होंवांयुंहम पोळी जाय आने तीयुहुंअ काबाम रे ता, तीयाहांअ ते हालोत तीयाहांअ पेअलारीअ हालोता केअता वादारे खाराब आवीअ। 21 काहाका, पोरमेहेरांय देखावलो हाचो मारोग जांयन हातींअ बी तें तीयांय देदलो पोवीतोर हुकोम तोळीन फाचें तीया जुना खाराब मारगे चाले ता, तों तीयाहांअ खातुर खुब खाराब वीअ; तीयाअ केअता तींयहां तो हाचो मारोग जांअयो नांय वेअतो ता, तों तीयाहांअ खातुर वादारे हारों आथों। 22 पेन तीयाहां जों केअयोंह तीयापेनेअ ए आखाअत्या गोठ्या हाच्या पोळ्या का, “हुंणों सोताअ उलटुअलालुज फाचों चाटेह, आने तुवलों डुकरों फाचों डोराम उंडलांअ जाहे।”